Biblu’n nun ndɛ mɔ be kwla uka e’n:

• San 22:​17-22—Zoova seli kɛ nnɛn nga bé fá yí tɛ bé mɛ́n i’n, ɔ fata kɛ “ɔ yo kpa” yɛle kɛ nán maan lɛ trɛn i wun. Ndɛ nga be kacili i kɛ “ɔ yo kpa” ɔ nin Ebre nun ndɛ kun mɔ be fa kan “seiin nantilɛ” ndɛ’n, be kɔ likawlɛ. I sɔ’n kle kɛ, kɛ be se kɛ be nanti seiin’n, i bo’n yɛle kɛ be fa be wun man Zoova mlɔnmlɔn yɛ be su i kunngba cɛ.

• Zɔb 1:​1, 4, 5, 8; 2:3—Zɔbu i su ndɛ’n kle kɛ sɛ sran kun kunndɛ kɛ ɔ́ nánti seiin’n, ɔ fata kɛ i ɲin yi Zoova kpa, ɔ fɛ i awlɛn kwlaa su i, yɛ ɔ kpalo ninnge nga be ti tɛ Ɲanmiɛn ɲrun’n.

Biblu’n nun ndɛ mɔ be kwla uka e’n:

• Zɔb 31:​1-11, 16-33—Like ng’ɔ ukali Zɔbu naan w’a nanti seiin titi’n, yɛle kɛ ɔ miɛnnin i ɲin naan w’a yoman sa sukusuku. Ɔ yoli i wiengu’m be ye yɛ ɔ buli be sran. Asa’n, ɔ suli Zoova kpa titi, w’a sɔman amuin le yɛ w’a kloman aɲanbeun ninnge mun.

• Dan 1:​6-21—Kannzɛ Daniɛli nin i janvuɛ nsan’m be o be nga be suman Zoova’n be afiɛn’n, sanngɛ be nantili seiin titi. Yɛle kɛ b’a diman aliɛ nga Zoova i mmla bu be fɔ’n.