Zezi kpɛli Zurdɛn nzue ba’n. Atrɛkpa’n, ɔ te o Pere mɛn’n nun lɔ. Lika sɔ’n nun lɔ yɛ ɔ kannin bua nin draki nga be mlinnin’n be su ndɛ’n niɔn. Ndɛ nɲɔn sɔ’m be man e afɔtuɛ kunngba’n. Yɛle kɛ, kɛ sa tɛ yofuɛ kun kaci i nzuɛn’n, m’ɔ fɛ i wun man Ɲanmiɛn’n, ɔ fata kɛ i sɔ’n yo e fɛ. Sanngɛ Farizifuɛ mun nin mmla klɛfuɛ’m be bumɛn i sɔ wie. Afin kɛ Zezi sɔli sa tɛ yofuɛ’m be nun’n, i sɔ’n yoli be ya. ?Be fali Zezi i ndɛ sɔ mun tuli be wun fɔ? ?Wafa nga Ɲanmiɛn bu sa tɛ yofuɛ nga be kaci be nzuɛn’n, be wunnin i wlɛ? Zezi kannin ndɛ kun ekun ɲanndra nun fa yiyili wafa nga Ɲanmiɛn bu sran sɔ mun’n nun.

Ɲanndra nun ndɛ sɔ’n nun’n, Zezi kannin siɛ kun m’ɔ le ba yasua nɲɔn’n i ndɛ. Ba yasua kaanfuɛ’n yɛ ɔ fɛli i ndɛ tiefuɛ’m be ɲin sieli i su kpa-ɔ. I Farizifuɛ mun-o, i mmla klɛfuɛ mun-o, i be nga be o lɛ mun-o, be kwlaa be kwla wunnin ndɛ nga Zezi kɛnnin i ba kaanfuɛ’n i su’n, i wlɛ. Sanngɛ siɛ nin i wa kaklaka’n be su ndɛ nga Zezi kannin’n, ɔ ti cinnjin wie. Afin like nga be yoli’n man e afɔtuɛ. I sɔ’n ti’n, maan e fa e ɲin e sie i ndɛ nga Zezi kɛnnin i be sran nsan sɔ’m be su’n, i su kpa.

Kɛ Zezi bó i ndɛ’n i bo’n, ɔ seli kɛ: “Bian kun le ba yasua nɲɔn. Be nun kaan’n seli i si kɛ: ‘Baba, fa ninnge nga be ko yo min liɛ’n man min.’ Yɛ siɛ’n cɛcɛli i ninnge’m be nun mannin be-ɔ.” (Liki 15:11, 12) Maan e sie i nzɔliɛ kɛ nán kɛ ba yasua kaan’n i si wuli ti yɛ i waan be fɛ i aja like liɛ’n be mɛn i-ɔ. Afin kɛ ɔ́ sé sɔ’n, nn i si te o nguan nun. Sanngɛ ba’n kunndɛ kɛ be fɛ i aja like liɛ’n be mɛn i kpɛkun. I liɛ’n, ɔ́ fá yo like ng’ɔ klo’n. ?I sin’n, sa benin yɛ ɔ juli-ɔ?

Zezi waan: “Kɛ ɔ dili le nɲɔn kun’n, ba’m be nun kaan’n fɛli i ninnge’m be kwlaa, kpɛkun ɔ tuli ajalɛ. Ɔ ɔli mɛn wie nun mmuammua kpa. Ɔ ko dili mɛn, ɔ yoli i ninnge’m be wanzo.” (Liki 15:13) Kɛ ɔ yo naan ba kaan’n kɛ i si i awlo lɛ naan i si niɛn i lika’n, w’a yoman sɔ. Ɔ ɔli mɛn uflɛ nun. Mɛn sɔ’n nun lɔ’n, ba’n yoli i sika’n i wanzo. Yɛle kɛ ɔ fɛli i sika’n kwlaa fa kunndɛli bla. Ɔ maan ɔ wa dili yalɛ dan kpa.

 Zezi seli ekun kɛ: “Kɛ ɔ wieli i ninnge’m be kwlaa saci’n, awe dan kpa wa kpɛnnin mɛn sɔ’n nun. Kpɛkun i sa miannin. Ɔ maan ɔ fɛli i wun mantannin mɛn sɔ’n i nunfuɛ kun bɔbɔ. Sran sɔ’n seli i kɛ ɔ wɔ i fie’n su lɔ ko niɛn i kɔkɔti’m be su. Ɔ kunndɛli kɛ ɔ́ dí ninnge nga kɔkɔti’m be di’n wie, sanngɛ sran fi w’a mɛnmɛn i like.”​—Liki 15:14-16.

