I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 27: Ezipti famiɛn tɛ kun

Ndɛ 27: Ezipti famiɛn tɛ kun

MINNIƐN nga be o yɛ’n be su mianmian sran mun naan be di junman kekle kpa. ?Amun wunman kɛ bian’n su fa ngble’n bo junman difuɛ’m be nun kun’n? Zakɔbu i osu nunfuɛ mun yɛle junman difuɛ sɔ mun, be flɛ be kɛ Izraɛlifuɛ mun. Kpɛkun be mianmianfuɛ mun yɛle Eziptifuɛ mun. Izraɛlifuɛ’m be kacili Eziptifuɛ’m be kanga. ?Wafa sɛ yɛ ɔ yoli sɔ ɔ?

Eziptifuɛ’m be su kle Izraɛlifuɛ’m be ɲrɛnnɛn.

Zakɔbu i osufuɛ kpanngban sɔ’m be trannin fɔundi nun Ezipti lɔ afuɛ lɔun kpa. I blɛ sɔ nun’n, Zozɛfu mɔ yɛ ɔ ti Faraɔn i sin sran dan’n, ɔ niannin be lika. Sanngɛ siɛn’n Zozɛfu w’a wu. Kpɛkun Faraɔn uflɛ m’ɔ kloman Izraɛlifuɛ’m be sa’n, yɛ ɔ yoli Ezipti famiɛn’n niɔn.

Faraɔn tɛ sɔ’n ti maan Izraɛlifuɛ’m be kacili kanga. Kpɛkun sran nga ɔ fali be sie be su’n, be ti klunwifuɛ kpa. Be mian Izraɛlifuɛ’m be kɛ be di junman kekle naan be kplan Eziptifuɛ’m be klɔ mun. Sanngɛ Izraɛlifuɛ’m b’a yaciman trɛlɛ le. Kɛ i osu cɛli kan’n, srɛ wa kunnin Eziptifuɛ mun afin Izraɛlifuɛ’m be su trɛ trɛlɛ kpa, kpɛkun be wunmiɛn’n su yo dan.

Eziptifuɛ’m be su kle Izraɛlifuɛ’m be ɲrɛnnɛn.

?Amun si like nga Faraɔn yoli’n? Ɔ wlali Ebre bla nga be uka Izraɛlifuɛ’m be ba wulɛ nun’n be su nun kpa kɛ: ‘Ba kwlaa nga bé wú i’n, sɛ ɔ ti ba yasua’n, amun kun i.’ Sanngɛ bla sɔ’m be ti sran kpa, ɔ maan b’a kunman ba yasua mun.

I sɔ’n ti, Faraɔn wlali Eziptifuɛ’m be kwlaa be su nun kɛ: ‘Amun kun ba yasua kwlaa nga Izraɛlifuɛ’m be wu be’n. Sanngɛ amun yaci ba bla’m be lɛ.’ ?Nán like tɛ kpa kun yɛle nga ɔ seli be kɛ be yo i lɛ’n? Amun maan e nian wafa nga ba yasua sɔ’m be nun kun fiteli nun’n.

Ezipt Lɔ Tulɛ 1:6-22.



Kosan mun

  • ?Desɛn’n su’n, wan yɛle sran nga ngble o i sa nun lɛ’n? ?Yɛ wan yɛ be su bo i lɛ’n niɔn?
  • ?Kɛ Zozɛfu wuli’n, ngue sa yɛ ɔ tɔli Izraɛlifuɛ’m be su ɔ?
  • ?Ngue ti yɛ Izraɛlifuɛ’m be wun srɛ wa kunnin Eziptifuɛ mun ɔn?
  • ?Ngue ndɛ yɛ Faraɔn kan kleli bla nga be uka Izraɛlifuɛ’m be ba wulɛ nun’n niɔn?

Kosan nga be klɛ uka su’n

  • Kanngan Ezipt Lɔ Tulɛ 1:6-22 nun.

    ?Wafa sɛ yɛ nda nga Zoova tali Abraamu’n, ɔ boli i yolɛ bo ɔ? (Tul. 1:7; Bob. 12:2; Yol. 7:17)

    ?Wafa sɛ yɛ Ebre ba wufuɛ’m be kleli kɛ be bu nguan’n i like dan ɔn? (Tul. 1:17; Bob. 9:6)

    ?Wafa sɛ yɛ Zoova mɔ b’a kpɔcimɛn i ti’n, ba wufuɛ sɔ’m be ɲannin suyralɛ ɔ? (Tul. 1:20, 21; Nya. 19:17)

    ?Wafa sɛ yɛ Satan wlɛli i wun ase yoli naan nda nga Zoova tali Abraamu i afinliɛ nunfuɛ mun’n w’a kpɛnman su ɔ? (Tul. 1:22; Mat. 2:16)