Zuifu’m be Jɔlɛ difuɛ dandan’m be cicili Zezi wun ndɛ kɛ bé kún i. I sɔ’n ti’n, Zezi ɔli Efraimun lɔ. Klɔ sɔ’n wo Zerizalɛmun i ti su nglo lɔ. Ɔ nin i sɔnnzɔnfuɛ’m be kali lɔ naan i kpɔfuɛ’m b’a wunmɛn i. (Zan 11:54) Afuɛ 33 nun Delɛ cɛn’n mantannin koko. I sɔ’n ti’n, Zezi ɔli Izraɛli nvle’n i nglo lɔ lika’n nun, Galile mɛn’n nun lɔ. Ka naan b’a kun Zezi’n, kpɛ kasiɛn ng’ɔ́ kɔ́ lɔ’n yɛ ɔ o lɛ-ɔ. Kɛ ɔ́ kɔ́’n, ɔ sinnin Samari mɛn’n nun.

Kɛ ɔ́ sínsín klɔ kanngan’m be su ɔ́ kɔ́’n, ɔ toli sran blu. Kokowe o sran sɔ’m be wun. Kokowe wafa wie o lɛ’n, ɔ kpɛkpɛ sran’n i wunnɛn’n. Yɛle kɛ ɔ kpɛkpɛ i sa mma mun annzɛ i ja mma mun annzɛ i sukpɔ mun. (Kalɛ 12:10-12) Ɲanmiɛn Mmla’n waan sran nga tukpacɛ sɔ’n wo i wun’n, ɔ tran aamiɛn. Kpɛkun ɔ kpan se kɛ: “Fiɛn w’a kan min o! Fiɛn w’a kan min o!”​—Saun Yolɛ 13:45, 46.

I sɔ’n ti’n, kokowefuɛ sɔ’m b’a wunngeman Zezi wun lɔ. Sanngɛ be kpannin kekle kpa be seli kɛ: “Zezi, Like klefuɛ, si e aunnvuɛ!” Kɛ Zezi wunnin be’n, ɔ seli be kɛ: “Amun wɔ naan amun ko fa amun wun kle Ɲanmiɛn ɲrun jranfuɛ mun.” (Liki 17:13, 14) Ndɛ nga Zezi kannin’n kle kɛ ɔ nanti Ɲanmiɛn Mmla’n su. Afin Mmla’n waan Ɲanmiɛn ɲrun jranfuɛ mun yɛ be kwla se be nga kokowe o be wun laa’n kɛ b’a yo juejue-ɔ. Kpɛkun kɛ ɔ fɛ i lɛ’n, be kwla fa be wun mantan sran onga mun.​—Saun Yolɛ 13:9-17.

Kokowefuɛ blu’m be lafili su kɛ Zezi kwla yi atrɛ. Ɔ maan, kannzɛ kokowe te o be wun’n, sanngɛ be fali be wun ko kleli Ɲanmiɛn ɲrun jranfuɛ mun. Kɛ mɔ be lafili Zezi su’n ti’n, be ɲannin su ye. Yɛle kɛ kɛ bé kɔ́’n, be wunnin kɛ b’a yo juejue!

Kokowefuɛ’m be nun ngwlan be ɔli, b’a saman be sin kun. Sanngɛ be nun kun m’ɔ ti Samarifuɛ’n i liɛ’n, w’a yoman kɛ be sa. Ɔ sɛli i sin ko kunndɛli Zezi. ?Ngue ti yɛ ɔ yoli sɔ-ɔ? I waan ɔ́ kó lá Zezi i ase, afin ɔ yoli i ye. Bian sɔ’n ‘mɛnnin i nɛn’n su manmannin Ɲanmiɛn.’ Afin ɔ wunnin i wlɛ kɛ Ɲanmiɛn yɛ ɔ yoli maan ɔ yoli juejue-ɔ. (Liki 17:15) Kɛ ɔ wunnin Zezi’n, ɔ utuli i ɲin ase naan w’a lɛ i ase.

Zezi seli sran nga be o i wun lɛ’n be kɛ: “Be sran blu’m be yoli juejue. ?Nɛ́n i-ɔ? ?Yɛ be ngwlan onga’m be o nin? ?Sran uflɛ w’a sɛmɛn i sin naan w’a manman Ɲanmiɛn, saan bian nga kunngba m’ɔ fin nvle uflɛ nun’n?” Yɛ Zezi seli Samarifuɛ’n kɛ: “Jaso kɔ, min su mɔ a lafi’n ti’n, w’a yo juejue.”​—Liki 17:17-19.

Kɛ Zezi yoli kokowefuɛ blu’m be juejue’n, ɔ kleli kɛ Zoova o i sin. Samarifuɛ’n yoli juejue. Kpɛkun ɔ wa nantili nguan m’ɔ leman awieliɛ’n i atin’n su. E nunman blɛ nga mɔ Ɲanmiɛn fali Zezi yoli sran’m be juejue’n nun. Sanngɛ sɛ e lafi Zezi su’n, e kwla nanti nguan m’ɔ leman awieliɛ’n i atin’n su wie. Samarifuɛ’n sili ye. ?Yɛ e li? ?E si ye kɛ i sa wie?