I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 72: Ɲanmiɛn jran Ezekiasi sin

Ndɛ 72: Ɲanmiɛn jran Ezekiasi sin

?AMUN si like nga ti yɛ bian nga su srɛ Zoova’n? ?Yɛ ngue ti yɛ ɔ trɛ fluwa nun lika nga be yi tɛ be man Ɲanmiɛn lɛ’n i ɲrun sa ɔ? Bian sɔ’n, be flɛ i Ezekiasi. Ɔ ti Izraɛli akpasua nɲɔn nga be o ngua lɔ’n, be su famiɛn. Famiɛn’n i ɲin w’a blo. ?Yɛ ngue ti ɔ?

Famiɛn Ezekiasi su srɛ Ɲanmiɛn.

Asirifuɛ’m be sonja’m b’a dun mmua b’a nunnun nglo lɔ akpasua blu (10) mun ti ɔ. Sran sɔ’m be tɛ’n ti, Zoova yacili be lɛ be nunnunnin be. Kpɛkun siɛn’n, Asirifuɛ’m be sonja’m be nin ngua wa famiɛn diwlɛ akpasua nɲɔn’n b’a ba alɛ kunlɛ.

Asiri famiɛn’n, w’a blɛ famiɛn Ezekiasi fluwa. Fluwa sɔ mun yɛle nga Ezekiasi siesie be Ɲanmiɛn ɲrun wa yɛ’n. Asiri famiɛn’n yo Zoova finfin fluwa’n nun, kpɛkun ɔ se Ezekiasi kɛ ɔ lo i wun mɛn i bɔbɔ’n. I sɔ ti yɛ maan Ezekiasi srɛ Ɲanmiɛn kɛ: ‘Zoova e Ɲanmiɛn, de e Asiri famiɛn’n sa nun, maan asiɛ’n su famiɛn diwlɛ’m be nunfuɛ’m be kwlaa be si kɛ wɔ Zoova ɔ kunngba cɛ yɛ a ti Ɲanmiɛn’n niɔn.’ ?Zoova tɛ Ezekiasi i srɛlɛ’n su?

Famiɛn kpa yɛle Ezekiasi. Ɔ timan kɛ Izraɛli akpasua blu (10) be famiɛn tɛtɛ mun, annzɛ i si Akazi famiɛn tɛfuɛ’n sa. Ɔ niannin Zoova i mmla’m be su nantili. Ɔ maan kɛ Ezekiasi wieli Ɲanmiɛn srɛ’n, Ɲanmiɛn nuan ijɔfuɛ Ezai sunmannin sran Zoova i dunman nun kɛ: ‘Asiri famiɛn’n su wluman Zerizalɛmu wa. I sonja’m be nun kun sa, ɔ su wunngemɛn i wun koko bɔbɔ. Be su toman ta ba kun sa klɔ nga nun.’

Amun nian desɛn’n su. ?Sonja benin’m be fuɛn mun yɛle nga? Asirifuɛ mun ɔn. Zoova sunmannin i anzi kun kpɛkun le kun kɔnguɛ ɔ kunnin Asirifuɛ’m be sonja lele akpiakpi ya sonja akpiakpi ablaɔcuɛ nin nnun (185.000). Ɔ maan Asiri famiɛn’n yacili alɛ kunlɛ’n, ɔ wanndili ɔli i klɔ.

Asirifuɛ’m be sonja’m be fuɛn mun

Akpasua nɲɔn be fin nun fiteli, naan b’a tran fɔun le nɲɔn kun. Sanngɛ kɛ Ezekiasi wuli’n, i wa Manase sinnin i ja nun. Manase nin i wa Amɔn be nɲɔn’m be yoli famiɛn tɛtɛ kpa. Yɛ sran kunlɛ mun nin ninnge kekleekle yolɛ’m be wa yili asiɛ’n ekun ɔn. Kɛ Amɔn i bɔbɔ i sran’m be kunnin i, yɛ i wa Zoziasi yoli akpasua nɲɔn famiɛn diwlɛ’m be famiɛn ɔn.

2 Famiɛn Mun 18:1-36; 19:1-37; 21:1-25.



Kosan mun

  • ?Wan yɛle sran nga ɔ o desɛn’n su lɛ’n, yɛ ngue ti yɛ i ɲin w’a blo sɔ ɔ?
  • ?Fluwa benin yɛ Ezekiasi w’a fa sie i Ɲanmiɛn ɲrun lɛ’n niɔn? ?Yɛ ngue ti yɛ Ezekiasi su srɛ Ɲanmiɛn ɔn?
  • ?Famiɛn’n i wafa benin yɛ Ezekiasi ti ɔ? ?Yɛ ngue ndɛ yɛ Zoova sunmannin i nuan ijɔfuɛ Ezai kɛ ɔ ko kan kle i ɔ?
  • ?Kɛ nga e fa wun i desɛn’n su lɛ’n, ngue like yɛ Zoova i anzi yoli Asirifuɛ’m be sonja mun ɔn?
  • ?Sɛ bɔbɔ Famiɛn diwlɛ’n akpasua nɲɔn be trannin alaje nun kan’n, sanngɛ kɛ Ezekiasi wuli’n lika’n yoli sɛ?

Kosan nga be klɛ uka su’n

  • Kanngan 2 Famiɛn Mun 18:1-36 nun.

    ?Wafa sɛ yɛ Asirifuɛ’m be safuɲrɛn’n waan ɔ́ yó naan Izraɛlifuɛ’m be Ɲanmiɛn sulafilɛ’n ɔ kpɔnzɔ ɔ? (2 Fam. 18:19, 21; Tul. 5:2; Jue. 64:4)

    ?Sɛ be o be kpɔfuɛ’m be ɲrun’n, wafa sɛ yɛ Zoova i Lalofuɛ’m be kwla fa Ezekiasi i ajalɛ’n su ɔ? (2 Fam. 18:36; Jue. 39:1; Nya. 26:4; 2 Tim. 2:24)

  • Kanngan 2 Famiɛn Mun 19:1-37 nun.

    ?Wafa sɛ yɛ ɲrɛnnɛn blɛ nun’n, andɛ Zoova i Lalofuɛ’m be fa Ezekiasi i ajalɛ’n su ɔ? (2 Fam. 19:1, 2; Nya.3:5, 6; Ebr.10:24, 25; Zak. 5:14, 15)

    ?Wafa sɛ yɛ be kwlali Sankeribu kpɛ nsan ɔn ?Yɛ Ɲanmiɛn ninnge’m be nun’n, sran benin i nzɔliɛ yɛle Sankeribu? (2 Fam. 19:32, 35, 37; Ngl. 20:2, 3)

  • Kanngan 2 Famiɛn Mun 21:1-6, 16 nun.

    ?Ngue ti yɛ e kwla se kɛ famiɛn tɛ kpa nga be sieli Zerizalɛmu’n, be nun kun yɛle Manase? (2 Nyo. 33:4-6, 9)