I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 39: Aarɔn i kpɔnman’n bo nɲrɛ

Ndɛ 39: Aarɔn i kpɔnman’n bo nɲrɛ

AN NIAN kpɔnman nga, w’a fɛfɛ, w’a bo nɲrɛ yɛ w’a su mma. Aarɔn i kpɔnman’n niɔn. I fɛfɛlɛ’n nin i nɲrɛ bolɛ’n, nin i sulɛ’n, ɔ yoli kɔnguɛ kunngba’n nun! ?Ngue ti yɛ abonuan sa sɔ’n yoli ɔ?

Moizi su fa kpɔnman mɔ w’a bo nɲrɛ’n man Aarɔn.

Izraɛlifuɛ’m be wlannin aawlɛ flɛnnɛn nun i osu w’a cɛ kan. Wie’m be kloman kɛ Moizi yo be su kpɛnngbɛn, naan Aarɔn kusu yo be Ɲanmiɛn ɲrun jranfuɛ’m be su kpɛn. Kɔre, Datan, Abiramu ɔ nin Izraɛlifuɛ’m be nun sran ya nɲɔn nin ablenun (250) mɔ be ti awlobo kpɛnngbɛn’n, be jrannin be nga be jasoli Moizi nin Aarɔn be wun’n, be sin. Be wa sin yiali Moizi naan b’a se i kɛ: “?Ɔ yo sɛ ti yɛ amun bu amun wun kɛ amun kpa tra Anannganman i sran’m be kwlaa’n niɔn?”

Moizi seli Kɔre nin be nga be su i su’n be kɛ: ‘Ainman nglɛmun amun fa ansan nin sɛnmlɛn guawlɛ ninnge mun, amun gua be nun sɛnmlɛn naan amun fa be sie Zoova i suwlɛ sua’n i ɲrun. Kpɛkun é wá wún sran nga Zoova kpɛli i’n, m’ɔ ti i liɛ klonglo’n.’

Kɛ aliɛ cɛnnin’n, Kɔre nin sran 250, ɔ nin nzrafuɛ wie mɔ be jin be sin’n, be ko jrannin Ɲanmiɛn suwlɛ sua’n i ɲrun lɛ. Zoova fali be wun ya dan kpa. Naan w’a se kɛ: ‘Amun cuɛn amun wun amun wɔ sran tɛtɛ nga’m be tannin sua liɛ’n i wun mmua.’ Moizi kan guali su kɛ: ‘Nán amun kan be sa nun like fi. Yɛ nvlefuɛ’m be jasoli kan Kɔre nin Datan, ɔ nin Abiramu be tran lɛ’n niɔn.’

I sin’n, Moizi seli kɛ: ‘Amún wá wún sran nga Zoova sunmɛnnin i’n. Kpɛkuun asiɛ’n wá kpáci ɔ mɛn sran tɛtɛ nga mun.’

Kɛ Moizi i nuan’n tɔli cɛ’n, kpɛkun kplalala, asiɛ’n nun w’a kpaci be bo. Ɔ mɛnnin Kɔre i tannin sua’n, ɔ nin Datan nin Abiramu be minniɛn liɛ mun ɔ nin be bo ninnge kwlaa. Kɛ asiɛ’n mɛ́n be mɔ Izraɛlifuɛ nga be mantan be wun koko lɛ’n be tili be kpanlɛ’n, srɛ wa kunnin be dan kpa. Naan b’a se kɛ: ‘E wanndi, nán maan asiɛ’n mɛn e wie.’

Kɛ ɔ́ yó sɔ’n nn Kɔre nin i sran 250 be jin Ɲanmiɛn suwlɛ sua’n i ɲrun lɛ. Zoova yoli maan sin taaman kun fin i wun lɔ, ɔ wa jrali sran sɔ’m be su yrali be kɔlikɔli. I sin’n, Zoova seli Aarɔn i wa Eleazali kɛ ɔ yiyi be nga be wuli’n be sɛnmlɛn guawlɛ ninnge mun, naan ɔ fa yo like paplaapla mun naan be fa kata i tɛ yiwlɛ lika’n i wun. I sɔ like nga be fa kɛtɛ i tɛ yiwlɛ’n i wun’n, ɔ kpɛn Izraɛlifuɛ’m be wla kɛ sran nga ɔ timan Aarɔn i osu nun sran’n, ɔ leman atin yraman ansan Zoova i ɲrun.

