Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 51

Be kunnin sran awuliɛ cɛn dilɛ kun bo

Be kunnin sran awuliɛ cɛn dilɛ kun bo

MATIE 14:1-12 MARKI 6:14-29 LIKI 9:7-9

  • ERƆDU YOLI MAAN BE KUNNIN ZAN BATƐMUN YOFUƐ’N

Zezi i akoto’m be su bo jasin Galile lɔ. Kɛ ɔ́ yó sɔ’n, nn Zan Batɛmun yofuɛ m’ɔ fali Zezi kleli sran mun’n, ɔ o bisua i afuɛ kɔe nɲɔn yɛ.

Zan kɛnnin i sran’m be kwlaa be ɲrun kɛ Famiɛn Erɔdu Antipasi nin Erodiadi be aja’n timan su. Afin Erodiadi ti Erɔdu i niaan bian Filipu i yi. Erɔdu yrɛli i yi klikli’n, kpɛkun ɔ jali Erodiadi. Erɔdu waan ɔ nanti Moizi Mmla’n su, kusu nn Mmla sɔ’n se kɛ aja kɛ ngalɛ’n sa’n timan su. Ɔ maan kɛ Erɔdu jali Erodiadi’n, i sɔ’n kle kɛ Erɔdu w’a kunndɛ bla i yi bo. Kɛ Zan tuli Erɔdu fɔ’n, w’a yomɛn i fɛ. I sɔ’n ti’n, ɔ wlali Zan bisua. Atrɛkpa’n, Erodiadi yɛ ɔ jrɛnnin i wun kɛ ɔ yo i sɔ liɛ’n niɔn.

Erɔdu siman like ng’ɔ́ fá yó Zan-ɔn, afin sran’m “be bu Zan Ɲanmiɛn nuan ijɔfuɛ.” (Matie 14:5) Sanngɛ Erodiadi liɛ’n, ɔ “fali Zan i wun ndɛ sieli i klun.” Ɔ maan ɔ kunndɛ kpa kɛ ɔ́ yó naan be kun i. (Marki 6:19) Cɛn kun’n, ɔ wa ɲɛnnin i kunlɛ’n i wun atin.

Ka naan b’a di afuɛ 32 nun Delɛ cɛn’n, Erɔdu wa dili i awuliɛ cɛn’n. Erɔdu i junman difuɛ dandan mun nin i sonja su kpɛn mun, ɔ nin Galile mɛn’n nun sran nga be le ɲrun kpa’n, be trannin cɛn dilɛ sɔ’n i bo. Kpɛkun Salome m’ɔ ti Erodiadi nin Filipu be wa bla’n, ɔ wa sili able be nga Erɔdu yiali be’n be ɲrun. Able m’ɔ sili’n yoli sran sɔ’m be fɛ kpa.

Ɔ yoli Erɔdu i fɛ kpa wie. I sɔ’n ti’n, ɔ flɛli ba bla’n naan w’a se i kɛ: “Like kwlaa nga a klo kɛ n fa man wɔ’n, se min naan n fa man wɔ.” Ɔ tɛli i nda bɔbɔ seli i kɛ: “Like kwlaa nga a se min kɛ n fa man wɔ’n, ń fá mán wɔ. Kannzɛ ɔ waan n fa min famiɛn diwlɛ’n i bue kun bɔbɔ n man wɔ’n, ń fá mán wɔ.” Ka naan Salome wa buɛ i wie’n, ɔ fiteli naan w’a ko usɛ i nin kɛ: “?Ngue yɛ ɔ fata kɛ n srɛ-ɔ?”​—Marki 6:22-24.

Nanwlɛ, flɛlɛ nin srolɛ yɛ b’a yia nun-ɔn! Erodiadi w’a sisimɛn i bo. Ɔ seli kɛ: “Srɛ Zan Batɛmun yofuɛ’n i ti’n.” Salome sɛli i sin ndɛndɛ Erɔdu i wun lɔ naan w’a se i kɛ: “N kunndɛ kɛ a fa Zan Batɛmun yofuɛ’n i ti’n blɛ min kpongbo vaa kun nun icra’n.”​—Marki 6:24, 25.

Kɛ Erɔdu tili i sɔ’n, ɔ yoli i ya dan. Sanngɛ ɔ lemɛn i yowlɛ, w’a dun mmua w’a ta Salome i nda sran’m be kwlaa be ɲrun. Ɔ maan ɔ fata kɛ ɔ yia nda ng’ɔ tali’n i nuan. Yɛle kɛ sɛ i li bɔbɔ ɔ fata kɛ ɔ kun sran mɔ w’a yoman sa fi’n, ɔ́ kún i. I sɔ yɛ ɔ yoli-ɔ. Ɔ sunmɛnnin i gladi difuɛ kun bisua lɔ kɛ ɔ ko kpɛ Zan i ti’n. Yɛ gladi difuɛ’n ɔli-ɔ. Kɛ ɔ́ sɛ́ i sin’n, Zan i ti’n wo i sa nun kpongbo vaa kun nun. Ɔ fa mannin Salome naan i kusu w’a fa ko mɛn i nin.

Kɛ Zan i sɔnnzɔnfuɛ’m be tili i kɛ be kunnin i’n, be ko fɛli i fuɛn’n naan b’a ko sie i. Kpɛkun be wa kan kleli Zezi.

I sin’n, Erɔdu tili i kɛ Zezi yo sran’m be juejue, yɛ ɔ fuan mmusu mun. I sɔ’n ti’n, srɛ kunnin i. Afin ɔ seli i wun kɛ atrɛkpa’n Zezi ng’ɔ su yo abonuan sa sɔ mun’n, yɛle “Zan m’ɔ wuli’n” naan “w’a cɛn.” (Liki 9:7) Ɔ maan Erɔdu Antipasi kunndɛli kpa kɛ ɔ́ wún Zezi i wun. Nán kɛ ɔ kunndɛ kɛ ɔ́ tíe i ndɛ’n ti-ɔ, sanngɛ ɔ kunndɛ kɛ ɔ́ nían, sɛ Zan yɛ w’a cɛn nguan sakpa-o annzɛ sɛ sran uflɛ-o.