Ɲanmiɛn Mmla’n nun’n, kɔkɔti’m be ti like fiɛn. Sanngɛ kɛ mɔ ba sɔ’n lemɛn i yowlɛ’n ti’n, ɔ ko niannin be su. Asa ekun’n, awe kunnin i dan kpa. I sɔ’n ti’n, ɔ kunndɛli kɛ ɔ́ dí aliɛ nga kɔkɔti’m be di’n wie. Kɛ ɲrɛnnɛn’n tinnin ba’n su kpa’n, “ɔ wa buli akunndan.” Ɔ seli kɛ: “Min si i junman difuɛ’m be le aliɛ kpanngban kpa be di. Kusu nn awe’n yɛ ɔ su kun min wa yɛ! Ń má jáso ń kɔ́ min si sin. Kpɛkun ń sé i kɛ: ‘Baba, n fɔnnin Ɲanmiɛn m’ɔ o nglo lɔ’n i wun, yɛ n fɔnnin ɔ wun wie. Kɛ be se kɛ n ti ɔ wa’n, min nin i sɔ’n fataman kun. Fa min yo kɛ ɔ junman difuɛ’m be nun kun sa.’” Yɛ ɔ jaso ɔli i si sin-ɔn.​—Liki 15:17-20.

?Kɛ ba’n sɛli i sin’n, ngue yɛ i si yoli-ɔ? ?Ɔ fali ya kpɛkun ɔ kpankpannin ba’n su? ?Ɔ seli i kɛ w’a faman ajalɛ kpa? ?Ɔ sɔli ba’n i nun klanman annzɛ w’a sɔmɛn i nun klanman? ?Sɛ wɔ yɛ a ti ba sɔ’n i si’n, ngue yɛ á yó-ɔ? ?Sɛ ɔ ti kɛ ɔ bɔbɔ ɔ klun ba yɛ ɔ tuli awlo’n nun’n, ngue yɛ á yó-ɔ?

Zezi kannin wafa nga ba’n i si’n i wun yoli i’n, ɔ nin like ng’ɔ yoli’n be ndɛ. Ɔ seli kɛ: “Yɛ [ba’n] jaso ɔli i si sin-ɔn. Kɛ ɔ́ bá mmua lɔ’n, i si wunnin i. Ɔ yoli i annvɔ naan w’a wanndi w’a ko tɔ i nun.” (Liki 15:20) Kannzɛ siɛ’n tili i kɛ i wa’n fɛli i sika’n dili mɛn’n, sanngɛ kɛ ɔ sɛli i sin’n, ɔ sɔli i nun klanman. Zuifu’m be Ɲanmiɛn sulɛ wafa’m be su kpɛnngbɛn’m be se be wun kɛ be si Zoova naan i yɛ be su i-ɔ. ?Sanngɛ kɛ sran kun kaci i akunndan’n, wafa nga e Si m’ɔ o ɲanmiɛn su lɔ’n i wun yo i’n, be wun i wlɛ? ?Be wun i wlɛ kɛ akunndan nga Zoova bu’n, i kunngba’n yɛ Zezi bu-ɔ?

Ba’n i si’n ti akunndanfuɛ. Ɔ maan atrɛkpa kɛ ɔ wunnin i wa’n, ɔ wunnin i wlɛ kɛ sa ng’ɔ yoli’n w’a yo i nsisɔ. Asa ekun’n, ba’n i si’n ti sran klofuɛ. I sɔ’n ti’n, ɔ ko tɔli i wa’n i nun. I sɔ’n wlali ba’n i fanngan naan w’a kan sa ng’ɔ yoli’n i ndɛ w’a kle i. Zezi waan: “Ba’n seli i kɛ: ‘Baba, n fɔnnin Ɲanmiɛn m’ɔ o nglo lɔ’n i wun, yɛ n fɔnnin ɔ wun wie. Kɛ be se kɛ n ti ɔ wa’n, min nin i sɔ’n fataman kun.’”​—Liki 15:21.

Sanngɛ siɛ’n seli i junman difuɛ mun kɛ: “Amun wɔ ndɛndɛ ko fa tralɛ tɛnndɛn kun. Amun fɛ i kpafuɛ’n wlɛ i wun. Kpɛkun amun fa sama ti nga kun wlɛ i sa, naan amun fa ngbabua wlɛ i ja. Amun fa nannin nga w’a lo’n, be bla wie. Amun kun i naan e fa di cɛn. Afin min wa yasua nga wuli, sanngɛ w’a ɲan nguan ekun. Ɔ mlinnin, sanngɛ m’an wun i.” Yɛ be boli “cɛn dilɛ bo-ɔ.”​—Liki 15:22-24.

