I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 91: Zezi kan Ɲanmiɛn ndɛ oka’n su

Ndɛ 91: Zezi kan Ɲanmiɛn ndɛ oka’n su

AMUN nian, Zezi yɛ ɔ ti yɛ. Ɔ su kle sran ngba nga’m be like Galile oka kun su. I sɔnnzɔnfuɛ mun yɛle nga be ti i wun koko lɛ’n. Ɔ fali be nun blu nin nɲɔn (12) naan be kaci i akoto. Akoto’m be ti Zezi i liɛ kɛ i sɔnnzɔnfuɛ ngunmin mun sa. ?Amun si be dunman?

Zezi su kan Ɲanmiɛn ndɛ kle sran mun.

Be dunman mun yɛ: Simɔn Piɛli nin i niaan bian Andre. Kpɛkun, Zaki nin i niaan bian Zan. Be flɛ kun ekun kɛ Zaki, yɛ be flɛ kun ekun kɛ Simɔn. Akoto’m be nun sran nɲɔn suan Zida. Zida sɔ mun’n, be nun kun yɛle Zida Iskariɔti, yɛ kunfuɛ’n, be flɛ i kɛ Tade. Kpɛkun, Filipu nin Natanaɛli (mɔ i dunman ekun yɛle Batelemi), yɛ Matie ɔ nin Toma.

Kɛ be fin Samari lɔ be bali’n yɛ Zezi boli i jasin fɛ’n bolɛ’n bo ɔ. Ɔ se sran mun kɛ: ‘Ɲanmiɛn Sielɛ Blɛ’n w’a mantan.’ ?Amun si Sielɛ Blɛ sɔ’n? Sielɛ Blɛ sɔ’n, ɔ ti Ɲanmiɛn i awa. Zezi yɛ ɔ ti i su famiɛn’n niɔn. Sielɛ Blɛ sɔ’n o ɲanmiɛn su lɔ, yɛ ɔ́ yó maan alaje’n trán asiɛ’n su. Ɲanmiɛn i Sielɛ Blɛ’n yó maan asiɛ wunmuan’n káci mɛn klanman.

I sɔ Sielɛ Blɛ’n, i ndɛ yɛ Zezi su kan kle sran mun lɛ ɔ. Ɔ seli be kɛ: ‘Wafa nga ɔ fata kɛ amun srɛ’n, yɛ: ‘E si mɔ a o ɲanmiɛn su lɔ’n, maan sran’m be wun i wlɛ kɛ wɔ ngunmin yɛ a ti Ɲanmiɛn’n niɔn. Maan ɔ Sielɛ Blɛ’n ju. Maan e mɔ e o asiɛ’n su wa’n e yo ɔ klun sa kɛ be mɔ be o ɲanmiɛn su lɔ’n be yo’n sa.’ Sran sunman lika be flɛ srɛlɛ sɔ’n kɛ ‘Srɛlɛ nga Zezi kleli i sɔnnzɔnfuɛ mun’n.’ ?Amun si srɛlɛ sɔ’n i wunmuan’n?

Zezi su kle sran mun ekun wafa nga ɔ fata kɛ be nin be wiengu be tran’n. Ɔ se be kɛ ‘like kwlaa nga amun klo kɛ sran yo man amun’n, an yo i kunngba sɔ’n man be.’ ?Amun kloman kɛ sa kwlaa nun’n sran’m be yo amun kpa? I sɔ’n ti yɛ Zezi waan ɔ fata kɛ e yo sran’m be kpa’n niɔn. ?Kɛ mɛn klanman nun lɔ’n sran’m be kwlaa bé yó i sɔ’n, ɔ su yoman ɲɛnmɛn?

Matie Ndɛ tre 5 lele 7; 10:1-4.



Kosan mun

  • ?Desɛn’n su’n, ninfan yɛ Zezi su kle like lɛ ɔ, yɛ wan mun yɛ be ti i wun koko lɛ’n niɔn?
  • ?Akoto blu nin nɲɔn be dunman yɛle onin?
  • ?Ngue yɛle Sielɛ Blɛ nga Zezi kɛn i ndɛ’n?
  • ?Ngue yɛ Zezi kleli sran mun kɛ be fa wla be srɛlɛ nun ɔn?
  • ?Wafa sɛ yɛ Zezi seli kɛ sran’m be nin be wiengu be tran ɔn?

Kosan nga be klɛ uka su’n

  • Kanngan Matie 5:1-12 nun.

    ?Wafa sɛ yɛ e kwla kle kɛ Ɲanmiɛn ninnge’m be lo e ɔ? (Mat. 5:3; Rɔm. 10:13-15; 1 Tim. 4:13, 15, 16)

  • Kanngan Matie 5:21-26 nun.

    ?Wafa sɛ yɛ Matie 5:23, 24 yi i nglo kpa kɛ sɛ ndɛ o e nin e niaan kun e afiɛn’n, nn ɔ ti kɛ ndɛ o e nin Ɲanmiɛn e afiɛn sa’n niɔn? (Mat. 6:14, 15; Jue. 133:1; Kol. 3:13; 1 Zan 4:20)

  • Kanngan Matie 6:1-8 nun.

    ?Klɔ sran i ayeliɛ benin mun yɛ ɔ fataman kɛ Klistfuɛ’m be fa su ɔ? (Lik 18:11, 12; 1 Kor. 4:6, 7; 2 Kor. 9:7)

  • Kanngan Matie 6:25-34 nun.

    ?Ɲanmiɛn m’ɔ fata kɛ e lafi i su naan y’a ɲan like nga e sa miɛn i wun’n, i su ndɛ benin yɛ Zezi kleli ɔ? (Tul. 16:4; Jue. 37:25; Fil. 4:6)

  • Kanngan Matie 7:1-11 nun.

    ?Ngue yɛ sunnzun ase kpa nga e wun i Matie 7:5 nun’n, ɔ kle e ɔ? (Nya. 26:12; Rɔm. 2:1; 14:10; Zak. 4:11, 12)