Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 33: Jenvie’n i kpɛlɛ

Ndɛ 33: Jenvie’n i kpɛlɛ

?AMUN si like nga Moizi su yo i wa’n? Ɔ su fɛ i kpɔnman’n tinndin jenvie’n su. Izraɛlifuɛ’m be kwlaa b’a kpɛ jenvie’n. Sanngɛ nzue’n w’a kata Faraɔn nin i alɛ kunfuɛ’m be kwlaa be su. Amun e nian wafa nga ɔ fa yoli’n.

Ezipti sonja’m be su mlɔn jenvie’n nun.

Y’a dun mmua y’a wun i kɛ, kɛ ɲrɛnnɛn i blu su’n sinnin’n, Faraɔn fuannin Izraɛlifuɛ mun. Izraɛlifuɛ nga be ɔli’n, sɛ b’a kaman be nun bla nin ba kanngan mun’n, be yasua’m be ngunmin be kwla ju sran kɔe akpiakpi ya nsiɛn (600.000). Nvle uflɛ i nunfuɛ wie mun mɔ be lafili Zoova su’n, be nin be ɔli wie. Be kwlaa sɔ’n be nin be bua mun, ɔ nin be boli mun, ɔ nin be nannin mun yɛ be ɔli ɔ.

Be kɔlɛ su’n, Izraɛlifuɛ’m be srɛli Eziptifuɛ’m be tralɛ mun nin sika ɔkwlɛ ninnge mun ɔ nin jɛtɛ ufue ninnge mun. Srɛ dan m’ɔ kunnin be’n ɔ nin ɲrɛnnɛn m’ɔ tɔli be su’n ti’n, be fɛli i sɔ ninnge’m be kwlaa mannin be.

Kɛ Izraɛlifuɛ’m be tuli be bo Ezipti lɔ’n, ɔ dili le nɲɔn kun naan b’a ju jenvie’n i nuan lɔ. Be kpɛli be ngblaliɛ’n jenvie’n i nuan lɛ. I blɛ kunngba sɔ nun’n, blɛ yɛ Faraɔn nin i fuɛ’m be kusu, b’a wun i wlɛ kɛ b’a yo sa tɛ ɔ. Be seli kɛ: ‘?Ɔ yo sɛ ti yɛ e yacili e kanga’m be lɛ be ɔli ɔ?’

Faraɔn kacili i angunndan’n ekun. Ɔ kɛ i ja nun lɛ yiali i kakaklolo mun ɔ nin i alɛ kunfuɛ’m be nuan ndɛndɛ, naan be su Izraɛlifuɛ’m be su. Kpɛkun fuauun, yɛ be fali Ezipti mɛn’n nun kakaklolo’m be ngba’n be ɔli ɔ. Kakaklolo sɔ’m be nun ya nsiɛn (600) be ti kpakpa dan.

Kɛ Izraɛlifuɛ’m be wunnin kɛ Faraɔn nin i alɛ kunfuɛ’m be su be su’n, srɛ kunnin be dan kpa. Izraɛlifuɛ’m b’a ka jenvie’n nin Eziptifuɛ’m be afiɛn. Be wanndi ɔ, ɔ yoman ye kun. Yɛ Zoova fali sin wunsre tuun kpa yili Izraɛlifuɛ mun ɔ nin Eziptifuɛ’m be afiɛn, ɔ maan be bue nɲɔn’n b’a kwlá mantanman be wiengu.

Zoova seli Moizi kɛ ɔ tinngɛ i kpɔnman’n jenvie’n su. Kɛ Moizi yoli i sɔ’n, Zoova yoli maan aunmuan dan kpa kun finnin wia afiliɛ lɔ fitali. Ɔ suli nzue’n ɔli wa, ɔ suli ɔli wa, naan nzue’n i nun w’a kpɛ. Nzue’n wie jrannin be sa bɛ su yɛ i wie jrannin be sa fama su kɛ talɛ wie sa.

Yɛ Izraɛlifuɛ’m be nantili asiɛ wusiwusi’n su jenvie’n i afiɛn ɔn. Sran’m be cɛli jenvie’n i kpɛlɛ’n su kan naan b’a wie i kpɛ, afin be ti sran kɔe akpi sɔ lele akpi, yɛ be nin be nnɛn’m be kwlaa yɛ be nantili jenvie’n i afiɛn lele naan b’a ju i bue kun lɔ ɔ. Izraɛlifuɛ’m be wieli jenvie’n i kpɛ kwlaa naan Eziptifuɛ’m b’a kwla wun be ekun. Kɛ mɔ Eziptifuɛ’m be wunnin kɛ be kanga’m b’a wɔ’n, be suli be su nzue’n i afiɛn lɔ.

