I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 16: Izaaki jali bla kpa kun

Ndɛ 16: Izaaki jali bla kpa kun

?AMUN si bla nga ɔ o desɛn’n su lɛ’n? Be flɛ i Rebeka. Yɛ yasua nga ɔ bɛ i atin kpalɛ’n, be flɛ i kɛ Izaaki. Rebeka su ba Izaaki aja. Ɔ́ wá káci Izaaki i yi. ?Yɛ wafa sɛ yɛ i sɔ’n kwla yoli ye ɔ?

Yoo, Izaaki i si Abraamu waan ɔ́ kúnndɛ bla kpa kun mɛ́n i wa’n. I sɔ ti, w’a kplinman su kɛ Izaaki ja Kanaan nvle’n i nun bla wie. Afin nvle sɔ’n i nunfuɛ’m be ti amuɛn sɔfuɛ. Ɔ maan Abraamu flɛli i sufuɛ’n, naan w’a se i kɛ yoo: ‘Kɔ Aran, min osufuɛ’m be mɛn nun lɔ naan ko ja bla kun man min wa Izaaki.’

Abraamu i sufuɛ’n fali ɲɔnngɔnmɛn blu, yɛ ɔ tuli ajalɛ’n niɔn. Kɛ ɔ mantannin Abraamu i si’m be klɔ’n wun lɔ’n, yɛ ɔ jrannin gbo kun i wun lɛ ɔ. Lika’n su san, ɔ maan bla’m be nzue nun balɛ dɔ’n w’a ju. Yɛ Abraamu i sufuɛ’n srɛli Zoova ɔ. Ɔ seli i kɛ: ‘Bla nga ɔ sa nzue man min nin min ɲɔnngɔnmɛn mun’n, nn yɛ a kpɛli i kɛ ɔ yo Izaaki i yi ɔ.’

Rebeka nin Izaaki b’a yia.

I osu cɛ kan’n Rebeka yɛ ɔ su ba nzue nun yɛ. Kɛ Abraamu i sufuɛ’n seli i kɛ ɔ mɛn i nzue naan ɔ nɔn’n, ɔ mɛnnin i. Kpɛkun ɔ sali wie mannin ɲɔnngɔnmɛn mun mɔ nzuewe’n w’a kun be’n. Junman dan kpa ɔ, afin ɲɔnngɔnmɛn’m be nɔnman nzue kaan.

Kɛ Rebeka wieli i sɔ’n yo’n, yɛ Abraamu i sufuɛ’n usɛli i i si’n i dunman ɔn. Yɛ ɔ usɛli i ekun kɛ ɔ kwla ɲan sikewlɛ be awlo lɔ. Yɛ talua’n seli kɛ: ‘Be flɛ min si Bɛtiɛli, kpɛkun lawlɛ kusu o e lika lɔ.’ Abraamu i sufuɛ’n si kɛ Bɛtiɛli ti Abraamu i niaan bian Naɔr i wa. I sɔ’n ti, ɔ kotoli Zoova bo ɔ lɛli i ase, afin ɔ kleli i Abraamu i osufuɛ’m be sin atin.

Kɔnguɛ sɔ nun’n, Abraamu i sufuɛ’n kannin ndɛ nga ti yɛ ɔ bali’n kleli Bɛtiɛli nin Rebeka i niaan bian Laban. Be nɲɔn’n be kplinnin su kɛ Rebeka ko ja Izaaki. ?Kɛ be usali Rebeka’n, ngue ndɛ yɛ ɔ kannin ɔn? I waan: ‘Ɛɛn, ń kɔ́.’ Ɔ maan kɛ aliɛ cɛnnin’n, yɛ ɔ nin be fuli ɲɔnngɔnmɛn’m be su be toli be ti Kanaan ɔn.

Kɛ bé jú lɔ’n nn lika’n su san. Rebeka wunnin kɛ sran kun su nanti bo’n nun lɔ. Sran sɔ’n yɛle Izaaki. Kɛ Izaaki wunnin Rebeka’n, ɔ yoli i fɛ dan kpa. I nin Sara wuli i afuɛ nsan yɛ, yɛ i wie’n i ya’n nin a wieman i klun. Sanngɛ siɛn’n, ɔ wa kloli Rebeka kpa, ɔ maan i klun’n wa jɔli ekun.

Bo Bolɛ 24:1-67.



Kosan mun

  • ?Wan yɛle bian nin bla nga be o desɛn’n su lɛ’n?
  • ?Ngue yɛ Abraamu yoli naan w’a fa bla w’a mɛn i wa’n niɔn, yɛ ngue ti ɔ?
  • ?Wafa sɛ yɛ Zoova tɛli Abraamu i sufuɛ’n i srɛlɛ’n su ɔ?
  • ?Kɛ be usali Rebeka kɛ ɔ́ já Izaaki’n, ngue ndɛ yɛ ɔ kannin ɔn?
  • ?Ngue ti yɛ maan Izaaki i klun’n wa jɔli ekun ɔn?

Kosan nga be klɛ uka su’n

  • Kanngan Bo Bolɛ 24:1-67 nun.

    ?Kɛ Rebeka wunnin Abraamu i sufuɛ’n gbo’n su lɔ’n, ayeliɛ kpa benin yɛ ɔ yili i nglo ɔ? (Bob. 24:​17-20; Nya. 31:17, 31)

    ?Wafa sɛ yɛ Izaaki i aja’n i siesielɛ mɔ Abraamu siesieli’n, ɔ man andɛ Klist­fuɛ mun ajalɛ kpa ɔ? (Bob. 24:37, 38; 1 Kor. 7:39; 2 Kor. 6:14)

    ?Ngue ti yɛ ɔ fata kɛ e ɲan blɛ e bu ninnge’m be su angunndan kɛ nga Izaaki fa yoli sa’n niɔn? (Bob. 24:63; Jue. 77:13; Fil. 4:8)

SUAN LIKE UFLƐ EKUN

Rebeka yoli like nga ɔ jɔ Zoova klun’n

?Like benin yɛ e kwla yo naan y’a sɔnnzɔn Rebeka ɔ? Kanngan ndɛ’n nun naan suɛn i su like kpa ekun.