I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 42: Aflunmun kun ijɔli

Ndɛ 42: Aflunmun kun ijɔli

?AMUN a ti i kɛ aflunmun w’a ijɔ le? ‘Cɛcɛ, nnɛn kwlá ijɔman,’ i sɔ cɛ yɛ amún sé ɔ. Sanngɛ Biblu’n nun’n, be kan aflunmun kun m’ɔ ijɔli i ndɛ. Amun e nian kɛ i sɔ’n fa yoli’n.

Anzi kun

Izraɛlifuɛ’m b’a mantan Kanaan mɛn’n i wun koko kpa lɔ. Srɛ kpa nga ɔ su kun Balaki m’ɔ ti Moabu famiɛn’n sa’n, ɔ timan kaan. I sɔ ti’n, ɔ sunmannin sran kɛ be ko yia Balaamu gblɛfuɛ’n, kɛ ɔ bla w’a bo Izraɛlifuɛ’m be sannzan mɛn i. Naan sɛ Balaamu kplin su ɔ, ɔ mɛn i sika lɔun kpa. Kpɛkun yɛ Balaamu fuli i aflunmun’n su naan w’a fa Balaki i klɔ atin’n.

Zoova kloman kɛ Balaamu bo i Nvlefuɛ’m be sannzan. I sɔ ti’n, ɔ sunmannin i anzi kun kɛ ɔ wɔ ko bu Balaamu i ɲrun naan ɔ kɛtɛ i atin. Tokofi tɛnndɛn kun o anzi sɔ’n i sa nun. Balaamu kwlá wunman anzi’n. Sanngɛ i aflunmun’n wun i. Ɔ maan aflunmun’n yacili atin’n lɛ, ɔ su sin bo’n nun. I agualiɛ su’n, ɔ tɔli asiɛ wun gblo atin’n su. Balaamu fali ya dan kpa, yɛ ɔ fɛli i waka’n naan w’a bo i aflunmun’n.

Yɛ Zoova maan Balaamu tili i aflunmun’n i ijɔlɛ’n niɔn. Ɔ usali Balaamu kɛ: ‘?Nzu like yɛ n yoli wɔ ti yɛ maan a bo min sɔ ɔ?’

Balaamu ti aflunmun kun su.

Balaamu tɛli i su kɛ: ‘Finfin mɔ a yo min ti ɔ. Sɛ ɔ ti kɛ tokofi o min sa nun wuun n kunnin wɔ lalaa.’

Aflunmun’n usɛli kɛ: “?M’an yo wɔ kɛ nga sa le?”

Balaamu tɛli i su kɛ: “Cɛcɛ.”

Yɛ Zoova tikeli Balaamu i ɲinma’n naan w’a wun anzi m’ɔ jin atin’n i afiɛn’n nin i sa nun tokofi’n. Anzi usɛli i kɛ: ‘?Ngue ti yɛ a boli wɔ aflunmun’n niɔn? N bali ɔ ɲrun bulɛ kɛ ɔ ko yo naan w’a boman Izraɛlifuɛ’m be sannzan’n ti. Sɛ ɔ ti kɛ wɔ aflunmun’n w’a ciɛmɛn i wun’n wuun n kunnin wɔ lalaa sanngɛ n yacili i lɛ.’

Balaamu waan: ‘M’an fɔn, n siman kɛ a jin min ɲrun atin’n nun.’ Anzi’n yacili Balaamu nun ɔli ko toli Balaki. Balaamu kunndɛli kɛ ɔ́ bó Izraɛlifuɛ’m be sannzan sanngɛ Zoova maan muae klanman yɛ ɔ boli mannin Izraɛlifuɛ mun lele kpɛ nsan ɔn.

Kalɛ 21:21-35; 22:1-40; 23:1-30; 24:1-25.



Kosan mun

  • ?Wan yɛle Balaki? ?Yɛ ngue ti yɛ ɔ sunmannin sran kɛ be ko flɛ Balaamu ɔ?
  • ?Ngue ti yɛ Balaamu i aflunmun’n lali atin’n nun ɔn?
  • ?Ngue ndɛ yɛ Balaamu tili kɛ i aflunmun su kan ɔn?
  • ?Ngue ndɛ yɛ anzi kun kan kle Balaamu ɔ?
  • ?Kɛ Balaamu waan ɔ́ bó Izraɛlifuɛ’m be sannzan’n, ngue sa yɛ ɔ juli ɔ?

Kosan nga be klɛ uka su’n

  • Kanngan Kalɛ 21:21-35 nun.

    ?Ngue ti yɛ Izraɛlifuɛ’m be kwlali Siɔn m’ɔ ti Amɔrfuɛ’m be Famiɛn’n, nin Ɔg m’ɔ ti Bazan Famiɛn’n niɔn? (Kal. 21:21, 23, 33, 34)

  • Kanngan Kalɛ 22:1-40 nun.

    ?Ngue like ti yɛ Balaamu waan ɔ́ bó Izraɛlifuɛ’m be sannzan’n niɔn? ?Wafa sɛ yɛ e kwla fɛ i sɔ’n e tu e wun fɔ nun ɔn? (Kal. 22:16, 17; Nya. 6:16, 18; 2 Piɛ. 2:15; Zid 11)

  • Kanngan Kalɛ 23:1-30 nun.

    ?Kannzɛ bɔbɔ Balaamu ijɔli kɛ Zoova i sufuɛ kun sa’n, sanngɛ wafa sɛ yɛ i ayeliɛ’n kleli kɛ ɔ timan Ɲanmiɛn sufuɛ ɔ? (Kal. 23:3, 11-14; 1 Sam. 15:22)

  • Kanngan Kalɛ 24:1-25 nun.

    ?Wafa sɛ yɛ Biblu’n nun ndɛ nga, ɔ yo maan e lafi su tankaan kpa kɛ Zoova i like kwlaa nga i waan ɔ́ yó’n, saan ɔ́ yó be’n niɔn? (Kalɛ 24:10; Ezai 54:17)