I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 60: Abigaili nin Davidi

Ndɛ 60: Abigaili nin Davidi

?AMUN si bla klanman nga ɔ su ba Davidi i atin kpalɛ lɛ’n? I dunman’n yɛle Abigaili. Ɔ ti ngwlɛlɛfuɛ kpa, kpɛkun ɔ yoli maan Davidi w’a yoman sa tɛ. Sanngɛ ka naan y’a kan sa sɔ’n i ndɛ’n, maan e dun mmua kan like nga be yoli Davidi’n i ndɛ.

Kɛ Davidi wanndili Saili ɲrun’n, ɔ ko fiali yɛbuɛ buɛ kun nun. I niaan bian nin i awlofuɛ’m be ko toli i lɔ. Sran ko ju ya nnan (400) be toli Davidi lɔ, yɛ ɔ yoli be su kpɛn ɔn. Yɛ Davidi ɔli ko toli Moabu famiɛn’n naan w’a se i kɛ: ‘N waan ń srɛ́ wɔ naan min si nin min nin be tran ɔ wun wa naan sɛ n ko wun like nga ɔ́ yó min’n, nn m’an fa be.’ I sin’n, Davidi nin i sran’m be fiali oka’m be nun.

Kɛ ɔ yoli sɔ’n, yɛ Davidi nin Abigaili be yiali nun ɔn. Bla’n i wun Nabali ti sran dan, ɔ le asiɛ. I bua’m be ti akpi nsan (3.000), yɛ i boli’m be ti akpi kun (1.000). Nabali’n ti tɛ. Sanngɛ i yi’n m’ɔ ti bla klanman kpa’n, ɔ si ngwlɛlɛ. Le kun’n, bla’n deli i awlobofuɛ mun. Maan e nian wafa nga ɔ fa deli be’n.

Davidi nin i gbanflɛn’m be yoli Nabali i kpa. Be ukɛli i be niannin i bua’m be su. Yɛ le kun’n, Davidi sunmannin i gbanflɛn mun kɛ be ko se Nabali kɛ ɔ man be aliɛ. Kɛ Davidi i sran’m bé jú lɔ’n, Nabali nin i junman difuɛ’m be su kpɛkpɛ i bua’m be ndrɛ’n. Be o cɛn dilɛ blɛ nun, ɔ maan aliɛ’n bu Nabali su sa puu. Yɛ Davidi i gbanflɛn’m be seli Nabali kɛ: ‘E yoli wɔ ye. Y’a wuaman ɔ bua’m be nun kun, ukalɛ yɛ e ukali wɔ a niannin be su ɔ. I ti’n, yaci, man e aliɛ kan.’

Nabali tɛli be su kɛ: ‘N faman min aliɛ n manman sran kɛ amun sa’n.’ Nabali dili be tɛ kpa, ɔ kankan Davidi i ndɛ tɛtɛ guali su. Kɛ gbanflɛn’m be sali be sin mɔ be kɛnnin i sɔ’n kleli Davidi’n, ɔ kunnin i ya dan kpa. Ɔ seli i sran’m be kɛ: ‘Amun kwlakwla amun fa amun tokofi mun.’ Kpɛkun be fali atin’n kɛ bé kó kún Nabali nin i sran mun.

Nabali i gbanflɛn’m be nun kun m’ɔ tili ndɛ tɛtɛ nga Nabali kannin’n, ɔ ko kan kleli Abigaili. Be ja nun lɛ Abigaili fali aliɛ sieli i aflunmun’m be su yɛ ɔ fali atin’n niɔn. Kɛ ɔ nin Davidi be yiali nun’n, yɛ ɔ fin i aflunmun su jrali ɔ, naan w’a utu i ɲin ase Davidi ɲrun. Ɔ seli i kɛ: ‘Nannan, yaci, nán tɛ min wun Nabali su. Sinnglinfuɛ yɛle i, i ti’n sinnzin yɛ ɔ dili ɔ. Aliɛ yɛ n fa blɛli wɔ yɛ’n. Yaci, sɔ nun naan yaci e tɛ’n cɛ e.’

Abigaili su blɛ Davidi i aliɛ.

Davidi tɛli Abigaili su kɛ: ‘Ɔ bla nga a si ngwlɛlɛ. Ɔ ti’n maan m’an kunman Nabali m’an fa tuaman i klunwi’n i kalɛ. Kɔ ɔ awlo, nán srɛ kun wɔ.’ I sin’n, Nabali wa wuli, yɛ Davidi jali Abigaili ɔ.

1 Samiɛl 22:1-4; 25:1-43.



Kosan mun

  • ?Wan yɛle bla nga ɔ su ba Davidi i atin kpalɛ desɛn’n su lɛ’n? ?Yɛ sran’n i wafa benin yɛle bla sɔ’n?
  • ?Wan yɛle Nabali?
  • ?Ngue ti yɛ Davidi sunmannin i sran wie mun kɛ be ko srɛ Nabali i aliɛ ɔ?
  • ?Nabali seli Davidi i sran’m be sɛ? ?Yɛ Davidi tɛli i su sɛ?
  • ?Wafa sɛ yɛ Abigaili kle kɛ ɔ ti bla ngwlɛlɛfuɛ ɔ?

Kosan nga be klɛ uka su’n

  • Kanngan 1 Samiɛl 22:​1-4 nun.

    ?Wafa sɛ yɛ Davidi i awlobo’n kle e wafa nga ɔ fata kɛ e suan e niaan Klistfuɛ’m be bo’n niɔn? (Nya. 17:17; 1 Tɛs. 5:14)

  • Kanngan 1 Samiɛl 25:​1-​43 nun.

    ?Ngue ti yɛ be se kɛ Nabali ti finfinfuɛ ɔ? (1 Sam. 25:​2-5, 10, 14, 21, 25)

    ?Afɔtuɛ benin yɛ Abigaili i ajalɛ’n kwla man andɛ Klistfuɛ bla mun ɔn? (1 Sam. 25:32, 33; Nya. 31:26; Efɛ. 5:24)

    ?Like tɛtɛ nɲɔn benin yɛ Abigaili maan Davidi w’a yoman’n niɔn? (1 Sam. 25:31, 33; Rɔm. 12:19; Efɛ. 4:26)

    ?Wafa sɛ yɛ Abigaili i ndɛ’n mɔ Davidi fali su’n, ɔ uka yasua mun andɛ naan be nian bla mun kɛ Zoova fa nian be sa’n niɔn? (Yol. 21:8, 9; Rɔm. 2:11; 1 Piɛ. 3:7)

SUAN LIKE UFLƐ EKUN

Abigaili fa ngwlɛlɛ nantili

?Ngue yɛ Abigaili i aja’n nun ndɛ’n kle e ɔ?