Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 9: Nowe boboli mmeli kun.

Ndɛ 9: Nowe boboli mmeli kun.
Sran’m be su sri Nowe.

NOWE le bla kun yɛ ba yasua nsan. Be yɛle Sɛmu, nin Kamu yɛ Zafɛti. Be nsan’n be le bla. Nowe i awlobofuɛ’m be ti sran mɔcuɛ.

Cɛn kun, Ɲanmiɛn seli Nowe kɛ ɔ yo abonuan like kun. Ɔ seli i kɛ ɔ bobo mmeli dan kun. Mmeli sɔ’n i dan su’n ti kɛ bato sa, sanngɛ i tɛnndɛn nun’n, ɔ fa alaka kpli wie. Ɲanmiɛn seli i kɛ ‘maan i klun lɔ’n ɲan etazi nsan’ naan ‘ɔ kpɛkpɛ mmeli’n nun sua ba sua ba.’ Sua ba’m be ti Nowe nin i awlobofuɛ mun ɔ nin nnɛn’m be liɛ’n. Bé síe be aliɛ dilɛ ninnge mun lɔ.

Ɲanmiɛn seli Nowe kɛ ɔ fa gudrɔn ɔ kan mmeli’n i klun nin i sin’n naan nzue w’a wluman nun. Ɲanmiɛn seli kɛ: ‘Ń wá tɔ́ nzue dan kpa kun asiɛ’n su, ń fá núnnún ninnge nga be o asiɛ’n su’n be kwlaa. Sran kwlaa nga w’a wluman mmeli’n nun’n, ɔ wú.’

Nowe nin i mma’m be ɲin yili Zoova, be boli mmeli’n. Sanngɛ sran’m be srili be. Sa kekleekle mun yɛ sran sɔ’m be yo ɔ. Sran fi w’a faman Nowe i ndɛ’n su.

Nowe i awlobofuɛ’m be su fa nnɛn mun nin ndidiɛ ninnge’m be wlɛ i mmeli’n nun.

Kɛ mɔ mmeli’n cɛnnin dan’n ti’n, i bobolɛ’n cɛli kpa, ɔ dili afuɛ kpanngban. Siɛn’n, Ɲanmiɛn seli Nowe kɛ ɔ fa nnɛn mun wlɛ i mmeli’n nun. Ɔ seli i kɛ ɔ fa nnɛn wafa wie’m be nun nɲɔnnɲɔn fa wlu mmeli’n nun, bla kun nin yasua kun. Sanngɛ be akpasua nga be ka lɛ’n be liɛ’n, ɔ fa be nun yasua kun nin bla kun, sɔ fa nso. Ɲanmiɛn seli Nowe ekun kɛ ɔ fa anunman akpasua wafa kwlaa wlu mmeli’n nun wie. Nowe niannin Ɲanmiɛn ndɛ i kwlaa su yoli.

I sin’n, Nowe nin i awlobofuɛ’m be wluli mmeli’n nun wie. Kpɛkun Ɲanmiɛn ɲinnin anuan’n. Be o mmeli’n i klun lɔ bé mínndɛ. ?Amun bu i sin be nian, sɛ ɔ ti kɛ amun nin be yɛ be o mmeli’n i klun lɔ bé mínndɛ’n, nn amún sé sɛ? ?Nzue sɔ’n ɔ tɔ sakpa kɛ nga Ɲanmiɛn fa kannin’n sa?

Bo Bolɛ 6:9-22; 7:1-9.



Kosan mun

  • ?Nowe i awlobofuɛ’m be ti sran nɲɛ? ?Yɛ be flɛ i wa yasua nsan’n be sɛ?
  • ?Abonuan like benin yɛ Ɲanmiɛn seli Nowe kɛ ɔ yo ɔ, yɛ ngue ti ɔ?
  • ?Kɛ Nowe kannin mmeli’n i kplanlɛ ndɛ kleli i tranfuɛ mun’n, sɛ yɛ be yoli ɔ?
  • ?Ɲanmiɛn seli Nowe kɛ ɔ yo nnɛn’m be sɛ?
  • ?Kɛ Ɲanmiɛn ɲinnin mmeli’n i anuan’n, ngue yɛ ɔ fata kɛ Nowe nin i awlobofuɛ’m be yo ɔ?

Kosan nga be klɛ uka su’n

  • Kanngan Bo Bolɛ 6:9-22 nun.

    ?Ngue ti yɛ maan Nowe yoli Ɲanmiɛn nanwlɛfuɛ’n i sufuɛ kpa kun ɔn? (Bob. 6:9, 22)

    ?Wafa sɛ yɛ Zoova bu sa kekleekle yolɛ’n niɔn? ?Yɛ wafa sɛ yɛ ɔ kwla ɲan ta e ɲin su yiyilɛ nun ɔn? (Bob. 6:11, 12; Jue. 11:5)

    ?Wafa sɛ yɛ kɛ Zoova i anuannzɛ’n kle e atin’n, e kwla fa Nowe i ajalɛ’n su ɔ? (Bob. 6:22; 1 Zan 5:3)

  • Kanngan Bo Bolɛ 7:1-9 nun.

    ?Kɛ Zoova bu Nowe mɔ fɔ o i nun’n i sran kpa’n, wafa sɛ yɛ i sɔ’n wla e fanngan andɛ ɔ? (Bob. 7:1; Nya. 10:16; Eza. 26:7)