I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 56: Saili m’ɔ ti Izraɛli famiɛn klikli’n

Ndɛ 56: Saili m’ɔ ti Izraɛli famiɛn klikli’n
Samiɛli su sie Saili famiɛn.

AMUN wun desɛn’n su kɛ Samiɛli su gua bian’n i ti su ngo’n? Laa nun kɛ bé síe sran kun famiɛn’n, kɛ be yo i sɔ ɔ. Kɛ be guɛ i ti su ngo’n, yɛ ɔ kle kɛ b’a sie i famiɛn ɔn. Zoova yɛ ɔ seli Samiɛli kɛ ɔ gua Saili i ti su ngo ɔ. Ngo sɔ’n ti i liɛ ngunmin, ɔ bɔn fannin kpa.

Saili w’a bumɛn i wun sran kpa naan se kɛ bé kwlá síe i famiɛn. Ɔ seli Samiɛli kɛ: ‘N fin Bɛnzamɛn i akpasua’n su. Yɛ kusu Bɛnzamɛn i akpasua’n yɛ ɔ ti Izraɛli i akpasua’m be nun kaan’n niɔn. ?Ɔ yo sɛ ti yɛ a se kɛ ḿ má yó famiɛn ɔn?’ Saili bumɛn i wun kɛ ɔ ti sran dan annzɛ kusu ɔ tumɛn i wun, i ti yɛ Zoova klo i sa’n niɔn. I sɔ’n ti yɛ maan Zoova fɛli i kɛ ɔ yo famiɛn’n niɔn.

Sanngɛ nán kɛ Saili ti yalɛfuɛ annzɛ sran m’ɔ leman ɲrun ti ɔ. Saili i osufuɛ’m be ti aɲanbeunfuɛ, kpɛkun i bɔbɔ ba’n ti gbanflɛn klanman, sran jajraja kpa. I ti’n tra Izraɛlifuɛ’m be kwlaa be su. Saili kunngba’n ɔ kwla wanndi kpa, kpɛkun ɔ le wunmiɛn kpa. Kɛ Zoova fɛli i kɛ ɔ yo famiɛn’n, ɔ yoli nvlefuɛ’m be fɛ kpa. Be kwlaa be kpannin be seli kɛ: ‘Maan wie wla fi famiɛn’n su o!’

Izraɛlifuɛ’m be kpɔfuɛ’m be jin be ba su. Be te kle Izraɛlifuɛ’m be ɲrɛnnɛn kpa. Kɛ be sieli Saili famiɛn cɛ’n, yɛ Amɔnfuɛ’m be fali alɛ wlali be sin ɔn. Sanngɛ Saili yiayiali alɛ kunfuɛ kaka kpa, kpɛkun be kwlali Amɔnfuɛ mun. Ɔ maan ɔ yo nvlefuɛ’m be fɛ kpa kɛ Saili yo be famiɛn.

Kɛ afuɛ’m bé sín’n, Saili maan Izraɛlifuɛ’m be kwlali be kpɔfuɛ mun alɛ kpanngban kpa nun. Saili i wa kun suan Zonatan, ɔ ti sran yakpa. I kusu ukali Izraɛlifuɛ mun maan be kwlali alɛ sunman nun wie. Izraɛlifuɛ’m be kpɔfuɛ tɛ kpa’n yɛle Filistifuɛ mun. Le kun be nun sran akpiakpi’m be bali kɛ be nin Izraɛlifuɛ’m bé wá kún.

Samiɛli seli Saili kɛ ɔ minndɛ lele maan ɔ bla ɔ wa to i naan b’a yi tɛ b’a man Zoova. Sanngɛ Saili minndɛ Samiɛli ɔ, Samiɛli baman. Srɛ kunnin i afin ɔ bu i kɛ Filistifuɛ’m bé wá bó alɛ kunlɛ’n i bo, i ti’n w’a minndɛman Samiɛli, ɔ maan i bɔbɔ yili tɛ’n. Kɛ Samiɛli bali’n, ɔ ijɔli Saili kɛ i ɲin w’a yiman Zoova. I sɔ’n ti’n, Samiɛli waan: ‘Zoova w’a fa sran uflɛ kɛ ɔ sie Izraɛli nvle’n.’

I sin’n, Saili yoli ɲin kekle ekun. Ɔ maan Samiɛli seli i kɛ: ‘Aɲinyiɛ’n flunman tra bua’m be lui’n. Kɛ mɔ a yili Zoova i ndɛ’n i blo’n, i ti i kusu ɔ́ wá yí wɔ blo wie.’

Ndɛ nga man e afɔtuɛ kpa kun. Ɔ kle e kɛ Zoova i ndɛ’n su falɛ cɛn kwlakwla’n ti like cinnjin kpa. Ɔ kle ekun kɛ sran nga laa i ayeliɛ’n ti kpa kɛ Saili i ayeliɛ’n sa’n, ɔ kwla kaci yo ayeliɛ tɛ. E kunndɛman kɛ é káci i sɔfuɛ. ?Nɛ́n i ɔ?

1 Samiɛl ndɛ tre 9 lele 11;13:5-14; 14:47-52; 15:1-35;2 Samiɛl 1:23.



Kosan mun

  • ?Ngue yɛ Samiɛli su yo i desɛn’n su wa ɔ? ?Yɛ ngue ti ɔ?
  • ?Ngue ti yɛ Zoova klo Saili ɔ? ?Yɛ, sran’n i wafa benin yɛle Saili?
  • ?Be flɛ Saili i wa yasua’n sɛ? ?Yɛ ngue yɛ i wa sɔ’n yoli ɔ?
  • ?Ngue ti yɛ Saili w’a minndɛman Samiɛli mɔ i bɔbɔ yili tɛ’n niɔn?
  • ?Afɔtuɛ benin yɛ Saili i ndɛ’n man e ɔ?

Kosan nga be klɛ uka su’n

  • Kanngan 1 Samiɛl 9:​15-​21 nin 10:​17-​27 nun.

    ?Kɛ sran wie’m be kannin Saili i wun ndɛ tɛ’n, wafa sɛ yɛ i ayeliɛ wɛtɛɛ’n ukɛli i maan w’a yoman nzaje sa ɔ? (1 Sam. 9:​21; 10:​21, 22, 27; Nya. 17:27)

  • Kanngan 1 Samiɛl 13:​5-​14 nun.

    ?Sa tɛ onin yɛ Saili yoli i Gilgali lɔ ɔ? (1 Sam. 10:8; 13:​8, 9, 13)

  • Kanngan 1 Samiɛl 15:​1-​35 nun.

    ?Amalɛki famiɛn Agagi i su ndɛ nun’n, ngue sa tɛ kpa yɛ Saili yoli ɔ? (1 Sam. 15:​2, 3, 8, 9, 22)

    ?Wafa sɛ yɛ Saili waan ɔ́ sí i sa nga ɔ yoli’n i su akplowa naan ɔ́ kpálo afɔtuɛ’n niɔn? (1 Sam. 15:24)

    ?Kɛ bé mán e afɔtuɛ’n, ndɛ benin yɛ e kwla fa tu e wun fɔ nun andɛ ɔ? (1 Sam. 15:​19-​21; Jue. 141:5; Nya. 9:​8, 9; 11:​2)