I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 90: Zezi nin Samari bla’n

Ndɛ 90: Zezi nin Samari bla’n

ZEZI jrannin Samari lɛ gbo kun wun ɔ loli wunmiɛn. I sɔnnzɔnfuɛ’m be ɔli klɔ nun lɔ aliɛ tolɛ. Bla nga Zezi nin i su ijɔ lɛ’n, ɔ bali nzue salɛ. Ɔ seli i kɛ: ‘Mmo, man min nzue kan maan n nɔn.’

Zezi nin Samari bla kun be su ijɔ.

I sɔ’n boli bla’n i nuan kpa. ?Amun si sa ti’n? Afin Zezi ti Zuifu yɛ bla’n ti Samarifuɛ. Yɛ Zuifu’m be sunman lika be kloman Samarifuɛ’m be sa. Be nin Samarifuɛ’m be ijɔman bɔbɔ! Sanngɛ Zezi liɛ’n ɔ klo sran kwlaa. Ɔ maan ɔ seli Samari bla’n kɛ: ‘Sɛ a si sran ng’ɔ se wɔ kɛ a mɛn i nzue lɛ’n, nn ɔ bɔbɔ á srɛ́ i wie, yɛ ɔ́ mán wɔ nzue m’ɔ sonji’n.’

Yɛ bla’n seli kɛ: ‘Nja, gbo’n ti kploun, a leman like mɔ a fa sa ɔ. ?Nin yɛ á ɲán nzue m’ɔ man nguan’n niɔn?’

Zezi seli i kɛ: ‘Sran kwlaa ng’ɔ nɔn nzue nga’n, nzue we kún i ekun. Sanngɛ sran nga ɔ nɔn nzue nga n fa mɛn i’n, ɔ́ káci kɛ nzue ti sa i nun m’ɔ ɲrɛn piaa lele ɔ maan ɔ́ nyán anannganman nguan.’

Yɛ bla’n seli kɛ: ‘Nja man min nzue sɔ’n wie! naan nzue we w’a kunman n kun, man min wie naan m’an baman nzue nun wa kun.’

Bla sɔ’n bu i kɛ Zezi su kan nzue jrɛiin i ndɛ. Sanngɛ Zezi su kan Ɲanmiɛn i su nanwlɛ’n, ɔ nin i Sielɛ Blɛ’n be ndɛ. I sɔ nanwlɛ ndɛ’n ɔ ti kɛ nzue m’ɔ man nguan sa. Ɔ kwla man sran kun anannganman nguan.

Siɛn’n, Zezi se bla’n kɛ: ‘Ko flɛ ɔ wun naan an bla.’

Bla’n tɛli su kɛ: ‘N leman bian.’

Zezi seli i kɛ: ‘Kɛ a se kɛ a leman bian’n ɔ ti nanwlɛ, afin w’a ja bian nnun, yɛ nga a nin i o nun kɛ é sé yɛ’n, ɔ timan ɔ wun.’

Ɔ boli bla i nuan, afin ndɛ wunmuan ngalɛ’n, ɔ ti nanwlɛ. ?Wafa sɛ yɛ Zezi sili i sɔ ninnge mun ɔn? Yɛle kɛ Sran nga Ɲanmiɛn tali nda kɛ ɔ́ fɛ́ i ba’n yɛle Zezi, ɔ maan ndɛ wunmuan ngalɛ’n, Ɲanmiɛn kan kleli i. I osu kunngba nun lɛ yɛ Zezi i sɔnnzɔnfuɛ’m be fin klɔ nun lɔ be bali ɔ. Ɔ boli be nuan kɛ Zezi nin Samari bla kun be su ijɔ.

?Ngue yɛ i wunmuan ngalɛ’n ɔ kle e ɔ? Ɔ kle kɛ Zezi klo nvlenvlefuɛ wafa kwlaa. Yɛ e kusu ɔ fata kɛ e yo sɔ wie. Nán maan e bu i kɛ, kɛ mɔ sran wie’m be ti nvle uflɛ nunfuɛ ti’n, be timan sran kpa. Zezi kunndɛ kɛ sran’m be kwlaa be si nanwlɛ ndɛ nga ɔ man anannganman nguan’n. E kusu ɔ fata kɛ e uka sran mun naan be si nanwlɛ ndɛ’n.

Zan 4:5-43; 17:3.



Kosan mun

  • ?Ngue ti yɛ Zezi jrannin Samari lɛ gbo kun wun ɔn, yɛ ngue ndɛ yɛ ɔ kan kleli bla kun ɔn?
  • ?Ngue ti yɛ ndɛ nga Zezi kannin’n ɔ boli bla’n i nuan ɔn? ?Ngue ndɛ yɛ ɔ kan kleli bla’n niɔn, yɛ ngue ti yɛ ɔ kannin sɔ ɔ?
  • ?Nzue benin yɛ bla’n bu i kɛ Zezi su kɛn i ndɛ ɔ, sanngɛ nn nzue benin yɛ Zezi kɛn i ndɛ ɔ?
  • ?Ngue ti yɛ ninnge nga Zezi si i bla’n i su’n ɔ boli bla’n i nuan ɔn? ?Yɛ wafa sɛ yɛ Zezi sili i sɔ sa mun ɔn?
  • ?Afɔtuɛ benin mun yɛ e kwla suan be bla nga ɔ o gbo’n su lɔ’n, i ndɛ’n su ɔ?

Kosan nga be klɛ uka su’n

  • Kanngan Zan 4:5-43 nun.

    ?Sɛ e fa Zezi i ajalɛ’n su’n, naan sɛ sran kun timan e nvle nunfuɛ’n annzɛ sɛ ɔ timan kɛ e sa’n, ngue yɛ e su yoman ɔn? (Zan 4:9; 1 Kor. 9:22; 1 Tim. 2:3, 4; Tit 2:11)

    ?Sɛ sran kun kaci Zezi i sɔnnzɔnfuɛ’n, Ɲanmiɛn ninnge’m be nun mmlusuɛ benin yɛ ɔ́ ɲɛ́n i ɔ? (Zan 4:14; Eza. 58:11; 2 Kor. 4:16)

    ?Wafa sɛ yɛ e kwla yo kɛ Samari bla’n m’ɔ kɛn i wun ko kannin ndɛ nga ɔ suannin’n kleli i wiengu mun sa ɔ? (Zan 4:6, 7, 28; Matie 6:33; Lik 10:40-42)