Pere mɛn’n nun lɔ’n, Zezi seli i ndɛ tiefuɛ’m be kɛ: “Be nga be dun mmua’n, be nun kpanngban bé wá ká siɛn, yɛ be nga be ka siɛn’n, bé dún mmua.” (Matie 19:30) I sin’n, ɔ kannin viɲin fie kun su junman difuɛ’m be ndɛ ɲanndra nun, ɔ fa yiyili i ndɛ sɔ’n nun. Ɔ seli kɛ:

“Be kwla fa ɲanmiɛn su lɔ Famiɛn diwlɛ’n be sunnzun awlobo kpɛn kun. Awlobo kpɛn sɔ’n fiteli nglɛmun ndɛ kpa kɛ ɔ́ kó kúnndɛ junman difuɛ naan be ko di junman i viɲin fie’n nun. Kɛ ɔ nin junman difuɛ’m be nuan sɛli su kɛ cɛn ba kun’n, ɔ́ tánnin sran kun denie kun’n, ɔ sunmannin be i viɲin fie’n su lɔ. Dɔ nsan su’n su’n, awlobo kpɛn’n fiteli ekun. Ɔ wunnin sran wie mun ekun, be jinjin gua bo lɛ, be leman junman. Yɛ ɔ seli be kɛ: ‘Amun kusu amun wɔ viɲin fie’n su lɔ, yɛ like ng’ɔ ti su’n, ń fá mán amun.’ Yɛ be ɔli-ɔ. Dɔ nsiɛn su’n nin dɔ ngwlan su’n be su’n, ɔ fiteli ekun yɛ ɔ yoli like kunngba’n. Kasiɛn su’n, dɔ blu-nin-kun (11) su’n su’n, ɔ fiteli yɛ ɔ wunnin sran wie mun ekun, be jinjin gua su lɛ. Ɔ usali be kɛ: ‘?Ngue ti yɛ nglɛmun lele mɔ w’a fa ju nnɔsua yɛ’n, amun jinjin wa mɔ amun diman junman-ɔn?’ Be tɛli i su kɛ: ‘Sran fi w’a faman e junman nun ti-ɔ.’ Ɔ seli be kɛ: ‘Amun kusu amun wɔ viɲin fie’n su lɔ.’”​—Matie 20:1-7.

Kɛ Zezi kɛ́n i ndɛ’n m’ɔ boli “ɲanmiɛn su lɔ Famiɛn diwlɛ’n” nin ‘awlobo kpɛn’n’ be su’n, atrɛkpa i ndɛ tiefuɛ’m be ɲin kpɛnnin Zoova su. Afin Ɲanmiɛn Ndɛ’n se kɛ Zoova le viɲin fie kun. Viɲin fie sɔ’n, yɛle Izraɛli nvle’n. (Jue Mun 80:9, 10; Ezai 5:3, 4) Be nga be dili Aenguɛ laa’n su’n, be yɛ be ti viɲin fie’n i nun junman difuɛ mun-ɔn. Sanngɛ nán laa ndɛ yɛ Zezi su kan-ɔn. Ɔ su kɛn i blɛ’n i su ndɛ.

Sran’m be ɲrun’n, Zuifu’m be Ɲanmiɛn sulɛ wafa’m be su kpɛnngbɛn mɔ Farizifuɛ’m be o be nun wie’n, be yɛ ɔ fata kɛ be di junman man Ɲanmiɛn titi-ɔ. Be ti kɛ be nga be dili junman cɛn ba wunmuan kun’n sa. Be lafi su kɛ cɛn ba wunmuan kun junman’n i nuan sika yɛ bé mán be-ɔ. Yɛle denie kun.

Ɲanmiɛn ɲrun jranfuɛ mun nin Zuifu’m be Ɲanmiɛn sulɛ wafa’m be su kpɛnngbɛn onga’m be waan nvlefuɛ’m be liɛ’n, be suman Ɲanmiɛn kpa. Ɔ ti kɛ nvlefuɛ sɔ’m be diman junman cɛn ba wunmuan kun Ɲanmiɛn i viɲin fie’n nun sa. Zezi i ndɛ’n nun’n, nvlefuɛ sɔ mun yɛle be nga awlobo kpɛn’n fali be “dɔ nsan su’n” kɛ be ko di i viɲin fie’n nun junman’n. (Dɔ nsan su’n yɛle nglɛmun nun dɔ ngwlan su’n.) Annzɛ kusu’n, be yɛle sran kasiɛn nga be ko dili junman dɔ i nsiɛn su nin i ngwlan su ɔ nin i blu-nin-kun (11) su’n. (Dɔ 11 su’n yɛle nnɔsua nun dɔ nnun su’n.)

