I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 92: Zezi cɛnnin be nga be wuli’n

Ndɛ 92: Zezi cɛnnin be nga be wuli’n

TALUA kaan nga amun wun i yɛ’n, ɔ le afuɛ blu nin nɲɔn (12). Zezi le i sa nun, yɛ i nin’n nin i si’n be jin i wun lɛ. ?Amun si like ti mɔ be o aklunjuɛ nun’n? Amun e nian.

Zezi w’a cɛn Zairisi i wa bla’n.

Talua kaan sɔ’n, i si’n ti sran dan kun, be flɛ i Zairisi. Cɛn kun’n i wa bla sɔ’n wa tɔli tukpaciɛ, kpɛkun yɛ be ko lɛli i bɛ’n su ɔ. Sanngɛ tukpaciɛ’n w’a kanman ase, ɔ tin i su kpa ekun. Ɔ maan ngokɔɛ nun yɛ Zairisi nin i yi be o siɛn’n niɔn; afin tukpaciɛ’n su kun be wa bla kaan’n be ɲin bo lɛ. Talua kaan sɔ’n ti be wa ba kunngba cenje. I sɔ’n ti’n, Zairisi ɔli Zezi kunndɛlɛ. Ɔ tili Zezi i abonuan sa nga ɔ su yo be’n, be ngan.

Kɛ Zairisi wún Zezi’n, nn sran kpanngban kpa b’a bo b’a sin b’a yiɛ i. Sanngɛ Zairisi wluli sran kpanngban sɔ’m be afiɛn lele ko kotoli Zezi i bo kplo. Ɔ srɛli i kɛ: ‘N wa bla ɔ su wu kpa, yaci, bla naan yo i juejue.’ Zezi seli i kɛ ɔ́ bá.

Kɛ bé kɔ́’n, nn sran’m bé mían be. Zezi jrannin kpɛ kunngba bi. Ɔ usa kɛ: ‘?Wan yɛ ɔ kannin min ɔn? Zezi wunnin kɛ wunmiɛn wie finnin i nun fiteli, i sɔ’n ti yɛ ɔ sili kɛ sran w’a kɛn i ɔ. ?Sanngɛ wan ɔn? Bla kun ɔn. Bla sɔ’n, i tukpaciɛ’n o i su i afuɛ blu nin nɲɔn (12) yɛ. Ɔ wunngeli Zezi wun lɔ, ɔ kɛnnin i tralɛ’n, kpɛkun yɛ i tukpaciɛ’n wieli ɔ.

I sɔ’n wlali Zairisi i fanngan, afin ɔ kwla wunnin kɛ Zezi i sran juejue yolɛ’n timan kekle. Sanngɛ, ngaliɛ difuɛ kun a ba. Ɔ seli Zairisi kɛ: ‘Ɔ wa’n w’a wu, nán kle Zezi yalɛ kun.’ Zezi tili, yɛ ɔ seli Zairisi kɛ: ‘Nán srɛ kun wɔ, ɔ́ wá yó juejue.’

Kɛ ɔ juli Zairisi i awlo lɔ’n, sran’m be kwlaa be su sun, be bo awuyomo. Yɛ Zezi seli kɛ: ‘Nán an sun, w’a wuman, lafilɛ yɛ ɔ su lafi ɔ.’ Sanngɛ, be srili Zezi yɛ be yoli i finfin, afin be si kɛ ɔ wuli.

Kpɛkun, Zezi fali ba bla kan’n i si’n nin i nin’n, ɔ nin i akoto’m be nun nsan, yɛ be wluli sua ba nga bakan’n la nun lɔ’n nun ɔn. Ɔ trali ba’n i sa’n yɛ ɔ seli i kɛ: ‘Talua kan jaso!’ Yɛ bakan’n cɛnnin nguan kɛ nga amun fa wun i wa’n sa ɔ. Kpɛkun yɛ ɔ jasoli nantili ɔ! Like nga ti yɛ i si’n nin i nin’n be o aklunjuɛ dan kpa nun’n yɛ ɔ o lɛ ɔ.

Nán sran nga yɛ Zezi cɛnnin i nguan klikli’n niɔn. Sran klikli nga ɔ cɛnnin i nguan’n mɔ Biblu’n kɛn i ndɛ’n, yɛle angbeti bla kun m’ɔ tran Nain klɔ’n su’n, i wa yasua’n. I sin’n, Zezi cɛnnin Marti nin Mali be niaan bian Lazali i nguan. Kɛ Ɲanmiɛn maan Zezi wá dí famiɛn’n, Zezi cɛ́n sran kpanngban kpa nga be wuli’n be nguan. ?I sɔ’n yoman e fɛ?

Lik 8:40-56; 7:11-17; Zan 11:17-44.



Kosan mun

  • ?Wan yɛle talua kan nga ɔ o desɛn’n su lɛ i si’n, yɛ ngue ti yɛ awlabɔɛ o bian’n nin i yi’n be su ɔ?
  • ?Kɛ Zairisi wunnin Zezi’n, ngue yɛ ɔ yoli ɔ?
  • ?Kɛ Zezi kɔ Zairisi i awlo lɔ’n ngue sa yɛ ɔ juli ɔ, jasin benin yɛ be wa bo kleli Zairisi ɔ?
  • ?Ngue ti yɛ sran nga be o Zairisi i awlo nun lɔ’n be srili Zezi ɔ?
  • ?Kɛ Zezi fali akoto nsan mun’n, ɔ nin ba bla kan’n i si’n nin i nin’n mɔ be wluli talua kan’n i sin lɔ’n, ngue yɛ Zezi yoli ɔ?
  • ?Wan mun yɛ Zezi cɛnnin be nguan ekun ɔn, yɛ ngue yɛ i sɔ’n yi i nglo ɔ?

Kosan nga be klɛ uka su’n

  • Kanngan Lik 8:40-56 nun.

    ?Wafa sɛ yɛ Zezi sili bla nga mannza tɛnndɛn o i wun’n i aunnvuɛ ngwlɛlɛ su ɔ? ?Yɛ wafa sɛ yɛ andɛ Klistfuɛ asɔnun kpɛnngbɛn’m be kwla fa ajalɛ sɔ’n su ɔ? (Lik 8:43, 44, 47, 48; Sau. 15:25-27; Mat. 9:12, 13; Kol. 3:12-14)

  • Kanngan Lik 7:11-17 nun.

    ?Ngue ti yɛ ndɛ nga Zezi kan kleli Nain lɔ angbeti bla’n, ɔ kwla fɔnvɔ be nga be awlɛn su sran kun w’a wu’n niɔn? (Lik 7:13; 2 Kor. 1:3, 4; Ebr. 4:15)

  • Kanngan Zan 11:17-44 nun.

    ?Wafa sɛ yɛ Zezi kleli kɛ sɛ e awlɛn su sran kun wu’n e kwla e sun i ɔ? (Zan 11:33-36, 38; 2 Samiɛl 19:1; 19:2-5)