I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 89: Aata difuɛ’m be fuanlɛ

Ndɛ 89: Aata difuɛ’m be fuanlɛ

?ZEZI w’a fa ya dan kpa, nɛ́n i ɔ? ?Amun si like ti mɔ w’a fa ya sɔ’n? Yɛle kɛ sran nga be o Ɲanmiɛn sua nun lɛ’n, be klo sika tra like kwlaa. Nvlefuɛ nga be ba Ɲanmiɛn sulɛ wa’n, be kunndɛ kɛ bé ɲán be wun kpa be sa nun.

Zezi su su tabli mun nin be su sika’n be bo gua be ase.

?Amun wun nannin ba nin bua mun, ɔ nin okunmomo ngalɛ mun? Ɲanmiɛn sua nun lɛ yɛ sran sɔ’m be su yo be atɛ ɔ. Afin be si kɛ Izraɛlifuɛ’m be fa yi tɛ be man Ɲanmiɛn.

Ɲanmiɛn mmla’n se kɛ sɛ Izraɛlifuɛ kun fɔn Ɲanmiɛn mmla’n, ɔ fata kɛ ɔ kun nnɛn man Ɲanmiɛn. Kusu ɔ le Izraɛlifuɛ’m be Ɲanmiɛn like manlɛ blɛ. ?Sanngɛ ninfan yɛ Izraɛlifuɛ kun kwla ɲan anunman nin nnɛn man Ɲanmiɛn ɔn?

Izraɛlifuɛ wie’m be le be bɔbɔ be anunman nin be nnɛn mun. Ɔ maan be kwla fɛ i sɔ nnɛn’m be man Ɲanmiɛn. Sanngɛ be sunman lika be lemɛn i sɔ like. Kpɛkun, sran wie’m be tran Zerizalɛmu i wun mmua, ɔ maan be kwlá faman be nnɛn i nun bɔɔ kun sa be fa baman lele Ɲanmiɛn sua nun wa. Ɔ maan wa yɛ nvlefuɛ’m be wa to nnɛn annzɛ anunman nga be miɛn i wun’n niɔn. Sanngɛ, sran sɔ’m be di be nnɛn’m be gua dan nvlefuɛ’m be sa nun. Be di nvlefuɛ’m be lufle. I nga ɔ ti tɛtɛ bɔbɔ’n, yɛle Ɲanmiɛn sua nun wa yɛ nnɛn mɔ be yo be atɛ’n.

I sɔ’n yɛ ɔ kun Zezi i ya dan’n niɔn. I ti’n, ɔ susuli tabli nin i su sika’n be bo guɛli i ase, yɛ ɔ sanngannin be sika mma’m be nun. Kpɛkun, ɔ fali ɲanman fa yoli ngble, yɛ ɔ fa fuannin nnɛn wunmuan nga be o Ɲanmiɛn sua nun’n niɔn. Ɔ wlali okunmomo atɛ yofuɛ’m be su nun kpa kɛ: ‘An yi ninnge nga’m be wa! Nán an fa n Si i sua’n be kaci aata diwlɛ.’

Kɛ ɔ́ yó sɔ’n nn Zezi i sɔnnzɔnfuɛ wie’m be o Zerizalɛmu Ɲanmiɛn sua nun lɛ wie. Kɛ be wunnin Zezi i sa nga ɔ yo be’n, ɔ boli be nuan. Kpɛkun, be wla wa kpɛnnin Ɲanmiɛn i Wa’n i ndɛ nga Biblu’n kannin’n, i su: ‘Ɔ sua’n i klolɛ’n w’a kun n kpo.’

I nun mɔ Zezi te o Zerizalɛmu ɔ́ mínndɛ Delɛ Cɛn’n, ɔ yili atrɛ kaka kpa. I sin’n, Zezi jasoli Zide lɛ yɛ ɔ sɛli i sin Galile ɔ. Sanngɛ i sin salɛ nun’n, ɔ sinnin Samari akpasua’n su lɔ. Maan e nian sa nga ɔ wa juli lɔ’n.

Zan 2:13-25; 4:3, 4.



Kosan mun

  • ?Ngue ti yɛ be yo nnɛn’m be atɛ Ɲanmiɛn sua’n nun ɔn?
  • ?Ngue yɛ ɔ kunnin Zezi i ya’n niɔn?
  • ?Kɛ nga amun fa wun i desɛn’n su lɛ’n, ngue yɛ Zezi su yo ɔ, yɛ ngue ndɛ yɛ ɔ kan kleli okunmomo atɛ yofuɛ mun ɔn?
  • ?Kɛ Zezi i sɔnnzɔnfuɛ’m be wunnin like nga ɔ su yo i lɛ’n, ngue ndɛ yɛ be wla kpɛnnin su ɔ?
  • ?Kɛ Zezi sɛ i sin Galile’n, akpasua benin su yɛ ɔ sinnin ɔn?

Kosan nga be klɛ uka su’n

  • Kanngan Zan 2:13-25 nun.

    ?Kɛ e wun ya nga Zezi fɛli i be nga be kaci sika Ɲanmiɛn sua nun be wun’n, wafa sɛ yɛ ɔ fata kɛ e bu Ɲanmiɛn Sielɛ Blɛ sua nun aata dilɛ’n niɔn? (Zan 2:15, 16; 1 Kor. 10:24, 31-33)