I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 50: Bla yakpafuɛ nɲɔn

Ndɛ 50: Bla yakpafuɛ nɲɔn

KƐ Izraɛlifuɛ’m be ɲin ko mian’n, nn be su kpan flɛ Zoova. Yɛ Zoova kusu blɛ be ɲrun dunfuɛ yakpafuɛ mun kɛ be de be. Biblu’n nun’n, be flɛ be ɲrun dunfuɛ sɔ mun kɛ jɔlɛ difuɛ. Zozie yɛ ɔ yoli jɔlɛ difuɛ klikli’n niɔn, kpɛkun Ɔtniɛli nin Eidi nin Zamgali be wa bɛli i sin kasiɛn. Sanngɛ nvlefuɛ nga be ukali Izraɛlifuɛ mun’n, be nun nɲɔn ti bla. Be flɛ be kɛ Debora ɔ nin Zaɛli.

Debora su kan ndɛ kle Baraki.

Debora ti Ɲanmiɛn nuan ijɔfuɛ. Be ɲrun lɔ sa nga bé wá jú’n, Zoova kan kle Debora, kpɛkun i kusu kan kle nvlefuɛ mun. Debora kunngba’n ti jɔlɛ difuɛ. Oka mɛn’n nun lɔ mme kun i bo yɛ ɔ tran di jɔlɛ’n niɔn. Nvlefuɛ’m be kɔ i ja su yɛ ɔ siesie be ndɛ mun ɔn.

I blɛ sɔ nun’n, nn Zabɛn yɛ ɔ ti Kanaan famiɛn’n niɔn. I kunngba sa nun kakaklolo ya ngwlan (900). I alɛ kunfuɛ’m be wunmiɛn nga be le i ti’n, Izraɛlifuɛ’m be miannin be sa nun yɛ be kacili Zabɛn i sufuɛ. Zabɛn i alɛ kunfuɛ’m be su kpɛn’n suan Sizɛra.

Le kun Debora sunmannin sran kɛ be ko flɛ Baraki m’ɔ ti jɔlɛ difuɛ’n, yɛ ɔ se i kɛ: ‘Ndɛ nga Zoova wan n kan kle wɔ’n yɛ: ‘Fa sran akpi blu (10.000) naan fa be kɔ Tabɔr oka’n su lɔ. Ń wá cúɛn Sizɛra ń bá ɔ wun lɛ. Kpɛkun ń wá fɛ́ i nin i alɛ kunfuɛ mun mán wɔ lɛ.’

Baraki tɛli Debora su kɛ: ‘Sɛ a ko sunman min’n, yɛ ń kɔ́ ɔ.’ Debora ko sunmɛnnin i sanngɛ ɔ seli Baraki kɛ: ‘A su ɲanman ɲrun alɛ sɔ’n nun afin bla sin i sa nun yɛ Zoova fá Sizɛra wlá ɔ.’ Ndɛ nga Debora kannin’n, ɔ kpɛnnin su.

Baraki fin Tabɔr oka’n su lɔ jrali naan ɔ nin Sizɛra i alɛ kunfuɛ’m b’a ko yia nun. É bó e ɲin ɔn, Zoova w’a yo maan nzue dan kun wa dili lika’n, naan w’a kun Sizɛra i alɛ kunfuɛ’m be dan lika. Sizɛra liɛ’n, ɔ fin i kakaklolo nun jrali wanndili i ja nun.

Baraki, Zaɛli, yɛ Sizɛra

Kɛ ɔ cɛli kan’n, Sizɛra ko toli Zaɛli i tannin sua’n nun lɔ. Bla’n sikeli i naan w’a mɛn i nɔnnɔn w’a nɔn. Kɛ ɔ nɔnnin nɔnnɔn’n, lafilɛ kunnin i, yɛ i osu m’ɔ cɛ kaan, ɔ lafili kpa sa bɔ gbɔɔ! Yɛ Zaɛli fali waka ti piembie kun fa boboli bian tɛfuɛ sɔ’n i ti nun ɔn. I sin kɛ Baraki bali’n, Zaɛli kleli i Sizɛra i fuɛn’n! ?An wunman kɛ ndɛ nga Debora kannin’n yoli nanwlɛ’n?

I awieliɛ su’n, be kunnin famiɛn Zabɛn bɔbɔ’n wie naan Izraɛlifuɛ’m b’a ɲan alaje kan ekun.

Jɔlɛ Difuɛ Mun 2:14-22; 4:1-24; 5:1-31.



Kosan mun

  • ?Wan yɛle jɔlɛ difuɛ mun? ?Yɛ be nun klikli’n i dunman’n yɛle benin?
  • ?Junman ngunmin kun benin yɛ Debora le i ɔ? ?Yɛ i sɔ’n i bo’n yɛle benin?
  • ?Kɛ famiɛn Zabɛn, ɔ nin sonja’m be su kpɛn Sizɛra be waan bé fá alɛ bé wlɛ́ i Izraɛlifuɛ’m be sin’n, ngue ndɛ yɛ Zoova fa wlali Debora nuan kɛ ɔ kan kle jɔlɛ difuɛ Baraki ɔ? ?Yɛ wan yɛ i waan ɔ́ ɲán ɲrun alɛ sɔ’n nun ɔn?
  • ?Wafa sɛ yɛ Zaɛli kleli kɛ ɔ ti bla yakpafuɛ ɔ?
  • ?Kɛ be kunnin famiɛn Zabɛn’n, ngue yɛ ɔ juli ɔ?

Kosan nga be klɛ uka su’n

  • Kanngan Jɔlɛ Difuɛ Mun 2:14-22 nun.

    ?Wafa sɛ yɛ Izraɛlifuɛ’m be yoli mɔ Zoova i ya’n guali be su ɔ? ?Yɛ wafa sɛ yɛ e kwla fa tu e wun fɔ nun ɔn? (Jɔl. 2:20; Nya. 3:1, 2; Eze. 18:21-23)

  • Kanngan Jɔlɛ Difuɛ Mun 4:1-24 nun.

    ?Wafa sɛ yɛ andɛ Klistfuɛ bla’m be kwla nian Debora nin Zaɛli be Ɲanmiɛn sulafilɛ, ɔ nin be yakpa yolɛ’n su ɔ? (Jɔl. 4:4, 8, 9, 14, 21, 22; Nya. 31:30; 1 Kor. 16:13)

  • Kanngan Jɔlɛ Difuɛ Mun 5:1-31 nun.

    ?Armagedɔn alɛ i balɛ nun’n, wafa sɛ yɛ e kwla fa Baraki nin Debora be kwlalɛ jue’n e yo e Ɲanmiɛn srɛlɛ like ɔ? (Jɔl. 5:3, 31; 1 Nyo. 16:8-10; Ngl. 7:9, 10; 16:16; 19:19-21)