Zezi tuli i klun boli jasin fɛ’n Galile mɛn’n nun. Sanngɛ ɔ seli kɛ: “Ɔ fata kɛ n wɔ klɔ uflɛ su naan n ko bo Ɲanmiɛn i Famiɛn dilɛ’n i jasin fɛ’n.” I sɔ’n kle kɛ nán Galile mɛn’n nun ngunmin yɛ ɔ fata kɛ ɔ bo jasin fɛ’n niɔn. Ɔ maan “ɔ ɔli Zide mɛn’n nun lɔ ko kannin Ɲanmiɛn ndɛ’n be Ɲanmiɛn sulɛ sua’m be nun.” (Liki 4:43, 44) I sɔ m’ɔ yoli’n ti su afin munngu blɛ’n w’a ju, yɛ Zerizalɛmun lɔ cɛn dilɛ kun w’a mantan koko.

Matie nin Marki nin Liki nin Zan be klɛli junman nga Zezi dili i Galile mɛn’n nun lɔ’n i su ndɛ kpanngban. Sanngɛ junman ng’ɔ dili i Zide mɛn’n nun lɔ’n, b’a kanman su ndɛ kpanngban. Zidefuɛ’m be nun sunman b’a sɔman Zezi i nun klanman. Ɔ nin i sɔ ngba’n, Zezi i sa sin w’a bubumɛn i. Ɔ dili Ɲanmiɛn junman’n i juejue su, yɛ ɔ yoli sa kpakpa mun lika sɔ’n nun lɔ.

Afuɛ 31 nun’n, Zezi ɔli Zerizalɛmun m’ɔ ti Zide mɛn’n i klɔ dan’n su lɔ. Ɔ ɔli Delɛ cɛn’n i dilɛ. Zerizalɛmun klɔ’n i anuan nga be flɛ i Bua anuan’n i wun lɛ’n, nzue gble kun o lɛ. Be flɛ i kɛ Bɛtzata. Akpa wie’m be bo sin yiɛ i. Sran’m be sɔnnin lika sɔ’n nun kpa. Tukpacifuɛ kpanngban nin aɲinsifuɛ mun nin be nga be ja yo be ya’n, ɔ nin be nga be ja annzɛ be sa ti wuwa’n, be ba nzue gble sɔ’n i nuan lɛ. ?Ngue ti-ɔ? Afin sran kpanngban be lafi su kɛ, kɛ nzue’n keje’n, sɛ be jra nun’n be kwla yo juejue.

Wunmiɛn-lolɛ-cɛn’n nun’n, Zezi ɔli nzue gble sɔ’n i nuan lɔ. Ɔ wunnin bian kun mɔ i tukpacɛ’n wo i su w’a di afuɛ ablasan-nin-mɔcuɛ (38). Zezi usɛli i kɛ: “?A kunndɛ kɛ á yó juejue?” Bian’n tɛli i su kɛ: “Nja, kɛ nzue’n ko keje’n, n ɲanman sran naan w’a fa min w’a jra nun. Kɛ ń kɔ́’n, nn sran uflɛ w’a dun mmua w’a jra nun.”​​—Zan 5:6, 7.

Zezi kannin ndɛ kun mɔ atrɛkpa’n, ɔ boli bian’n nin be nga be o lɛ’n be kwlaa be nuan-ɔn. Ɔ seli bian’n kɛ: “Jaso! Fa ɔ bɛ’n naan nanti.” (Zan 5:8) Yɛ bian’n jasoli-ɔ. Be ja nun lɛ’n, bian’n yoli juejue, ɔ mɛnnin i bɛ’n su, kpɛkun ɔ nanti ɔli!

Kɛ ɔ yo naan abonuan sa sɔ’n yo Zuifu’m be fɛ’n, ɔ yoli be ya dan kpa. Ɔ maan kɛ be wunnin bian’n, be seli i kɛ: “Andɛ ti Wunmiɛn-lolɛ-cɛn, a leman atin manman bɛ su.” Bian’n tɛli be su kɛ: “Sran ng’ɔ yoli min juejue’n, i bɔbɔ seli min kɛ: ‘Fa ɔ bɛ’n naan nanti.’” (Zan 5:10, 11) Zuifu sɔ’m be kplinman su kɛ be yo sran kun juejue Wunmiɛn-lolɛ-cɛn’n nun.

Be kunndɛli kɛ bé sí sran ng’ɔ yoli bian’n i juejue’n. I sɔ’n ti’n, be usɛli i kɛ: “?Sran onin yɛ ɔ seli wɔ kɛ, ‘Fa ɔ bɛ’n naan nanti-ɔ?’” ?Ngue ti yɛ be usali bian’n i sɔ-ɔ? Be usɛli i sɔ afin “Zezi wluli sran kpanngban nga be o lɛ’n be afiɛn ɔli.” Kusu bian’n siman Zezi i dunman. (Zan 5:12, 13) Sanngɛ i sin’n, bian’n nin Zezi be yiali ekun Ɲanmiɛn i sua’n nun lɔ. Ɔ maan ɔ wunnin i wlɛ kɛ Zezi yɛ ɔ yoli i juejue nzue gble’n i nuan lɔ’n niɔn.

Bian nga Zezi yoli i juejue’n ko toli Zuifu nga be usɛli i kosan’n, kpɛkun ɔ seli be kɛ Zezi yɛ ɔ yoli i juejue-ɔ. Kɛ be tili i sɔ’n, be ko toli Zezi. Nán kɛ be kunndɛ kɛ bé sí wafa nga Zezi yo abonuan sa mun’n ti-ɔ. Sanngɛ be waan bé kó klé i kɛ ɔ fataman kɛ ɔ yo sa kpa Wunmiɛn-lolɛ-cɛn’n nun. Kpɛkun be kleli i yalɛ bɔbɔ!