I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 5: Be su wun be ɲrun siɛn’n

Ndɛ 5: Be su wun be ɲrun siɛn’n

KƐ ADAM nin Ɛvu be fin Edɛni fie’n nun fiteli’n, be wunnin be ɲrun kpa. Siɛn’n, kɛ ɔ ko yo naan b’a ɲan be nuan nun aliɛ b’a di’n, ɔ fata kɛ be di junman kekle. B’a wunman waka mma nglanmannglanman mun kun, like nga be fu asiɛ’n su’n siɛn’n yɛle owieowie mun nin flɔn mun. Kɛ Adam nin Ɛvu be yoli ɲin kekle Ɲanmiɛn su’n, mɔ be nin i be afiɛn’n ɔ wa sacili’n, sa nga ɔ wa tɔli be su’n yɛle ngalɛ’n.

Adam nin i wa’n be su di junman kekle kpa.

Sanngɛ i nga ɔ yoli tɛtɛ kpafuɛ’n, yɛle kɛ wie’n wa wluli Adam nin Ɛvu be nun sa blɛblɛblɛ. Maan ɔ kpɛn amun klun kɛ Ɲanmiɛn seli be kɛ sɛ be di waka kun wie i mma’n, saan wulɛ cɛ yɛ bé wú ɔ. Ɔ maan cɛn kunngba nga be dili waka mma sɔ’n, yɛ wie’n wluli be nun ɔn. Ɔo! ?Ngue sinnzin yɛ be dili i sɔ ɔ, mɔ maan b’a tieman Ɲanmiɛn i ndɛ’n niɔn?

Ɲanmiɛn fuannin Adam nin Ɛvu Edɛni fie’n nun lɔ, i sin naan b’a wu ba mun. Like nga ti yɛ ba’m be kusu bé yó kpɛnngbɛn mɔ bé wú’n, yɛ ɔ o lɛ ɔ.

Ɔo, sɛ ɔ ti kɛ Adam nin Ɛvu be ɲin yili Zoova’n, nn be nin be mma’m bé dí be mɛn’n aklunjuɛ nun. Nn bé kwlá trán aunjuɛ nun asiɛ’n su, yɛ sran su yoman oke, ɔ su tɔman tukpaciɛ yɛ ɔ su wuman.

Ɲanmiɛn klo kɛ sran’m be tran asiɛ’n su tititi aunjuɛ nun, i ti’n, ɔ sunnzunnin kɛ cɛn wie lele ɔ́ yó su sɔ. Nán asiɛ wunmuan’n i ngunmin yɛ ɔ yó klanman ɔn, sran’m be kusu bé yó juejue wie. Kpɛkun asiɛ’n su’n, sran kwlaa yó i wiengu i janvuɛ, kpɛkun ɔ́ yó Ɲanmiɛn i janvuɛ wie.

Ɛvu nin i mma mun

Sanngɛ Ɛvu liɛ’n, w’a yoman Ɲanmiɛn i janvuɛ kun. Ɔ maan kɛ ɔ́ wú ba’n, ɔ yoli kekle, ɔ wunnin ɲrɛnnɛn kpa ba wulɛ sɔ nun.

Adam nin Ɛvu be wuli ba yasua nin ba bla kaka kpa. Be flɛli be wa klikli’n kɛ Kaɛn. Kpɛkun be flɛli i sinma yasua’n kɛ Abɛli. ?Amun si sa nga ɔ ɲannin ba nɲɔn sɔ mun’n?

Bo Bolɛ 3:16-23; 4:1, 2; Sa Nglo Yilɛ 21:3, 4.



Kosan mun

  • ?Kɛ Adam nin Ɛvu be jasoli fie klanman nun lɔ be fiteli’n, be mɛn dilɛ’n yoli sɛ?
  • ?Ngue sa yɛ ɔ wa tɔli Adam nin Ɛvu be su ɔ? ?Yɛ ngue ti ɔ?
  • ?Ngue ti yɛ Adam nin Ɛvu be mma’m bé yó kpɛnngbɛn kpɛkun bé wú’n niɔn?
  • ?Sɛ ɔ ti kɛ Adam nin Ɛvu be ɲin yili Ɲanmiɛn’n, nn be nin be mma’m be mɛn dilɛ’n yó sɛ?
  • ?Wafa sɛ yɛ Ɛvu i ɲin kekle’n fali ɲrɛnnɛn’n yili i su ɔ?
  • ?Be flɛ Adam nin Ɛvu be wa klikli nɲɔn’n be sɛ?
  • ?Wan mun yɛle ba nga be o desɛn’n su lɛ’n?

Kosan nga be klɛ uka su’n

  • Kanngan Bo Bolɛ 3:16-23 nin 4:1, 2 nun.

    ?Wafa sɛ yɛ asiɛ’n i sannzan mɔ Ɲanmiɛn boli’n, ɔ ɲannin ta Adam i mɛn dilɛ’n su ɔ? (Bob. 3:17-19; Rɔm. 8:20, 22)

    ?Ngue ti yɛ Ɛvu i dunman’n mɔ i bo’n yɛle “be kwlaa nga be wu be’n, be nin’n,” ɔ ti su’n niɔn? (Bob. 3:20)

    ?Kannzɛ bɔɔ Adam nin Ɛvu be fɔnnin Ɲanmiɛn wun’n, sanngɛ wafa sɛ yɛ Zoova kleli kɛ ɔ bu be sran ɔn? (Bob. 3:7, 21)

  • Kanngan Sa Nglo Yilɛ 21:3, 4 nun.

    ?“Laa ninnge” benin mun yɛ e kunndɛ kɛ be nunnun be ɔ?