Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 20: Sa w’a ɲan Dina

Ndɛ 20: Sa w’a ɲan Dina

?AMUN wun sran nga Dina su kɔ be wun lɔ lɛ’n? Kanaan nvle nun talua mun ɔn. ?I sɔ’n yó i si Zakɔbu i fɛ? Sɛ amun kunndɛ kɛ amún tɛ́ kosan sɔ’n su’n, wafa nga Abraamu nin Izaaki be bu Kanaan bla mun’n, maan amun wla kpɛn su.

Dina su kɔ Kanaan talua’m be wun lɔ.

?Abraamu kloli kɛ i wa Izaaki ja Kanaan nvle nun bla? Cɛcɛ, w’a klomɛn i sɔ. ?Izaaki nin Rebeka be kloli kɛ be wa Zakɔbu ja Kanaan nvle nun bla? Cɛcɛ, b’a klomɛn i sɔ. ?Amun si like ti’n?

Afin Kanaanfuɛ’m be ti amuɛn sɔfuɛ ti ɔ. Nán sran m’ɔ fata kɛ be ja be yɛle sran sɔ mun. Kpɛkun be timan sran mɔɔ be nin be kwla tra janvuɛ ɔ. Ɔ maan e kwla wun i weiin kɛ ɔ su yoman Zakɔbu i fɛ kɛ i wa bla’n nin Kanaan talua’m be tra janvuɛ.

Nga liɛ’n, ɔ cɛ’n, ɔ cɛ ngbɛn ɔn, saan kɛ sa ɲán Dina bɔɔ le. ?Amun wun desɛn’n su lɛ Kanaan bian nga ɔ nian Dina siin lɛ’n? Be flɛ i Sisɛmu. Cɛn kun, Dina ɔli mɛn sɔ nun lɔ talua’m be wun wunlɛ. Kpɛkun Sisɛmu trali Dina, ɔ nin i be lali kekle nun. I sɔ ayeliɛ’n ti tɛ, afin saan bla nin yasua nga b’a ja’n, be ngunmin cɛ yɛ be kwla si sua ɔ. Like tɛ sɔ mɔɔ Sisɛmu yoli Dina’n ti’n maan sa kekleekle wie wa bali.

Kɛ Dina i niaan bian’m be tili sa nga ɔ tɔli i su’n, ya nga be fali’n w’a yoman blɛblɛ. Ya dan kpa kunnin Simeɔn nin Levi mɔ be ti i niaan’m be nun nɲɔn’n, ɔ maan be fali tokofi mun kpɛkun be wluli klɔ’n nun yɛ be fuli yasua’m be nun be kunnin be ɔ. Be nin be niaan bian’m be kunnin Sisɛmu nin yasua’m be kwlaa. Sa tɛtɛ sɔ’n mɔɔ Zakɔbu i mma yasua’m be yoli’n, ɔ kunnin be si i ya dan kpa.

?Ngue ti yɛ sa kwlaa sɔ’n yoli ɔ? Janvuɛ mɔɔ Dina nin be nga be suman Ɲanmiɛn’n be trali’n ti ɔ. E kloman kɛ é trɛ́ i sɔ janvuɛ’n wie. ?Nɛ́n i ɔ?

Bo Bolɛ 34:1-31.



Kosan mun

  • ?Ngue ti yɛ Abraamu nin Izaaki b’a kplinman su kɛ be mma’m be ja Kanaanfuɛ mun ɔn?
  • ?Zakɔbu kplinnin su kɛ i wa bla’n nin Kanaan talua’m be tra janvuɛ?
  • ?Wan yɛle yasua nga ɔ nian Dina siin desɛn’n su lɛ’n? ?Yɛ like tɛ benin yɛ ɔ yoli ɔ?
  • ?Kɛ Dina i niaan bian Simeɔn nin Levi be tili sa nga ɔ juli i su’n, ngue yɛ be yoli ɔ?
  • ?Zakɔbu i klun jɔli like nga Simeɔn nin Levi be yoli’n su?
  • ?Wafa sɛ yɛ sa sukusuku wa wluli awlobo’n nun ɔn?

Kosan nga be klɛ uka su’n

  • Kanngan Bo Bolɛ 34:1-31 nun.

    ?Cɛn kunngba cɛ yɛ Dina ɔli Kanaan talua’m be wun wunlɛ ɔ? Amun yiyi nun. (Bob. 34:​1, NW: Be flɛ ba bla nga Lea nin Zakɔbu be wuli i’n kɛ Dina. Ɔ kɔ mɛn sɔ’n nun lɛ talua wie mun be wun wunlɛ titi.)

    ?Ngue ti yɛ Dina bɔbɔ yɛ maan sa’n tɔli i su ɔ? (Gal. 6:7)

    ?Wafa sɛ yɛ andɛ gbanflɛn annzɛ talua’m be kwla kle kɛ be fa sa nga ɔ ɲannin Dina’n be tu be wun fɔ nun ɔn? (Nya. 13:20; 1 Kor. 15:33; 1 Zan 5:19)