I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 14: Abraamu lafi Ɲanmiɛn su

Ndɛ 14: Abraamu lafi Ɲanmiɛn su

?AMUN wun like nga Abraamu su yo i wa’n? Laliɛ kun o i sa nun, kpɛkun ɔ yo kɛ ɔ su wa kun i wa’n sa. ?Ngue sa ti yɛ ɔ su yo i sɔ ɔ? Maan e dun mmua e nian wafa nga Abraamu nin Sara be ɲannin be wa ba yasua sɔ’n.

Abraamu su fa Izaaki yi tɛ.

Ɲanmiɛn seli be kɛ bé wú ba yasua kun. Sanngɛ kɛ mɔɔ Abraamu nin Sara b’a yo kpɛnngbɛn b’a tra su’n ti’n, maan ɔ yo kɛ ndɛ sɔ’n kwlá kpɛnman su sa. Sanngɛ Abraamu liɛ’n, ɔ lafi su kɛ Ɲanmiɛn kwla yo like nga be kwlá yoman’n. ?Yɛ i sin’n yoli sɛ?

Kɛ Ɲanmiɛn kannin ndɛ’n kleli be’n, afuɛ klonglo kun sinnin. I sin’n, kɛ Abraamu ɲannin afuɛ 100 mɔɔ Sara ɲannin afuɛ 90, be wuli ba yasua kun. Be flɛ i Izaaki. Ɲanmiɛn dili nda nga ɔ tali’n su!

Sanngɛ kɛ Izaaki ɲinnin’n, Zoova sali Abraamu i Ɲanmiɛn sulafilɛ’n niannin. Ɔ flɛli Abraamu, yɛ Abraamu tɛli su kɛ: ‘M’an sro!’ Yɛ Ɲanmiɛn seli i kɛ: ‘Ɔ wa Izaaki m’ɔ ti ɔ wa ba kunngba cenje’n, fɛ i kɔ oka nga n wá klé wɔ’n su. Lɛ’n, kun ɔ wa’n naan fɛ i yi tɛ man min.’

Ndɛ sɔ’n ti Abraamu i wla’n boli i wun, afin ɔ klo i wa sɔ’n kpa. Nán amun wla fi su kɛ Ɲanmiɛn boli kasiɛ kɛ Abraamu i mma’m bé trán Kanaan mɛn’n nun lɔ. ?Sanngɛ sɛ Izaaki wu’n, wafa sɛ yɛ ndɛ sɔ’n kwla kpɛn su ɔ? Abraamu w’a wunman sa sɔ’n i wlɛ, sanngɛ i ɲin yili Ɲanmiɛn.

Kɛ Abraamu juli oka’n su lɔ’n, ɔ cili Izaaki yili i tɛ yiwlɛ lika nga ɔ kplannin’n i su. Kpɛkun ɔ toli i sa’n fali laliɛ’n kɛ ɔ́ fá kún i wa’n. Yɛ Ɲanmiɛn i anzi’n flɛli i ɔ: ‘Abraamu, Abraamu!’ Yɛ Abraamu waan: ‘M’an sro!’

Ɲanmiɛn seli i kɛ: ‘Nán ɔ sa’n kan ba’n, nán yo i sa fi. Siɛn’n, m’an wun i wlɛ kɛ ɔ ɲin yi min sakpa, afin kɛ n seli wɔ kɛ a fa ɔ wa ba kunngba cenje’n man min’n, w’a kaciman ɔ nuan.’

Nanwlɛ, Abraamu i Ɲanmiɛn sulafilɛ’n cɛnnin o! Ɔ lafili su kɛ like fi timan kekle Zoova i sa nun, naan i kpa’n bɔɔ Zoova kwla cɛn Izaaki. Sanngɛ kɛ Ɲanmiɛn kunndɛman kɛ Abraamu kun Izaaki sakpasakpa’n ti’n, ɔ yoli maan bua kun satali susrɛ nun, yɛ ɔ seli Abraamu kɛ ɔ fa sie i wa’n i osu naan ɔ fa yi tɛ’n.

Bo Bolɛ 21:1-7; 22:1-18.



Kosan mun

  • ?Ɲanmiɛn seli Abraamu sɛ? ?Yɛ wafa sɛ yɛ Ɲanmiɛn i ndɛ’n kpɛnnin su ɔ?
  • ?Kɛ nga e fa e wun i desɛn’n su lɛ’n, wafa sɛ yɛ Zoova sali Abraamu i Ɲanmiɛn sulafilɛ’n niannin ɔn?
  • ?Kannzɛ bɔɔ Abraamu w’a wunman ndɛ nga Ɲanmiɛn kannin’n i wlɛ’n, sanngɛ ngue yɛ ɔ yoli ɔ?
  • ?Kɛ Abraamu fali laliɛ’n kɛ ɔ́ fá kún i wa’n, ngue sa yɛ ɔ juli ɔ?
  • ?Wafa sɛ yɛ Abraamu i Ɲanmiɛn sulafilɛ’n cɛnnin ɔn?
  • ?Ngue yɛ Ɲanmiɛn yili mannin Abraamu kɛ ɔ fa yi tɛ’n niɔn, yɛ wafa sɛ yɛ ɔ yoli i sɔ ɔ?

Kosan nga be klɛ uka su’n

  • Kanngan Bo Bolɛ 21:1-7 nun.

    ?Ngue ti yɛ kɛ Abraamu i wa’n dili le mɔcuɛ’n, ɔ wlɛli i klɛn nun ɔn? (Bob. 17:10-12; 21:4)

  • Kanngan Bo Bolɛ 22:1-18 nun.

    ?Wafa sɛ yɛ Izaaki kleli kɛ i ɲin yi i si Abraamu ɔ? ?Yɛ wafa sɛ yɛ i sɔ’n fiti e ɲrun lɔ sa cinnjin kun su ɔ? (Bob. 22:7-9; 1 Kor. 5:7; Fil. 2:8, 9)

SUAN LIKE UFLƐ EKUN

Abraamu—Be kwlaa nga be lafi Ɲanmiɛn su’n be si’n

?Wafa sɛ yɛ Abraamu kleli kɛ ɔ lafi Ɲanmiɛn su ɔ? ?Wafa sɛ yɛ a kunndɛ kɛ á sɔ́nnzɔn Abraamu i Ɲanmiɛn sulafilɛ’n niɔn?