I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 75: Daniɛli nin i janvuɛ mun

Ndɛ 75: Daniɛli nin i janvuɛ mun

FAMIƐN Nɛbikadnɛzali fali Izraɛli lɔ sran’m be nun kpakpa mun nin be nun sa sifuɛ kwlaa ɔli Babilɔni. I sin’n, ɔ kpali be nun nglanman mun nin be nun ngwlɛlɛfuɛ mun ngunmin. Be nun nnan yɛle gbanflɛn nga amun wun be wa yɛ’n. Be nun kun yɛle Daniɛli, yɛ be onga mun, Babilɔnifuɛ’m be tɔnnin be dunman kɛ Sadraki, Mesaki, yɛ Abɛdi-Nego.

Nɛbikadnɛzali sunnzunnin kɛ be kle gbanflɛn sɔ’m be like naan be tran i awlo lɔ. Kɛ be ko kle be fluwa lele mɔ i afuɛ nsan’n i nuan ko yia’n, saan be nun angunndanfuɛ kpa mun yɛ bé kɛ́n i awlo lɔ ndɛ mun ɔn. Famiɛn’n kunndɛ kɛ be like klelɛ’n i blɛ nun’n, be ɲan wunmiɛn naan be yo juejue. I sɔ ti ɔ wlali i junman difuɛ’m be su nun kpa kɛ be man be kwlaa be aliɛ kpakpa nin nzan kpakpa kɛ i bɔbɔ nin i awlofuɛ be liɛ’n sa.

Daniɛli, Sadraki, Mesaki, ɔ nin Abɛdi-Nego be su yiyi like nga be lafi su’n i nun kle.

Amun nian Daniɛli kan’n. ?Amun si ndɛ nga ɔ su kan kle Nɛbikadnɛzali i junman difuɛ’m be su kpɛn Aspɛnazi’n? Ɔ su kan kle i kɛ ɔ su diman aliɛ kpakpa nga famiɛn’n di be’n wie. Sanngɛ srɛ kunnin Aspɛnazi. Ɔ se Daniɛli kɛ: ‘Famiɛn’n bɔbɔ yɛ ɔ kleli aliɛ ng’ɔ fata kɛ amun di nin nzan ng’ɔ fata kɛ amun nɔn’n niɔn. Sɛ ɔ wa wun kɛ amun wunnɛn nunman amun wun kɛ gbanflɛn nga’m be sa’n, ɔ́ wá kún min.’

Yɛ Daniɛli ko to sran nga Aspɛnazi fɛ i sie kɛ ɔ nian be lika’n niɔn. Ɔ se i kɛ: ‘Ń srɛ́ wɔ kpa ti ɔ, sa e cɛn ba blu naan nian. E ninnge nga e di be’n, nán nnɛn tran nun yɛ maan be man e nzue ngbɛn naan e nɔn. I sin’n, nian e naan nian gbanflɛn nga be di nannan bɔbɔ i aliɛ liɛ’n wie’n, naan nian sran nga i wunnɛn o i nun’n.’

Sran nga ɔ nian be su’n kplinnin su naan w’a sa be cɛn ba blu. Kɛ be wieli cɛn ba blu’n i di’n, Daniɛli nin i janvuɛ nsan’m be ɲrun’n yoli mlanmlan trali gbanflɛn kun nga mun. Ɔ maan bian’n yacili be nun yɛ ninnge nga nnɛn nunman nun’n, i ngunmin yɛ be dili ɔ. B’a diman aliɛ nga famiɛn bɔbɔ di’n wie.

Kɛ i afuɛ nsan juli’n, be fali gbanflɛn’m be kwlaa be ɔli Nɛbikadnɛzali i ɲrun lɔ. Famiɛn’n nin be kwlaa be ijɔli. Kɛ ɔ nin gbanflɛn sɔ’m be kwlaa be kokoli yalɛ’n, w’a wunman sran kun mɔ i ɲrun ba ɲan kɛ Daniɛli nin i janvuɛ’m be sa ɔ. Ɔ maan famiɛn’n trali be ase kɛ be di i awlo lɔ junman. Ndɛ kwlaa wie ala mɔ famiɛn’n usa be’n, m’ɔ fata kɛ angunndan nin ngwlɛlɛ yɛ be fa tɛ su’n, ɔ wunnin kɛ Daniɛli nin Sadraki nin Abɛdi-Nego be tɛ su kpa trɛ i mɛn’n nun wunnzue yifuɛ fanunfanun’m be kwlaa lele kpɛ blu.

Daniɛli 1:1-21.



Kosan mun

  • ?Wan yɛle yasua nnan nga be o desɛn’n su lɛ’n, yɛ ngue ti yɛ be o Babilɔni lɔ ɔ?
  • ?Nɛbikadnɛzali waan ɔ́ yó yasua nnan ngalɛ’m be sɛ, yɛ ndɛ benin yɛ ɔ kan kleli i sufuɛ mun ɔn?
  • ?Be aliɛ dilɛ nin be nzan nɔnlɛ’n su’n, ngue like yɛ Daniɛli seli be lika nianfuɛ’n kɛ ɔ yo man be ɔ?
  • ?Kɛ Daniɛli nin i janvuɛ’m be dili aliɛ nga nnɛn nunman nun’n lele cɛn ba blu’n, mɔ be fa be sunnzunnin be wiengu mun’n, wafa sɛ yɛ be ti ɔ?
  • ?Ngue ti yɛ maan Daniɛli nin i janvuɛ nsan’m be ko trannin famiɛn i sua’n nun lɔ ɔ? ?Yɛ wafa sɛ yɛ be ndɛ’m be ti kpa tra be amuɛn ɲrun jranfuɛ mun nin ngwlɛlɛfuɛ mun ɔn?

Kosan nga be klɛ uka su’n

  • Kanngan Daniɛl 1:1-21 nun.

    ?Sɛ e waan é jrán e ɲrun tanndanlɛ nin fɔ m’ɔ o e nun’n be ɲrun’n, wafa sɛ yɛ é mían e ɲin é yó i sɔ ɔ? (Dan. 1:8; Bol. 39:7, 10; Gal. 6:9)

    ?Ninnge wafawafa benin nun yɛ be kwla tanndan gbanflɛn nin talua’m be ɲrun annzɛ be kle be yalɛ ɔ? (Dan. 1:8; Nya. 20:1; 2 Kor. 6:​17-7:1)

    ?Wafa sɛ yɛ ndɛ nga Biblu’n kɛn i Ebre gbanflɛn nnan’m be su’n, ɔ kle e kɛ e fa e ɲin sie suklu lɔ like klelɛ’n su ɔ? (Dan. 1:​20; Eza. 54:13; 1 Kor. 3:​18-​20)