Kɛ ɔ́ yó sɔ’n, nn bian’n i wa kpɛn’n wo fie su lɔ. Zezi waan: “Kɛ ɔ́ bá klɔ m’ɔ juli awlo’n i wun koko lɛ’n, ɔ tili sran’m be ngan. Be su to jue, yɛ be su si able. Ɔ maan ɔ flɛli awlo nun junman difuɛ’m be nun kun, naan w’a usɛ i like nga ti yɛ be to jue mɔ be si able’n. Ɔ seli i kɛ: ‘Ɔ niaan bian bali. Ɔ maan ɔ si kunnin nannin nga w’a lo kpafuɛ’n. Afin w’a sɛ i sin, yɛ ɔ ti juejue.’ Yɛ ɔ fali ya-ɔ. I waan ɔ wluman awlo lɔ. I si bali wa kpɛtɛli i. Ɔ seli i si kɛ: ‘N tu min klun n di junman n man wɔ i afuɛ kpanngban yɛ. M’an yoman ɲin  kekle ɔ su cɛn ba kun sa le. Ɔ nin i sɔ ngba’n, a nin-a manman min boli ba kun sa le kɛ e nin min janvuɛ mun e di. Sanngɛ kɛ ɔ wa nga m’ɔ nin tekle bla’m be yoli ɔ ninnge’m be wanzo’n ɔ bali cɛ’n, a kunnin nannin nga w’a lo’n, a fa mɛnnin i.’”​—Liki 15:25-30.

?Wan mun yɛ be yoli kɛ bian’n i wa kpɛn’n sa-ɔ? ?Yɛle kɛ, kɛ Zezi buli nvlefuɛ mun nin sa tɛ yofuɛ’m be sran m’ɔ sili be aunnvuɛ’n, wan mun yɛ ɔ yoli be ya-ɔ? Mmla klɛfuɛ mun nin Farizifuɛ mun-ɔn. Be nzuɛn tɛ’n ti yɛ Zezi fali sunnzun ase sɔ’n niɔn. Afin be waan ɔ fataman kɛ ɔ sɔ sa tɛ yofuɛ’m be nun. Ndɛ sɔ’n ti e kwlaa e liɛ wie. Yɛle kɛ sran ng’ɔ ijɔ i konviabo afin Ɲanmiɛn ti aunnvuɛ sifuɛ’n, ɔ fata kɛ ɔ fa ndɛ sɔ’n tu i wun fɔ.

Kɛ Zezi guɛ́ i ndɛ’n i bo’n, ɔ kannin like nga siɛ’n yoli naan i wa kpɛn’n w’a kaci i akunndan’n i ndɛ. Zezi waan siɛ’n seli i kɛ: “Min wa, a nin min o wa cɛn kwlakwla. Min ninnge’m be kwlaa be ti ɔ liɛ. Sanngɛ ɔ fata kɛ e di cɛn andɛ. Afin ɔ niaan bian’n wuli, sanngɛ w’a ɲan nguan. Ɔ mlinnin, kpɛkun y’a wun i.”​—Liki 15:31, 32.

Zezi w’a kanman like nga ba kpɛn’n yoli i kasiɛn su’n i ndɛ. Sanngɛ Ɲanmiɛn Ndɛ’n waan kɛ Zezi wuli m’ɔ be cɛnnin i nguan’n, “Ɲanmiɛn ɲrun jranfuɛ kpanngban kpa be wa lafili su wie.” (Sa Nga Be Yoli’n 6:7) Kɔlɛ be nga be tili ba ng’ɔ mlinnin’n i su ndɛ nga Zezi kannin’n be o be nun wie. Ɔ maan sran sɔ’m be wa buli akunndan, yɛ be kacili be nzuɛn’n naan b’a fa be wun b’a man Ɲanmiɛn.

Ɔ fata kɛ Zezi i sɔnnzɔnfuɛ’m be fa afɔtuɛ cinnjin nga be o ndɛ sɔ’n nun’n be su. Afɔtuɛ sɔ’n i klikli’n yɛle kɛ, nán maan e wɔ “mɛn wie nun mmuammua kpa” kɛ e ko di mɛn. Sanngɛ e nin e niaan mun e su Ɲanmiɛn likawlɛ titi. Afin Ɲanmiɛn klo e yɛ ɔ nian e lika. Sɛ e yo sɔ’n, é klé kɛ e ti ngwlɛlɛfuɛ.

Afɔtuɛ’n i nɲɔn su’n, yɛle kɛ sɛ e kpɔcili Ɲanmiɛn’n, maan e kan e wun ase naan e sa e sin i wun ndɛndɛ. I liɛ’n, i klun jɔ́ e wun ekun.

Ba ɲin keklefuɛ sɔ’n i si’n sɔli i nun klanman, yɛ ɔ yacili sa ng’ɔ yoli’n cɛli i. Sanngɛ, i ɲrun kpɛn’n i liɛ’n, w’a yoman kɛ i si sa. W’a yaciman sa nga i niaan’n yoli’n w’a cɛmɛn i. I sɔ’n man e afɔtuɛ kun ekun. Yɛle kɛ, sɛ e niaan wie kpɔci Ɲanmiɛn naan i sin ɔ kaci i akunndan’n, kpɛkun ɔ ‘sɛ i sin Ɲanmiɛn wun’ ekun’n, ɔ fata kɛ e yaci i wun sa’n e cɛ i. Yɛ maan e sɔ i nun klanman. Asa ekun’n, ɔ fata kɛ e di aklunjuɛ. Afin e niaan ng’ɔ ‘wuli’n w’a ɲan nguan ekun,’ yɛ e niaan ng’ɔ ‘mlinnin’n, y’a wun i.’