I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 95: Wafa nga Zezi kle like’n

Ndɛ 95: Wafa nga Zezi kle like’n

CƐN kun’n, Zezi seli bian kun kɛ ɔ fata kɛ ɔ klo i wiengu. Bian sɔ’n usali Zezi kɛ: ‘?Wan yɛ ɔ ti min wiengu’n niɔn?’ Zezi si bian’n i klun angunndan’n. Bian sɔ’n bu i kɛ be nga ɔ nin be fin nvle kunngba’n, annzɛ be nga ɔ nin be su Ɲanmiɛn likawlɛ’n, be yɛ be ti i wiengu’n niɔn. I sɔ ti maan e nian ndɛ nga Zezi kannin fa tɛli i su’n.

Zezi i like klelɛ sunman lika nun’n, ɲanndra yɛ ɔ fa kle like ɔ. I sɔ’n liɛ’n yɛ ɔ nin bian’n be su yo ɔ. Ɔ su kan Zuifu kun nin Samarifuɛ kun be ndɛ. Y’a dun mmua y’a wun i wlɛ kɛ Zuifu’m be kloman Samarifuɛ’m be sa. Sanngɛ ndɛ nga Zezi kan’n yɛ:

Cɛn kun Zuifu kun fin Zerizalɛmu su jra kɔ Zeriko. Ɔ ko tɔli kodiawiefuɛ’m be sa nun. Be deli i bo sika wunmuan’n, be boli i lele ɔ ka kan naan w’a wu, yɛ be yacili i lɛ be ɔli ɔ.

I sin’n, Ɲanmiɛn ɲrun jranfuɛ Zuifu kun su sin atin kunngba sɔ’n su. Ɔ wunnin bian sɔ’n. ?Ngue yɛ amun bu i kɛ ɔ yoli ɔ? Aii, w’a sɛn i wun atin’n i bue kun lɔ w’a ɔ lalaa. Kpɛkun Ɲanmiɛn sufuɛ kun m’ɔ ti Levifuɛ’n i kusu sinnin lɛ. ?Ɔ jrannin? Ɔ si’ɛ mlɔnmlɔn, w’a jranman w’a ukaman bian’n. Ɲanmiɛn ɲrun jranfuɛ’n nin Levifuɛ’n yɛ be o foto’n su lɛ be su jra be kɔ ja ngua lɔ lɛ.

Sanngɛ amun nian sran nga ɔ o bian nga kodiawiefuɛ’m be boli i’n, i wun lɛ’n. Samarifuɛ kun ɔn. Ɔ su uka Zuifu sɔ’n. Ɔ fali ayre wie guɛli i bian’n i kannin’m be nun. I sin’n, ɔ fali Zuifu bian sɔ’n ɔli lika kun mɔ be kwla niɛn i lika lɔ’n naan w’a yo juejue’n i nun.

Samari bian’n m’ɔ ti sran kpa’n.

Kɛ Zezi wieli i ndɛ’n kan’n, ɔ usali bian nga ɔ nin i be ijɔ’n kɛ: ‘?Be sran nsan sɔ’n, ɔ ɲrun’n, be nun onin yɛ ɔ niannin bian m’ɔ tɔli kodiawiefuɛ’m be sa nun’n i lika kɛ i wiengu sa ɔ? ?Ɲanmiɛn ɲrun jranfuɛ’n, annzɛ Levifuɛ’n, annzɛ kusu Samarifuɛ’n niɔn?’

Bian’n waan: ‘Samarifuɛ’n niɔn, afin ɔ sili bian nga kodiawiefuɛ’m be boli i’n, i aunnvuɛ.’

Zezi seli i kɛ: ‘Ɔ kusu kɔ, yo i kunngba sɔ’n wie.’

?Amun kloman wafa nga Zezi fa kleli like’n? ?Sɛ e fa e ɲin e sie ndɛ nga Zezi kɛnnin i Biblu’n nun su’n, e kwla suan like kpanngban kpa, nɛ́n i ɔ?

Lik 10:25-37.



Kosan mun

  • ?Kosan benin yɛ bian’n usali Zezi ɔ, yɛ ngue ti ɔ?
  • ?Ngue yɛ Zezi fa kle like ɔ? ?Yɛ ngue yɛ y’a dun mmua y’a wun i wlɛ Zuifu nin Samarifuɛ’m be lika ɔ?
  • ?Ndɛ nga Zezi kɛnnin i lɛ nun’n, ngue sa yɛ ɔ ɲannin Zuifu nga ɔ fin Zerizalɛmu su jra kɔ Zeriko’n niɔn?
  • ?Kɛ Ɲanmiɛn ɲrun jranfuɛ nin Levifuɛ’m be sinnin lɛ’n, ngue yɛ be yoli ɔ?
  • ?Desɛn’n su lɛ’n, wan yɛ ɔ su uka Zuifu nga kodiawiefuɛ’m be boli i’n niɔn?
  • ?Kɛ Zezi wieli i ndɛ kan’n, kosan benin yɛ ɔ usali bian’n niɔn, yɛ bian’n tɛli su sɛ?

Kosan nga be klɛ uka su’n

  • Kanngan Lik 10:25-37 nun.

    ?Kɛ ɔ ko yo naan w’a tɛman kosan’n su trele’n, wafa sɛ yɛ Zezi ukali mmla sifuɛ kun naan w’a bu ndɛ nga be kan be’n be sin ɔn? (Lik 10:26; Mat. 16:13-16)

    ?Be nga be bu i kɛ ninnge nga Zezi yo’n, ɔ ti mmla fɔnlɛ’n, wafa sɛ yɛ ɔ fali ɲanndra mun fa tɛli be su ɔ? (Lik 10:36, 37; 18:9-14; Tit 1:9)