Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 73: Izraɛli famiɛn kasiɛn kpa’n

Ndɛ 73: Izraɛli famiɛn kasiɛn kpa’n

ZOZIASI le afuɛ mɔcuɛ cɛ, yɛ ɔ yoli Izraɛli ngua lɔ akpasua nɲɔn’n be su famiɛn’n niɔn. I yɛ ɔ yoli Izraɛli famiɛn mun, be nun bakan’n niɔn. Ɔ maan i klikli nun’n, kpɛnngbɛn’m be ukɛli i naan w’a sie famiɛn diwlɛ’n.

Kɛ Zoziasi yoli famiɛn’n, ɔ fɛli i wun mantannin Zoova lele afuɛ nso. Ɔ fali famiɛn kpa mun kɛ Davidi nin Zozafati nin Ezekiasi be ajalɛ liɛ’n su. I nun m’ɔ te yo gbanflɛn’n, Zoziasi yoli yakpa like kun.

Zoziasi nin i sran’m be su bubu amuɛn mun.

Izraɛlifuɛ’m be dan lika be boli tete ninnge’m be yolɛ bo i osu w’a cɛ. Be sɔ amuɛn mun, be koto be bo. I sɔ ti’n, Zoziasi nin i sran’m be yiyili amuɛn wafawafa kwlaa nga be sɔ be’n lika wunmuan’n nun. Nán junman kaan yɛle i sɔ’n, afin be nga be sɔ amuɛn’m be sɔnnin. Zoziasi nin i sran mun yɛle nga be bubu amuɛn ba’m be nun desɛn’n su lɛ’n.

I sin’n, Zoziasi sieli sran nsan kɛ be nian Zoova i sua’n su naan be siesie i ye. Nvlefuɛ’m be boli sika be mannin junman sunianfuɛ mun naan b’a fa di junman’n. Kɛ bé dí Ɲanmiɛn i sua’n nun lɔ junman’n, Ɲanmiɛn ɲrun jranfuɛ Ilkiza wunnin like nanndoliɛ kun. Be wunnin Ɲanmiɛn i mmla mɔ Moizi klɛli i laa’n. Ɔ mlinnin i afuɛ kɔe wie yɛ.

Be fali fluwa’n ko mannin Zoziasi naan w’a se kɛ be kanngan nun be kle i. Kɛ bé kánngan fluwa’n nun bé kɔ́’n, Zoziasi wunnin kɛ nvlefuɛ’m be faman Zoova i mmla’n su. Ɔ yoli famiɛn’n i ya lele trali su. I ti’n ɔ titili i wun tralɛ’n nun kɛ nga amun wun i yɛ’n sa. Ɔ seli kɛ: ‘Fluwa nga i nun ndɛ’n, e nannan’m b’a faman i ngba su, b’a diman su. Ɔ maan Anannganman w’a fa e wun ya dan kpa.’

Safan nin famiɛn Zoziasi

Zoziasi seli Ɲanmiɛn ɲrun jranfuɛ’m be su kpɛn’n Ilkiza kɛ ɔ usa like nga Zoova wá yó be’n. Ilkiza ɔli Ɲanmiɛn nuan ijɔfuɛ bla nga be flɛ i Ilda’n i sin, naan w’a usɛ i. Ilda waan be ko se Zoziasi kɛ Zoova waan yoo: ‘Ń wá yó maan ɲrɛnnɛn tɔ́ Zerizalɛmu nin i nunfuɛ’m be su. Be tɛ mɔ be yoli’n, nin amuɛn mɔ be sɔli be’n ɔ nin be ayeliɛ tɛtɛ’n w’a yi asiɛ wunmuan’n ti. Zoziasi, sanngɛ kɛ mɔ wɔ liɛ’n, ayeliɛ nga ɔ ti su yɛ a yoli’n ti’n, ɲrɛnnɛn nga ń fá yí i klɔ nga su’n su yoman ɔ ɲrun.’

2 Be Nyoliɛ 34:1-28.



Kosan mun

  • ?Kɛ Zoziasi yó famiɛn’n nn ɔ le afuɛ nɲɛ, yɛ afuɛ nso’n klikli nga nun m’ɔ o famiɛn bia’n su’n, ngue yɛ ɔ boli i yolɛ bo ɔ?
  • ?Desɛn klikli su’n, ngue yɛ amun wun kɛ Zoziasi su yo ɔ?
  • ?Kɛ sran mun bé síesíe Ɲanmiɛn sua’n i ye’n, ngue yɛ Ɲanmiɛn ɲrun jranfuɛ’m be su kpɛn’n wunnin i ɔ?
  • ?Ngue ti yɛ Zoziasi titili i wun tralɛ’n nun ɔn?
  • ?Zoova nuan ndɛ benin yɛ Ɲanmiɛn nuan ijɔfuɛ Ilda kan kleli Zoziasi ɔ?

Kosan nga be klɛ uka su’n

  • Kanngan 2 Be Nyoliɛ 34:1-28 nun.

    ?Ajalɛ benin yɛ Zoziasi man be nga be bakan nun’n be wunnin ɲrɛnnɛn’n niɔn? (2 Nyo. 33:21-25; 34:1, 2; Jue. 27:10)

    ?Kɛ Zoziasi i famiɛn dilɛ ɲannin afuɛ 8, ɔ nin i afuɛ 12, ɔ nin afuɛ i 18, ajalɛ benin yɛ ɔ fali naan Zoova i sulɛ’n w’a ɔ i ɲrun ɔn? (2 Nyo. 34:3, 8)

    ?E Ɲanmiɛn sulɛ lika’m be ye siesielɛ nun’n, ajalɛ benin yɛ Famiɛn Zoziasi nin Ɲanmiɛn ɲrun jranfuɛ’m be su kpɛn Ilkiza be mannin e ɔ? (2 Nyo. 34:9-13; Nya. 11:14; 1 Kor. 10:31)