I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 38: Lika kpla nianfuɛ mun

Ndɛ 38: Lika kpla nianfuɛ mun
Waka mma’m be o lika kpla nianfuɛ nɲɔn’n be wati.

WAKA mma nga’m be ti dandan o! I kpatrɛ’n timan kaan. Ɔ ti gbuyrɔ. Grenadie mma nin figie mma’m be o nun. Be fa be ukali viɲi mma kpatrɛ kun su. Kɛ mɔ be yo nɔnnin’n, be fa be sieli i waka flolo wie su naan sran nɲɔn b’a kwla sua. ?Waka mma kpakpa sɔ’m be fin nin? Be fin Kanaan mɛn’n nun lɔ. Nán e wla fi su kɛ Kanaan mɛn’n nun lɔ yɛ Abraamu, Izaaki nin Zakɔbu be trannin laa ɔ. Awe m’ɔ kpɛnnin klɔ sɔ’n su’n ti Zakɔbu nin i bo mma’m be tuli lɔ be ko trannin Ezipti mɛn’n nun lɔ. I sin’n, kɛ ɔ dili afuɛ ya nɲɔn afuɛ blu nin nsiɛn’n (216), Moizi nin Izraɛlifuɛ’m be sali be sin Kanaan mɛn nun lɔ ekun. B’a ju Kadɛsi aawlɛ flɛnnɛn nun.

Kanaanfuɛ’m be ti sa tɛtɛ yofuɛ. Ɔ maan Moizi sunmannin sran blu nin nɲɔn (12) kɛ be ko kpla mɛn sɔ’n be nian. Ɔ seli be kɛ: ‘Amun nian kɛ mɛn sɔ’n i nunfuɛ’m be fa ti’n. Sɛ be le wunmiɛn o, sɛ be leman wunmiɛn o, sɛ be sɔnnin o, sɛ b’a sɔnman o, amun nian kɛ be asiɛ’n fa ti’n, sɛ be yo su like ɔ yo kpa o, sɛ kusu be yo su like ɔ, ɔ yoman kpa o. Kɛ amún sá amun sin’n, amun fa mɛn sɔ nun waka mma wie’m be bla.’

Kɛ lika kpla nianfuɛ’m be fin Kadɛsi lɔ bali’n, be seli Moizi’n kɛ: ‘Nanwlɛ, ɔ ti mɛn kun m’ɔ ti klanman ɔn.’ Kɛ ɔ ko yo naan Moizi w’a kpɛ be nanwlɛ’n i bo’n w’a nian ti’n, be fali lɔ waka mma wie’m be wa kleli i. Sanngɛ be nun sran blu (10) be seli kɛ: ‘Mɛn sɔ’n nun sran’m be ti tinwa, be ti jajraajra ngunmin. Sɛ e waan é kó trán nun’n, saan bé kún e.’

I sɔ ndɛ mɔ be kannin’n, ɔ wlali Izraɛlifuɛ’m be srɛ. Ɔ maan be seli kɛ: ‘?Ngue sa yɛle nga? Sɛ e wuli Ezipti mɛn’n nun lɔ’n annzɛ aawlɛ flɛnnɛn’n nun lɔ’n, wuun ɔ flunman!’ Be seli ekun kɛ: ‘Alɛ’n dí e mlɔnmlɔn. Kpɛkun e yi nin e mma’m bé káci kanga. E sie e su kpɛnngbɛn uflɛ kun Moizi ja nun, naan e sa e sin Ezipti lɔ!’

Sanngɛ lika kpla nianfuɛ’m be nun nɲɔn, Kalɛbu nin Zozie be lafili Zoova su. Be fɔnvɔli nzrafuɛ mun kɛ be gua be wla ase. Be seli be kɛ: ‘Nán srɛ kun amun, Zoova jin e sin, be lika’n wá yó e liɛ mlɔnmlɔn.’ Sanngɛ nvlefuɛ’m be bu be su nun waka, ɔ maan bé wá lé kún Kalɛbu nin Zozie bɔbɔ.

I lɛ’n w’a yoman Zoova fɛ, naan w’a se Moizi kɛ: ‘Amun nunfuɛ nga be lɛ afuɛ ablaɔn lele gua su’n, amun ja su tiaman Kanaan asiɛ’n su. Amun wunnin atrɛ nga n yili be Ezipti lɔ’n nin aawlɛ flɛnnɛn nun lɔ’n. Sanngɛ amun a lafiman n su. Ɔ maan i ti’n, amún wá wlán aawlɛ flɛnnɛn nun sa daan lele afuɛ ablanan. Ɔ́ yó sɔ lele saan amun fuɛn’m bé ká aawlɛ flɛnnɛn nun wa. Saan Zozie nin Kalɛbu cɛ yɛ bé wlú Kanaan mɛn’n nun lɔ ɔ.’

Kalɛ 13:1-33; 14:1-38.



Kosan mun

  • ?Wafa sɛ yɛ waka mma nga be o desɛn’n su lɛ’n be kpatrɛ’n ti ɔ? ?Yɛ be fin nin?
  • ?Ngue ti yɛ Moizi sunmannin sran blu nin nɲɔn (12) kɛ be ko kpla Kanaan klɔ’n be nian ɔn?
  • ?Kɛ be sali be sin’n, lika kpla nianfuɛ blu be seli Moizi sɛ?
  • ?Wafa sɛ yɛ lika kpla nianfuɛ nɲɔn’n be kleli kɛ be lafi Zoova su ɔ? ?Yɛ be flɛ be nɲɔn sɔ’n sɛ?
  • ?Ngue ti yɛ Zoova fali ya ɔ? ?Yɛ ɔ seli Moizi sɛ?

Kosan nga be klɛ uka su’n

  • ?Wan mun yɛ be kpali be kɛ be ko kpla klɔ’n be nian ɔn? ?Yɛ cenjele junman benin yɛ be ɲɛnnin i ɔ? (Kal. 13:2, 3, 18-20)

    ?Ngue ti yɛ Zozie nin Kalɛbu be angunndan bulɛ nin be nga’m be liɛ’n w’a yoman kun ɔn? ?Yɛ ajalɛ benin yɛ i sɔ’n kle e ɔ? (Kal. 13:28-30; Mat. 17:20; 2 Kor. 5:7)

    Kanngan Kalɛ 14:1-38 nun.

  • ?Asiɛ’n su wa Zoova i ja nunfuɛ’m be wun ijɔlɛ tɛtɛ i su afɔtuɛ benin yɛ ɔ fata kɛ e fa e ɲin e sie su ɔ? (Kal. 14:2, 3, 27; Mat. 25:40, 45; 1 Kor. 10:10)

    ?Wafa sɛ yɛ Kalɛ 14:24 kle kɛ Zoova fɛ i ɲin sie i sufuɛ’m be su be tinuntinun ɔn? (1 Fam. 19:18; Nya. 15:3)

    ?Wan mun yɛ be kpali be kɛ be ko kpla klɔ’n be nian ɔn? ?Yɛ cenjele junman benin yɛ be ɲɛnnin i ɔ? (Kal. 13:2, 3, 18-20)