I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 112: Be mmeli’n bubuli Malti lɔ

Ndɛ 112: Be mmeli’n bubuli Malti lɔ

AN NIAN! Sa w’a ɲan mmeli nga nunfuɛ mun! Mmeli’n su bubu! ?Amun wun sran nga b’a tɔ nzue nun lɛ’n? Be wie’m b’a kwla kpɛn cenje’n su wa. ?Pɔlu o be nun wie? Amun e nian sa nga ɔ juli i su’n.

Be nga be fin mmeli’n nun fiteli’n.

Nán amun wla fi su kɛ Pɔlu dili afuɛ nɲɔn bisua’n nun Sezare lɔ. Kɛ ɔ yoli sɔ’n, be fali Pɔlu nin bisuafuɛ wie mun wlali mmeli kun nun naan bé fá be kɔ́ Rɔmu. Kɛ bé sín Krɛti mɛn’n mɔ nzue sin yiɛ i’n i wun lɛ’n, seke dan wie wa tɔli be su. Aunmuan sɔ’n m’ɔ fita dan’n ti’n maan be nga be kan mmeli’n be kwlaman like fi yo. Be kwlá wunman wia’n annzɛ nzraama mun kɔnguɛ. Ɔ maan i agualiɛ su’n, kɛ be dili cɛn wie mun mmeli’n nun’n, be wie fi be lafiman su kun kɛ bé kwlá fíte nun.

Kpɛkun Pɔlu jaso seli kɛ: ‘Amun nun wie fi su wuman, saan mmeli’n i kunngba cɛ yɛ ɔ́ sáci ɔ. Andɛ kɔnguɛ Ɲanmiɛn i anzi kun bali min wun yɛ ɔ seli min kɛ: “Nán srɛ kun ɔ Pɔlu! Saan á jú Sezali ja su lɔ. Yɛ Ɲanmiɛn wá dé be nga a nin be o mmeli’n nun’n be kwlaa.”’

Kɛ aunmuan dan sɔ’n sinnin’n, i cɛn ba blu nin nnan su, kɔnguɛ afiɛn’n, be nga be o mmeli’n nun’n be bu i kɛ be su wa to asiɛ wie! Kɛ srɛ kun be mɔ be bu i kɛ bé wá fú yɛbuɛ wie su ti’n, be toli mmeli’n i blalɛ nnan mɔ be fa jrɛn i’n guali nzue nun. Kɛ i lika cɛnnin’n be wunnin asiɛ wie. Be waan bé fá mmeli’n lele bé fá jú cenje’n su lɔ’n.

Kɛ bé mántan asiɛ’n i wun koko lɔ’n, mmeli’n mlɔnnin aunɲan nun. Jenvie’n m’ɔ bo gua mmeli’n su kekle’n ti’n, mmeli’n bubuli. Sonja su kpɛn’n seli kɛ: ‘Be nga be si nzue wɛ’n, maan be dun mmua tɔ nzue nun wɔ cenje’n su lɔ, yɛ be onga’n be uti waka bue nin mmeli buebue’m naan mmeli’n fa be wɔ.’ I sɔ yɛ be niannin su be yoli ɔ. Kɛ be yoli sɔ’n maan sran ya nɲɔn ableso nin nsiɛn (276) nga be o mmeli’n nun’n, be kwlaa be fiteli nun kɛ nga anzi’n fa kannin’n sa.

Mɛn nga nzue sin yiɛ i mɔ be fiteli su’n, be flɛ i kɛ Malti. Lɛfuɛ’m be klun ti ufue kpa, be niannin be kwlaa nga be fin mmeli’n nun lɔ fiteli’n be lika. Kɛ lika’n wa yoli kpa’n, be fali Pɔlu wlɛli i mmeli uflɛ kun nun ɔli Rɔmu.

Sa Nga Be Yoli’n 27:1-44; 28:1-14.



Kosan mun

  • ?Kɛ mmeli nga Pɔlu o nun’n, ɔ́ sín mɛn nga nzue sin yiɛ i’n mɔ be flɛ i Krɛti i wun lɛ’n, ngue sa yɛ ɔ juli ɔ?
  • ?Ngue ndɛ yɛ Pɔlu kan kle be nga be o mmeli’n nun’n niɔn?
  • ?Ɔ yo sɛ yɛ mmeli’n bubuli ɔ?
  • ?Ajalɛ benin yɛ sonja su kpɛn’n seli kɛ be fa ɔ? ?Kpɛkun sran nɲɛ yɛ be fiteli nun ɔn?
  • ?Be flɛ mɛn nga nzue sin yiɛ i’n mɔ be ko fiteli su’n sɛ? ?Yɛ kɛ lika’n yoli kpa’n, ngue yɛ be yoli Pɔlu ɔ?

Kosan nga be klɛ uka su’n

  • Kanngan Sa Nga Be Yoli’n 27:1-44 nun.

    ?Wafa sɛ yɛ kɛ e kanngan Pɔlu i Rɔmu kɔlɛ ndɛ’n nun’n, ɔ wla e Biblu’n nun nanwlɛ ndɛ mɔ e lafi su’n i fanngan kpa ɔ? (Yol. 27:16-19, 27-32; Lik 1:3; 2 Tim. 3:16, 17)

  • Kanngan Sa Nga Be Yoli’n 28:1-14 nun.

    ?Sɛ Maltifuɛ nga be timan Klistfuɛ bɔbɔ’n be yoli Pɔlu nin be nga be tɔli nzue nun’n ‘be kpa m’ɔ leman wunsu’n,’ ngue yɛ ɔ fata kɛ i sɔ’n, ɔ su Klistfuɛ’m be bo naan be yo ɔ? ?Yɛ ngue nun yɛ i sɔ yolɛ’n ti cinnjin ɔn? (Yol. 28:1, 2; Ebr. 13:1, 2; 1 Piɛ. 4:9)