Ɲanmiɛn yoli maan be kakaklolo’m be ja’m be tutuli. Srɛ dan kpa kunnin Eziptifuɛ mun yɛ be kpannin be se kɛ: ‘Amun maan e wanndi Izraɛlifuɛ’m be ɲrun, afin Zoova m’ɔ o be sin’n yɛ ɔ nin e su kun ɔn.’ Sanngɛ be yo sa fi ɔ, ɔ yo man ye kun.

Zoova seli Moizi kɛ ɔ tinngɛ i kpɔnman’n jenvie’n su kɛ nga e wun i desɛn’n su lɛ’n sa. Kɛ Moizi yoli i sɔ’n, kpɛkun yɛ nzue’n m’ɔ jrannin kɛ talɛ wie sa’n, ɔ sɛli i sin i osu nun ɔn. Ɔ katali Eziptifuɛ mun ɔ nin be kakaklolo mɔ be fa fuannin Izraɛlifuɛ’m be kwlaa be su. Be nun ba kun sa w’a ɲanman nguan.

Delɛ mɔ Ɲanmiɛn deli be’n, ɔ yoli be fɛ’n dan. Be nun yasua mun be toli jue be manmannin Zoova. Be waan: ‘Zoova i kwlalɛ nga ɔ kwla’n leman wunsu. Ɔ toli nnɛn kpanngɔ mun nin be fufuɛ mun guɛli i jenvie’n nun lɔ.’ Moizi i niaan bla Miriamu fali klɛn ba kun, kpɛkun Izraɛli mmla’m be kwlaa be fali be klɛn ba liɛ mun, yɛ be sili able be suli i su aklunjuɛ nun ɔn. Be toli jue kunngba nga yasua’m be toli’n wie. Be toli i kɛ: ‘Zoova i kwlalɛ nga ɔ kwla’n leman wunsu. Ɔ toli nnɛn kpanngɔ mun nin be fufuɛ mun guɛli i jenvie’n nun lɔ.’

Ezipt Lɔ Tulɛ ndɛ tre 12 lele 15.



Kosan mun

  • ?Izraɛlifuɛ yasua mun nin bla mun, ɔ nin ba kanngan nga be jasoli Ezipti lɔ’n be ti sran nɲɛ? ?Yɛ wan mun yɛ be nin be jasoli Ezipti lɔ wie ɔ?
  • ?Kɛ Faraɔn yacili Izraɛlifuɛ’m be nun mɔ be ɔli’n, wafa sɛ yɛ ɔ wa yoli i ɔ? ?Yɛ ngue ajalɛ yɛ ɔ fali ɔ?
  • ?Ngue yɛ Zoova yoli naan Eziptifuɛ’m b’a faman alɛ b’a wlaman i nvle’n i sin’n niɔn?
  • ?Kɛ Moizi tinngɛli i kpɔnma’n jenvie’n su’n, ngue sa yɛ ɔ juli ɔ? ?Yɛ ngue yɛ Izraɛlifuɛ’m be yoli ɔ?
  • ?Kɛ Izraɛlifuɛ’m be sinnin mɔ Eziptifuɛ’m be suli be su jenvie’n i afiɛn’n, ngue yɛ ɔ juli ɔ?
  • ?Wafa sɛ yɛ Izraɛlifuɛ’m be kleli kɛ be o aklunjuɛ nun, naan be si delɛ nga Zoova deli be lɛ’n i su ye ɔ?

Kosan nga be klɛ uka su’n

  • Kanngan Ezipt Lɔ Tulɛ 12:33-36 nun.

    ?Wafa sɛ yɛ Zoova yoli maan i nvle’n ɲannin blɛ wunmuan nga ɔ dili i lomuɛn nun Ezipti lɔ’n, i su akatua ɔ? (Tul. 3:21, 22; 12:35, 36)

  • Kanngan Ezipt Lɔ Tulɛ 14:1-31 nun.

    ?Wafa sɛ yɛ Moizi i ndɛ nga ɔ o Ezipt Lɔ Tulɛ 14:13, 14 nun’n, ɔ ɲan ta Zoova i sufuɛ nga andɛ be minndɛ Armagedɔn alɛ’n be su ɔ? (2 Nyo. 20:17; Jue. 91:8)

  • Kanngan Ezipt Lɔ Tulɛ 15:1-8, 20, 21 nun.

    ?Ngue ti yɛ ɔ nin i fata kɛ Zoova i sufuɛ’m be to jue be mɛnmɛn i ɔ? (Tul. 15:1, 2; Jue. 105:2, 3; Ngl. 15:3, 4)

    ?Zoova i manmanlɛ nun’n, ajalɛ benin yɛ Miriamu nin bla nga be o jenvie nuan lɔ’n, be man andɛ Klistfuɛ bla mun ɔn? (Tul. 15:20, 21; Jue. 68:12)