I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 41: Aaba wuo

Ndɛ 41: Aaba wuo
Moizi nin aaba wuo’n

?LIKE nga ɔ blabla waka’n wun lɛ’n ɔ ti wuo jrɛiin sakpa? Cɛcɛ. Nán wuo kpa ɔ, aaba wuo ɔ. Zoova yɛ ɔ seli Moizi kɛ ɔ yo fa sie i nglo naan i liɛ’n, sɛ nvlefuɛ’m be niɛn i lɔ’n, be su wuman. Sanngɛ wuo nga be o asiɛ wun’n, be liɛ be ti wuo jrɛiin. B’a kaka Izraɛlifuɛ kpanngban kpa, i ti b’a tɔ i wun tukpaciɛ. ?Sanngɛ amun si like ti’n?

Izraɛlifuɛ’m be kannin Ɲanmiɛn nin Moizi be wun ndɛ tɛtɛ ti ɔ. Be waan: ‘?Nzu ti yɛ amun ko fali e Ezipti lɔ kɛ e wa wu aawlɛ flɛnnɛn nga nun wa ɔ? Be ɲanman aliɛ wa, be ɲanman nzue wa. Yɛ mani’n w’a flan e.’

Sanngɛ kusu nán aliɛ tɛ yɛle mani’n. Zoova bɔbɔ yɛ ɔ yili atrɛ mannin be aliɛ sɔ’n niɔn. Nzue bɔbɔ nga be nɔn’n, atrɛ yɛ Zoova yili mannin be ɔ. Sanngɛ i ngba ngalɛ nun’n, nvlefuɛ’m b’a laman Zoova ase. W’a yoman be fɛ. I sɔ ti yɛ maan Zoova sunmannin wuo mɔ be le bɔyre tɛtɛ kpa’n kɛ be wa kaka be’n niɔn. Wuo’m be kakali Izraɛlifuɛ mun kpa, naan be nun sunman b’a wu.

Izraɛlifuɛ nga wuo’m be kali be’n.

I sin naan nvlefuɛ’m b’a ko to Moizi. Be wa seli i kɛ: ‘E fɔnnin, afin e kannin Ɲanmiɛn nin wɔ amun wun ndɛ tɛtɛ. Yaci, kpata Ɲanmiɛn man e naan ɔ fuan wuo nga mun.’

Ɔ maan Moizi srɛli nvlefuɛ’m be ti. Yɛ Zoova seli i kɛ ɔ yo aaba wuo nga ɔ. Ɔ seli i kɛ ɔ fa sie i waka kun su, naan sɛ wuo ka sran kun’n, ɔ nian aaba wuo sɔ’n. Moizi niannin ndɛ nga Zoova kannin’n su yoli. Kpɛkun sran kwlaa nga wuo kɛ i naan ɔ nian aaba wuo’n, ɔ yo juejue.

Ndɛ ngalɛ’n man e afɔtuɛ kun. Yɛle kɛ e ngba’n, e ti kɛ Izraɛlifuɛ nga wuo’m be kakali be’n sa. Wie’n wo e kwlaa e su. Sran kwlaa nga e nin be tran’n, be yo kpɛnngbɛn, be tɔ tukpaciɛ kpɛkun be wu. E nannan klikli Adam nin Ɛvu, be sin mɔ be kacili be sili Zoova’n, mɔ e kusu e ngba’n e ti be mma mun, i ti yɛ ɔ ti sɔ ɔ. Sanngɛ Zoova mannin e anannganman nguan’n i wun atin.

Zoova sunmannin i Wa Zezi Klist asiɛ’n su wa. Be kunnin i waka kun su, afin sran sunman be tɔnnin i suɛn kɛ ɔ ti sran tɛfuɛ. Sanngɛ Zoova fali Zezi mannin e kɛ ɔ de e ti. Sɛ e kpɛ e ɲin Zezi i wun lɔ’n, naan sɛ e fɛ i atin’n su’n, e kwla ɲan anannganman nguan. Sanngɛ kɛ é wá jú e ɲrun lɔ’n, é súan Zezi i su ndɛ kpanngban.

Kalɛ 21:4-9; Zan 3:14, 15.



Kosan mun

  • ?Ngue like yɛlɛ nga ɔ blabla waka’n wun desɛn’n su lɛ’n? ?Yɛ ngue ti yɛ Zoova seli Moizi kɛ ɔ fa sie i lɛ ɔ?
  • ?Wafa sɛ yɛ nvlefuɛ’m b’a siman like kwlaa nga Ɲanmiɛn fa mannin be’n, i su ye ɔ?
  • ?Kɛ Zoova fali wuo nga be le bɔyre tɛtɛ kpa’n bali Izraɛlifuɛ’m be fɔ tulɛ’n, ngue ndɛ yɛ be kan kleli Moizi ɔ?
  • ?Ngue ti yɛ Zoova seli Moizi kɛ ɔ yo aaba wuo’n niɔn?
  • ?Afɔtuɛ benin yɛ ndɛ ngalɛ’n man e ɔ?

Kosan nga be klɛ uka su’n

  • Kanngan Kalɛ 21:4-9 nun.

    ?Ninnge nga Zoova siesie fa man e’n be nun’n, wafa sɛ yɛ e kwla fa Izraɛlifuɛ’m be ijɔlɛ’n e tu e wun fɔ nun ɔn? (Kal. 21:5, 6; Rɔm. 2:4)

    ?Laa blɛ liɛ nun’n, ngue yɛ Izraɛlifuɛ’m be fali aaba wuo’n be yoli ɔ? ?Yɛ ajalɛ benin yɛ Famiɛn Ezekiasi fali ɔ? (Kal. 21:9; 2 Fam. 18:1-4)

  • Kanngan Zan 3:14, 15 nun.

    ?Wafa sɛ yɛ aaba wuo nga be sieli i waka’n su’n, ɔ ti Zezi i waka’n su bobolɛ’n nzɔliɛ like ɔ? (Gal. 3:13; 1 Piɛ. 2:24)