I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 70: Zonasi nin jue dan’n

Ndɛ 70: Zonasi nin jue dan’n

AMUN nian bian nga ɔ wo nzue’n nun yɛ’n. ?Amun wunman kɛ i ɲin’n ti blowa kpa’n? Ɔ ka kaan jue’n su wa mɛn i! ?Amun si sran sɔ’n? Be flɛ i Zonasi. ?Ngue sa ti yɛ maan ɔ su fɛ sɔ ɔ?

Ɲanmiɛn i nuan ijɔfuɛ yɛle Zonasi. Kɛ Ɲanmiɛn nuan ijɔfuɛ Elize wuli’n, i osu w’a cɛman yɛ Zoova seli Zonasi kɛ: ‘Jaso kɔ Ninivu klɔ dan’n su lɔ. Lɔfuɛ’m be nzuɛn tɛ’n w’a flan min. Kɔ naan ko bo su sɔ kle be.’

Zonasi nin jue dan’n

Kɔlɛ’n yoman Zonasi fɛ. Ɔ maan ɔ fali mmeli’n, ɔ ɔli lika uflɛ. W’a ɔman Ninivu. Zonasi wanndili Zoova i bo, ɔ kpɛli i atin srɛ. I sɔ’n w’a yoman Zoova i fɛ mlɔnmlɔn. I ti’n Zoova yoli maan aunmuan dan kun fitali, ɔ maan ɔ ka kan’n nn mmeli’n w’a mlɔn. Srɛ dan kpa kunnin mmeli’n i kanfuɛ mun. I sɔ ti’n, be kpan flɛli be amuɛn mun.

I kasiɛn su’n naan Zonasi w’a se be kɛ: ‘N su Zoova, Ɲanmiɛn ng’ɔ boli nglo’n nin asiɛ’n. N su wanndi Zoova i bo, n su kpɛ atin srɛ.’ Mmeli’n i kanfuɛ’m be usɛli i kɛ: ‘?E yo wɔ sɛ naan aunmuan w’a go nun?’

Zonasi tɛli be su kɛ: ‘Sɛ amún wún kɛ jenvie’n gó nun’n, saan amun a fa min b’a to b’a yi nun.’ Mmeli’n i kanfuɛ’m be kloman kɛ bé tó Zonasi yí i nzue’n nun. Sanngɛ kɛ mɔ jenvie’n bo kekle kpa’n ti’n, be mannin Zonasi su naan b’a to b’a yi i jenvie’n nun. Kpɛkun bliin, jenvie’n kali lɛ jrannin, i kejelɛ dan’n wieli.

Kɛ Zonasi mlɔnnin nzue’n bo lɔ’n, jue dan kun mɛnnin i. Sanngɛ w’a wuman. Zonasi trannin jue’n i klun lɔ cɛn ba klonglo nsan. Wanndilɛ mɔ Zonasi wanndili Zoova i bo’n, mɔ w’a ɔman Ninivu’n, ɔ wa yoli Zonasi i nsisɔ. ?Amun si like nga ɔ yoli’n?

Ɔ srɛli Zoova kɛ ɔ ukɛ i. Yɛ Zoova maan jue’n fili Zonasi guɛli i cenje’n su. I sin’n, Zonasi ɔli Ninivu. ?E wunman kɛ ndɛ nga kle e kɛ Zoova i mmla’m be su nantilɛ ti cinnjin kpa?

Zonas i fluwa’n.



Kosan mun

  • ?Wan yɛle Zonasi, yɛ ngue yɛ Zoova seli kɛ ɔ yo ɔ?
  • ?Kɛ mɔ Zonasi kpɛli Zoova i atin srɛ’n ti’n, ngue yɛ ɔ yoli ɔ?
  • ?Kɛ ɔ ko yo naan aunmuan dan’n w’a jran’n, Zonasi seli mmeli kanfuɛ mun mɔ be nin i o mmeli’n nun’n be sɛ?
  • ?Kɛ nga e fa wun i desɛn’n su lɛ’n, kɛ be fali Zonasi be yili nzue’n nun’n, ngue yɛ ɔ juli ɔ?
  • ?Cɛn nɲɛ yɛ Zonasi dili i jue dan’n i klun lɔ ɔ, yɛ ngue yɛ ɔ yoli i lɔ ɔ?
  • ?Kɛ Zonasi fin jue dan’n i klun lɔ fiteli’n, nin yɛ ɔ ɔli ɔ? ?Yɛ ajalɛ benin yɛ i sɔ’n kle e ɔ?

Kosan nga be klɛ uka su’n

  • Kanngan Zonas 1:1-17 nun.

    ?Nanwlɛ, wafa sɛ yɛ Zonasi buli jasin fɛ’n junman nga be mɛnnin i kɛ ɔ ko bo kle Ninivufuɛ mun’n niɔn? (Zonas 1:2, 3; Nya. 3:7; Aku. 8:12)

  • Kanngan Zonas 2:1, 2, 10 nun.

    ?Wafa sɛ yɛ sa nga ɔ tɔli Zonasi su’n, ɔ kle e kɛ e kwla lafi su kɛ Zoova wá tɛ́ e srɛlɛ’n su ɔ? (Jue. 22:25; 34:7; 1 Zan 5:14)

  • Kanngan Zonas 3:1-10 nun.

    ?Kannzɛ bɔɔ i klikli nun Zonasi kpɛli Zoova i atin srɛ’n, sanngɛ wafa sɛ yɛ falɛ nga Zoova fɛli i dili i junman’n titi’n, ɔ wla e fanngan ɔn? (Jue. 103:14; 1 Piɛ. 5:10)

    ?Wafa sɛ yɛ Zonasi i ajalɛ’n Ninivufuɛ’m be lika’n, ɔ kle e kɛ ɔ nin i fataman kɛ e kpli e di e jasin fɛ’n bowlɛ lika nun sran wie’m be jɔlɛ ɔ? (Zonas 3:​6-9; Aku. 11:6; Yol. 13:48)