I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 6: Kaɛn nin Abɛli

Ndɛ 6: Kaɛn nin Abɛli

AMUN nian Kaɛn nin Abɛli. Be nɲɔn b’a ɲin siɛn’n. Kaɛn yoli fie difuɛ. Ɔ gua awie yɛ ɔ ta waka nga be su mma mun ɔ nin ninnge kɛ gbɔlu annzɛ ninnge mma sa, ɔ nin ninnge wie mun ekun.

Kaɛn nin Abɛli be su man Ɲanmiɛn i like.

Abɛli yoli nnɛn tafuɛ. Ɔ klo bua ba’m be lika nianlɛ kpa. Bua mun be yoli dandan, be trɛli lele kpɛkun siɛn’n, be yoli bua akpasua dan kun.

Cɛn kun’n, Kaɛn nin Abɛli be ɔli Ɲanmiɛn like manlɛ. Kaɛn fɛli i fie’n su ninnge wie mun yɛ ɔ ɔli ɔ. Abɛli kusu kunnin i bua’m be nun kpakpa mun fa ɔli. Zoova klun jɔli Abɛli wun, ɔ sɔli like nga ɔ fa mɛnnin i’n nun klanman. Sanngɛ w’a nianman Kaɛn ɲrun, w’a sɔmɛn i like nga ɔ fa mɛnnin i’n nun. ?Amun si like ti’n?

Nán kɛ Abɛli i like liɛ’n nga ɔ mannin’n i kpa tra Kaɛn liɛ’n ti ɔ. Sanngɛ Abɛli ti sran kpa ti ɔ. Ɔ klo Zoova yɛ ɔ klo i niaan bian. Sanngɛ Kaɛn liɛ’n, ɔ ti tɛ; ɔ klomɛn i niaan bian.

Ɔ maan Ɲanmiɛn seli Kaɛn kɛ ɔ kaci i ayeliɛ’n. Sanngɛ Kaɛn w’a kplinman su. Kɛ mɔɔ Ɲanmiɛn kloli Abɛli sa’n ti’n, Kaɛn wa fali ya dan kpa. Ɔ maan ɔ seli Abɛli kɛ: ‘E wɔ bo’n nun lɔ.’ Kɛ be juli lɔ mɔ be ngunmin yɛ be o lɔ’n, kpɛkun yɛ ɔ tɔli i niaan bian Abɛli su, yɛ ɔ finnin i waka yaya kpa ɔ kunnin i ɔ. Nanwlɛ, tete sa dan kpa yɛ Kaɛn yoli i lɛ ɔ.

Kaɛn w’a kun Abɛli, siɛn’n ɔ su wanndi kɔ.

Kannzɛ bɔɔ Abɛli wuli o, sanngɛ Ɲanmiɛn i wla fimɛn i su le, ɔ te o i klun. Abɛli ti sran kpa, yɛ sran kɛ i sa’n, Zoova i wla fimɛn i le. Ɔ maan i ti’n, cɛn wie lele’n Ɲanmiɛn Zoova ɔ́ wá fɛ́ i sɛ́ i sin nguan nun ekun. I blɛ sɔ nun’n, i liɛ’n, Abɛli su wuman kun le. Ɔ́ kwlá trán asiɛ’n su wa tititi. ?Kɛ e nin sran kɛ Abɛli sa’n é sí e wun’n, amun wunman kɛ ɔ ti e cenjele like’n?

Sanngɛ Ɲanmiɛn klun jɔman sran kɛ Kaɛn sa’n, be wun. I sɔ ti’n, kɛ Kaɛn kunnin i niaan bian’n, Ɲanmiɛn tuli i fɔ. Ɔ nin i awlobofuɛ mun be afiɛn tili nun fuun. Kɛ Kaɛn kɔ asiɛ’n i lika uflɛ kó trán lɔ’n, ɔ nin i niaan bla kun yɛ be wɔli ɔ. Ɔ kacili i yi.

I sin’n, Kaɛn nin i yi be wuli ba mun. Adam nin Ɛvu be mma wie’m be jali bian nin bla, yɛ be wuli ba mun ekun. I sin’n, sran’m be wa trɛli asiɛ’n su. Maan e suan be nun kunngun be su ninnge wie mun.

Bo Bolɛ 4:2-26; 1 Zan 3:11, 12; Zan 11:25.



Kosan mun

  • ?Junman benin yɛ Kaɛn nin Abɛli be di ɔ?
  • ?Ngue like yɛ Kaɛn nin Abɛli be fa man Zoova ɔ?
  • ?Ngue ti yɛ Zoova klun jɔ like nga Abɛli mannin’n su ɔ? ?Yɛ ngue ti yɛ i klun jɔman Kaɛn liɛ’n su ɔ?
  • ?Sran’n i wafa benin yɛle Kaɛn? ?Yɛ wafa sɛ yɛ Zoova waan ɔ tínngɛ i ɔ?
  • ?Ngue yɛ Kaɛn yoli ɔ, i nun m’ɔ nin i niaan bian be ngunmin be o fie’n nun lɔ’n?
  • Kɛ Kaɛn kunnin i niaan bian’n wieli’n, sa nga ɔ juli i su’n, amun kɛn i ndɛ.

Kosan nga be klɛ uka su’n

  • Kanngan Bo Bolɛ 4:2-26 nun.

    ?Wafa sɛ yɛ Zoova yiyili sa tɛ nga Kaɛn o nun’n, i nun ɔn? (Bob. 4:7)

    ?Wafa sɛ yɛ Kaɛn yili i klun angunndan’n i nglo ɔ? (Bob. 4:9)

    ?Wafa sɛ yɛ Zoova bu sran kpa’n i mmoja mɔ be guɛ i ase’n niɔn? (Bob. 4:10; Eza. 26:21)

  • Kanngan 1 Zan 3:11, 12 nun.

    ?Ngue ti yɛ Kaɛn fali ya dan kpa ɔ? ?Yɛ wafa sɛ yɛ e kwla fa i sɔ’n e tu wun fɔ nun andɛ ɔ? (Bob. 4:4, 5; Nya. 14:30; 28:22)

    ?Wafa sɛ yɛ Biblu’n kle kɛ kannzɛ bɔɔ e awlobofuɛ’m be ngba be suman Zoova’n, sanngɛ e kwla nanti seiin titi ɔ? (Jue. 27:10; Mat. 10:21, 22)

  • Kanngan Zan 11:25 nun.

    ?Ngue ndɛ mɔ be kwla lafi su’n yɛ Zoova kan kle be kwlaa nga sɛsɛ su nantilɛ’n ti’n be wu’n niɔn? (Zan 5:24)

SUAN LIKE UFLƐ EKUN

Abɛli—‘Ɔ wuli, sanngɛ ɔ te ijɔ’

Biblu’n w’a kanman Abɛli i su ndɛ kpanngban. ?Sanngɛ ngue yɛ e kwla suɛn i i bɔbɔ nin i Ɲanmiɛn sulafilɛ’n su ɔ?