Asa ekun’n, be waan yasua nin bla nga be su Zezi su’n, “Ɲanmiɛn boli be sannzan.” (Zan 7:49) Sran sɔ’m be sunman lika be ti jue trafuɛ annzɛ fie difuɛ. I sin’n, kɛ afuɛ 29 wá wíe’n, “viɲin fie’n i min’n” sunmannin Zezi kɛ ɔ ko flɛ wun ase kanfuɛ sɔ mun naan be kaci Zezi i sɔnnzɔnfuɛ naan be di junman man Ɲanmiɛn. Wun ase kanfuɛ sɔ mun yɛle junman difuɛ nga be ‘bali kasiɛn su’n,’ mɔ Zezi kannin be ndɛ’n. Be yɛle be nga be fali be dɔ blu-nin-kun (11) su’n.

Kɛ Zezi guɛ́ i ndɛ’n i bo’n, ɔ kannin sa ng’ɔ juli nnɔsua flɔlɔ nun’n i ndɛ. Ɔ seli kɛ: “Kɛ nnɔsua flɔlɔ juli’n, viɲin fie’n i min’n seli sran ng’ɔ nian fie’n su’n kɛ: ‘Flɛ junman difuɛ mun naan fa be akatua’n man be. Bo i bo kasiɛnfuɛ’m be su naan guɛ i bo kliklifuɛ’m be su.’ Kɛ be nga be boli junman’n i bo dɔ blu-nin-kun (11) su’n su’n be bali’n, be tinuntinun be ɲannin denie kun. I sɔ’n ti’n, kɛ be ng’ɔ fali be klikli’n be bali’n, be buli i kɛ be liɛ nga bé ɲɛ́n i’n, ɔ́ trá be nga’m be liɛ’n, sanngɛ be kusu be tuali be denie kunngun. Kɛ be ɲɛnnin i sɔ’n, be ijɔli awlobo kpɛn’n. Be seli kɛ: ‘Be nga be bali kasiɛn su’n be dili junman dɔ kunngba cɛ, sanngɛ e mɔ e dili junman cɛn ba wunmuan kun mɔ e fɛli kpa wia klakla’n bo’n, a yoli maan be nin e sɛ!’ Sanngɛ ɔ tɛli be nun kun su kɛ: ‘Janvuɛ, m’an diman wɔ lufle. E tili e wun aniɛn denie kun su. ?Nɛ́n i-ɔ? Fa ɔ akatua’n naan kɔ. Like nga n mannin wɔ’n, n klo kɛ ń fɛ́ i kunngba’n ń mán be nga be bali kasiɛn’n. ?N leman atin n faman n bɔbɔ min like n yoman like nga n klo’n? ?Annzɛ kusu sran kpa mɔ n ti’n ti’n, ɔ ɲin blo ɔ wiengu wun?’ I wafa kunngba’n, be nga be ka siɛn’n, bé wá dún mmua,  yɛ be nga be dun mmua’n, bé wá ká siɛn.”​—Matie 20:8-16.

Atrɛkpa’n, kɛ Zezi i sɔnnzɔnfuɛ’m be tili i ndɛ sɔ’n, be fali ndɛ wie’m be usali be wun. I wie yɛle kɛ: ?Wafa sɛ yɛ Zuifu’m be Ɲanmiɛn sulɛ wafa’m be su kpɛnngbɛn mɔ be waan be yɛ be “dun mmua’n” be wa ‘kali siɛn-ɔn’? ?Yɛ wafa sɛ yɛ Zezi i sɔnnzɔnfuɛ’m be wa ‘dunnin mmua-ɔ’?

Zezi i sɔnnzɔnfuɛ mɔ Farizifuɛ mun nin be wiengu’m be waan be ‘bali siɛn’n,’ be yɛ be ‘dun mmua’ be ɲannin cɛn ba wunmuan kun junman’n i nuan sika’n niɔn. Kɛ ɔ fɛ i cɛn nga Zezi wuli’n su’n, Ɲanmiɛn yili Izraɛli nvle’n i blo, kpɛkun ɔ kpali sran wie mun fa yoli nvle uflɛ kun. Nvle sɔ’n yɛle “Izraɛli ng’ɔ ti Ɲanmiɛn liɛ’n.” (Galasifuɛ Mun 6:16; Matie 23:38) Zan Batɛmun yofuɛ’n kannin nvle sɔ’n i nunfuɛ’m be ndɛ. Ɔ seli kɛ bé wá fá “Ɲanmiɛn wawɛ’n” bé fá yó be batɛmun. Be nga be ‘bali siɛn’n,’ be yɛ be dun mmua be yoli be batɛmun sɔ’n niɔn. Asa ekun’n, be yɛ be kannin Zezi i ndɛ ‘lele fa juli asiɛ’n i tiwa lɔ-ɔ.’ (Sa Nga Be Yoli’n 1:5, 8; Matie 3:11) Atrɛkpa’n, cɛn sɔ’n nun’n, Zezi i sɔnnzɔnfuɛ’m be wunnin i ndɛ sɔ’n i bo kpa. Ɔ maan be wunnin i wlɛ kɛ Zuifu’m be Ɲanmiɛn sulɛ wafa’m be su kpɛnngbɛn mɔ b’a ‘ka siɛn’n’ bé wá fá be wun ya, yɛ bé klé be yalɛ kpa.