Kɔ i nun ndɛ'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Kle aniɛn'n Wawle

 NDƐ TRE 60

Zezi i kacilɛ’n kle kɛ ɔ́ wá ɲán ɲrun kpa

Zezi i kacilɛ’n kle kɛ ɔ́ wá ɲán ɲrun kpa

MATIE 16:28–17:13 MARKI 9:1-13 LIKI 9:27-36

  • ZEZI I KACILƐ’N

  • AKOTO’M BE TILI ƝANMIƐN I NƐN’N

Zezi o Sezare Filipu mɛn’n nun lɔ, ɔ su kle sran’m be like. Lika sɔ’n nin Ɛrmɔn oka’n be afiɛn ti nun kilo ablaɔn-nin-nnun (25). Zezi kannin ndɛ cinnjin kpa kun kleli i sɔnnzɔnfuɛ mun lɔ. Ɔ seli be kɛ: “Nanwlɛ, ń kán klé amun kɛ be nga be jinjin wa yɛ’n, be nun wie’m bé dún mmua wún kɛ Sran wa’n w’a bɛ i Famiɛn diwlɛ’n nun ka naan b’a wu.”​—Matie 16:28.

Kɛ i sɔnnzɔnfuɛ’m be tili ndɛ sɔ’n, atrɛkpa be usali be wun kɛ: ‘?Ndɛ ng’ɔ kɛnnin i lɛ’n, i bo’n yɛle benin?’ Kɛ lemɔcuɛ kun sinnin’n, Zezi fɛli i akoto’m be nun nsan, kpɛkun ɔ nin be ɔli oka fleiin kpa kun su. Be yɛle Piɛli nin Zaki nin Zan. Atrɛkpa kɛ bé kɔ́’n, nn lika’n w’a san. Afin lafilɛ kun akoto mun. Kɛ be juli lɔ mɔ Zezi srɛ́ Ɲanmiɛn’n, ɔ kacili be ɲrun lɛ. Akoto’m be wunnin kɛ i ɲrun’n kpajali kɛ wia’n sa, kpɛkun i wun tralɛ’m be yoli ufue ɲanɲanɲan.

I sin’n, sran nɲɔn be fiteli be ɲrun lɛ. Be yɛle “Moizi nin Eli.” Sran nɲɔn sɔ’m be nin Zezi be kokoli “kɔlɛ m’ɔ́ wá kɔ́’n, mɔ Zerizalɛmun lɔ yɛ ɔ́ kpɛ́n su’n, i su yalɛ.” (Liki 9:30, 31) Zezi i wie’n nin i cɛnlɛ’n yɛle i kɔlɛ m’ɔ́ wá kɔ́’n. Ɔ kɛnnin i wie’n nin i cɛnlɛ’n be ndɛ kleli i sɔnnzɔnfuɛ mun i osu nin-a cɛman. (Matie 16:21) Yalɛ nga Zezi nin Moizi nin Eli be kokoli’n, ɔ nin akunndan nga Piɛli buli’n, be sansan be wun. Afin ɔ kle kɛ Zezi i wie’n su to fuɛnmɛn i.

Kɛ ɔ yoli sɔ’n, akoto nsan’m be ɲin su wa titili kpa. Like nga be wunnin i’n nin ndɛ nga be tili’n boli be nuan dan. Kannzɛ bɔbɔ aolia nun like yɛ be wunnin i’n, sanngɛ ɔ yoli Piɛli kɛ sa sɔ’n su ju be ɲin jrɛiin su sa. Ɔ maan ɔ seli kɛ: “Rabi, kɛ e o wa yɛ’n, ɔ ti kpa dan. I sɔ’n ti’n, maan e kplan tannin sua nsan. Ɔ liɛ kun, Moizi liɛ kun, kpɛkun Eli liɛ kun.” (Marki 9:5) Like nga ti yɛ Piɛli kannin tannin sua kplanlɛ ndɛ’n yɛle kɛ atrɛkpa’n, ɔ kunndɛman kɛ like ng’ɔ su wun i lɛ’n, ɔ wie.

Piɛli i nuan nin-a tɔman, kpɛkun ɲanmiɛn ufue fuaii kun katali be su. Nɛn kun tɛli ɲanmiɛn ufue’n nun. Ɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn. Amun tie ndɛ ng’ɔ kan’n.” Kɛ i akoto’m be tili Ɲanmiɛn i nɛn’n, be tɔli be utuli be ɲin ase. Afin srɛ dan kpa kunnin be. Ɔ maan Zezi seli be kɛ: “Amun jaso. Nán srɛ kun amun.” (Matie 17:5-7) Kɛ be jasoli’n, b’a wunman sran fi Zezi wun lɛ kun. Like nga be yili i nglo kleli be aolia nun’n wieli. Kɛ aliɛ cɛnnin mɔ bé fín oka’n su lɔ bé jrá’n, Zezi wlali be su nun kpa kɛ: “Nán amun kan aolia nun sa nga amun wunnin i’n kle sran fi, lele saan Sran wa’n w’a cɛn nguan.”​—Matie 17:9.

Kɛ mɔ akoto’m be wunnin Eli ti’n, be usali Zezi kɛ: “?Yɛ nn ngue ti yɛ mmla klɛfuɛ’m be waan Eli dún mmua bá ka-ɔ?” Ɔ tɛli be su kɛ: “Eli w’a dun mmua w’a ba, sanngɛ sran’m b’a wunmɛn i wlɛ.” (Matie 17:10-12) Zan Batɛmun yofuɛ’n yɛ Zezi su kɛn i ndɛ-ɔ. Ɔ dili junman kunngba nga Eli dili’n wie. Yɛle kɛ Eli siesieli lika’n mannin Elize, yɛ Zan kusu siesieli lika’n mannin Klisi.

Nanwlɛ, aolia nun like sɔ’n wlali Zezi nin i akoto’m be fanngan kpa! Ɔ kle kɛ Klisi yó sran dan kpa Ɲanmiɛn i Famiɛn diwlɛ’n nun. Ɔ maan kɛ nga Zezi fa kannin’n sa’n, i sɔnnzɔnfuɛ’m be wunnin blɛ nga ‘Sran wa’n w’a bɛ i Famiɛn diwlɛ’n nun’n.’ (Matie 16:28) Afin ‘be bɔbɔ be wunnin i sɔ’n.’ Kɛ Farizifuɛ’m be kunndɛli kɛ Zezi kle be nzɔliɛ kun m’ɔ kle kɛ i yɛ Ɲanmiɛn fɛli i kɛ ɔ di famiɛn’n, w’a kleman be like fi. Sanngɛ i akoto’m be liɛ’n, kɛ ɔ kacili’n be wunnin i. I sɔ’n ti’n, be wunnin i wlɛ kɛ Ɲanmiɛn i Famiɛn diwlɛ’n i ndɛ nga Ɲanmiɛn nuan ijɔfuɛ’m be kannin’n, ɔ ti nanwlɛ. I sɔ’n ti’n, Piɛli klɛli i kɛ: “I sɔ’n ti yɛ e lafi su kɛ ndɛ nga Ɲanmiɛn nuan ijɔfuɛ’m be kannin’n, bé kpɛ́n su’n niɔn.”​—2 Piɛli 1:16-19.