Sanngɛ Zoova waan saan ɔ́ yí i nglo weiin klé be kɛ Aarɔn nin i osu’n nun sran mun yɛ be kwla di i ɲrun junman ɔn. I ti’n, ɔ seli Moizi kɛ: ‘Se Izraɛlifuɛ mun maan akpasua su kpɛnngbɛn’m be man ɔ kpɔnman kunngun be tinuntinun. Levi akpasua’n i kpɔnman liɛ’n, Aarɔn i dunman yɛ fa klɛ su ɔ. Yɛ fa kpɔnman sɔ mun sie be kan n yi min wun nglo n kle amun lɛ’n nun’n. Sie be min alaka mɔ mmla blu’n wo nun’n i ɲrun lɛ tannin sua’n nun lɔ. Sran nga ń fɛ́ i’n, yɛle sran nga i kpɔnman liɛ’n ɔ fɛfɛ’n.’

Kɛ aliɛ’n cɛnnin mɔ Moizi wluli tannin sua’n nun lɔ’n, ɔ́ nían ɔn, Aarɔn i kpɔnman’n w’a fɛfɛ w’a bo nɲrɛ, w’a su mma! ?Siɛn’n, amun si sa nga ti yɛ Zoova yoli mɔ Aarɔn i kpɔnman liɛ’n boli nɲrɛ sɔ’n?

Kalɛ 16:1-35; 17:1-26; 26:10.



Kosan mun

  • ?Wan mun yɛ be jasoli Moizi nin Aarɔn be ninnge siesielɛ’n wun’n niɔn? ?Yɛ ngue ndɛ yɛ be kan kleli Moizi ɔ?
  • ?Ngue ndɛ yɛ Moizi kan kleli Kɔre nin i sufuɛ ya nɲɔn ablenun (250) mun ɔn?
  • ?Moizi seli nvlefuɛ’m be sɛ? ?Yɛ kɛ i nuan tɔli cɛ’n, ngue sa yɛ ɔ juli ɔ?
  • ?Ngue sa yɛ ɔ juli Kɔre nin i sufuɛ ya nɲɔn ablenun’n (250) be su ɔ?
  • ?Ngue yɛ Aarɔn i wa Eleazar fali be nga be wuli’n be sɛnmlɛn guawlɛ ninnge mun yoli ɔ, yɛ ngue ti ɔ?
  • ?Ngue ti yɛ Zoova yoli mɔ Aarɔn i kpɔnman’n boli nɲrɛ ɔ (an nian desɛn’n su)?

Kosan nga be klɛ uka su’n

  • Kanngan Kalɛ 16:1-17:1-14 nun.

    ?Ngue yɛ Kɔre nin i sufuɛ’m be yoli ɔ? ?Yɛ ngue ti yɛ i sɔ’n ti Zoova i ninnge nga ɔ siesieli’n be wun jasolɛ ɔ? (Kal. 16:9, 10, 18; Sau. 10:1, 2; Nya. 11:2)

    ?Angunndan tɛ benin yɛ Kɔre nin sran “kaklaakla nin awlobo kpɛnngbɛn” ya nɲɔn ablenun’n (250), be buli ɔ? (Kal. 16:1-3; Nya. 15:33; Eza. 49:7)

  • Kanngan Kalɛ 17:16-26 yɛ 26:10 nun.

    ?Ngue yɛ Aarɔn i kpɔnman nga ɔ fɛfɛli boli nɲrɛ’n, ɔ kle ɔ? ?Yɛ ngue ti yɛ Zoova seli kɛ be fa sie i alaka’n nun ɔn? (Kal. 17:20, 23, 25)

    ?Ngue ajalɛ cinnjin yɛ e kwla suɛn i Aarɔn i kpɔnman nga ɔ fɛfɛli boli nɲrɛ lɛ’n i su ɔ? (Kal. 17:25; Yol. 20:28; Fil. 2:14; Ebr. 13:17)