I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 35: Zoova i mmla mun

Ndɛ 35: Zoova i mmla mun

KƐ Izraɛlifuɛ’m be tuli Ezipti lɔ’n, i anglo nɲɔn su’n, be wa juli Sinai oka’n mɔ be flɛ i Orɛbu’n i wun lɛ. Lika kunngba sɔ’n nun lɛ yɛ Zoova nin Moizi be ijɔli susrɛ’n nun’n niɔn. Be wa kpɛli be ngblaliɛ’n lɛ, yɛ be kali lɛ kan.

Moizi i ngunmin fuli oka’n su lɔ. Be onga be minndɛli i oka’n bo wa. Kɛ Moizi juli oka’n i ti su lɔ’n, Zoova seli i kɛ sɛ Izraɛlifuɛ’m be fa ndɛ nga ɔ kan kle be’n i su’n, ɔ́ fá be yó i nvle m’ɔ ti i liɛ klonglo’n. Moizi finnin oka’n su lɔ jrali, yɛ ndɛ nga Zoova kan kleli i’n, ɔ kannin kleli nvlefuɛ mun. Nvlefuɛ’m be kplinnin su kɛ bé nánti ndɛ nga Zoova kan kle be’n su, afin be klo kɛ bé káci Zoova i nvle.

Zoova yoli like sroesroe kun. Ɔ yoli maan sin wunsre kpikplikpi kun fiteli oka’n i ti su lɔ, kpɛkun ɲanmiɛn’n kpannin kplannankplannan. Yɛ ɔ seli nvlefuɛ’m be kɛ: ‘Zoova m’ɔ fali amun Ezipti lɔ fiteli’n, yɛle min.’ Ɔ kan guali su kɛ: ‘Nán amun su like uflɛ fi, saan min kunngba cɛ.’

Yɛbuɛ paplaapla nɲɔn’n

Ɔ mannin be mmla ngwlan ekun ukali su. Srɛ dan kpa kunnin nvlefuɛ mun, i ti be seli Moizi kɛ: ‘Ɔ bɔbɔ kan ndɛ’n kle ye. Nán Ɲanmiɛn bɔbɔ kan ndɛ kle ye kun. Sɛ w’a yoman sɔ’n é wú.’

I sin’n, Zoova seli Moizi kɛ: ‘Fu min sin oka’n su wa. Ń wá fá yɛbuɛ paplaapla mɔ n klɛli su mmla nga min waan nvlefuɛ’m be nanti su’n, ń fá mán wɔ.’ Moizi ɔli oka’n su lɔ ekun. Ɔ dili oka’n su lɔ cɛn ba klonglo ablanan, kɔnguɛ nin wia nun.

Mmla nga Zoova waan ɔ́ fá mɛ́n i nvlefuɛ mun’n, be sɔnnin kpa. Moizi klɛli be. Kpɛkun mmla blu nga Ɲanmiɛn bɔbɔ mannin nvlefuɛ mun’n, ɔ klɛli be yɛbuɛ paplaapla nɲɔn su fa mannin Moizi. Be yɛ be flɛ be mmla blu’n niɔn.

Moizi o Sinai oka’n su.

Kannzɛ bɔɔ mmla blu’m be ti cinnjin’n, sanngɛ kusu mmla i kwlaa nga Ɲanmiɛn fa mannin Izraɛlifuɛ’m be ti cinnjin wie. I nun kun yɛle nga: ‘Klo ɔ Min Ɲanmiɛn kpa, fa ɔ wla kwlaa guɛ i su, maan wɔ angunndan’n kwlaa ɔ nin ɔ wunmiɛn’n kwlaa trɛn i su.’ Yɛ i kun ekun yɛ: “Klo ɔ wiengu kɛ a fa klo ɔ bɔbɔ wun’n sa.” Zezi Klist m’ɔ ti Ɲanmiɛn i Wa’n, ɔ seli kɛ mmla nɲɔn sɔ’n yɛ be ti mmla nga Zoova mannin Izraɛlifuɛ mun’n be nun dan’n niɔn. É wá kán Zezi Klist bɔbɔ ɔ nin ninnge nga ɔ kleli be’n, be su ndɛ e ɲrun lɔ.

Ezipt Lɔ Tulɛ 19:1-25; 20:1-21; 24:12-18; 31:18; Mmla’n 6:4-6; Saun Yolɛ 19:18; Matie 22:36-40.



Kosan mun

  • ?Kɛ Izraɛlifuɛ’m be jasoli Ezipti lɔ m’ɔ dili anglo nɲɔn’n, ninfan yɛ be kpɛli be ngblaliɛ’n niɔn?
  • ?Ngue yɛ Zoova seli nvlefuɛ mun kɛ be yo ɔ? ?Yɛ be tɛli su sɛ?
  • ?Ngue ti yɛ Zoova mannin Moizi yɛbuɛ paplaapla nɲɔn ɔn?
  • ?Mmla uflɛ wie benin yɛ Zoova fa guali mmla blu’n su mannin Izraɛlifuɛ mun ɔn?
  • ?Mmla nɲɔn benin yɛ Zezi Klist seli kɛ be ti mmla’m be nun dan’n niɔn?

Kosan nga be klɛ uka su’n

  • Kanngan Ezipt Lɔ Tulɛ 19:1-25; 20:1-21; 24:12-18; yɛ 31:18 nun

    ?Wafa sɛ yɛ Ezipt Lɔ Tulɛ 19:8 i nun ndɛ’n ɔ uka e maan e wun Klistfuɛ kun i wun Ɲanmiɛn fa manlɛ’n, i wlɛ kpa ɔ? (Mat. 16:24; 1 Piɛ. 4:1-3)

  • Kanngan Mmla’n 6:4-6; Saun Yolɛ 19:18; Matie 22:36-40 nun.

    ?Wafa sɛ yɛ Klistfuɛ’m be yi Ɲanmiɛn klolɛ’n, ɔ nin be mantanfuɛ i klolɛ’n i nglo ɔ? (Mark 6:34; Yol. 4:20; Rɔm. 15:2)