I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 3: Adam nin Ɛvu

Ndɛ 3: Adam nin Ɛvu

WAN mun yɛle nga e wun be desɛn’n su siɛn’n yɛ’n? E wun yasua klikli’n nin bla klikli’n. ?Wan yɛ ɔ yili sran sɔ mun ɔn? Ɲanmiɛn ɔn. ?Amun si Ɲanmiɛn i dunman’n? I dunman’n yɛle Zoova. Be flɛ yasua’n kɛ Adam yɛ be flɛ bla’n kɛ Ɛvu.

Adam nin Ɛvu be o Edɛni fie’n nun.

Wafa nga Ɲanmiɛn Zoova yili Adam’n yɛ. Ɔ fali fa asiɛ wun naan w’a fa yi Adam. Kpɛkun ɔ fitali Adam i bue nun, yɛ Adam loli wunmiɛn, yɛ ɔ ɲannin nguan ɔn. Fɔ nunmɛn i nun.

Ɲanmiɛn Zoova mannin Adam junman kun. Ɔ seli i kɛ ɔ tɔn nnɛn wafawafa kwlaa be dunman. Atrɛkpa, Adam niannin nnɛn mun lele naan w’a wun dunman kpa kun nga ɔ nin be nun kunngun fata’n naan w’a fa tɔn be. Kɛ Adam tɔn nnɛn’m be dunman kɔ’n, ɔ wa sieli like kun nzɔliɛ. ?Amun si like nga ɔ sieli i nzɔliɛ sɔ’n?

Yɛle kɛ nnɛn’m be kwlaa be ti nɲɔnnɲɔn, bla kun nin yasua kun. Sui nin asɔmɔli’m be nun’n, ɔ le siɛ, ɔ le niɛn. Sanngɛ Adam liɛ’n, i ngunmin cɛ yɛ ɔ o lɛ ɔ, ɔ leman i wiengu sran m’ɔ nin i bé trán ɔn. I sɔ’n ti’n, Zoova yoli maan Adam wa lafili kpa sa pɔɔ naan w’a yi i nvɛnma kun. I sin’n, ɔ fɛli i nvɛnma sɔ’n fa yili bla kun naan w’a fa man Adam. I yɛ ɔ yoli Adam i yi’n niɔn.

E nian kɛ Adam i klun w’a jɔ siɛn’n niɔn! Kpɛkun e nian kɛ Ɛvu kusu, i klun jɔli fie klanman sɔ mɔ be fɛ i sieli nun’n i su ɔ! Siɛn’n, be kwla wu ba mun, naan be kwlaa b’a tran aklunjuɛ nun.

Zoova waan Adam nin Ɛvu be tran nguan nun tititi. Ɔ kunndɛli kɛ be di asiɛ’n wunmuan’n su junman naan ɔ yo klanman kɛ Edɛni fie’n sa. Kɛ Adam nin Ɛvu be tili i sɔ ndɛ’n, ɔ yoli be fɛ kpa! ?Sɛ ɔ ti kɛ amun dili junman sɔ’n wie’n, nn ɔ́ yó amun fɛ? Sanngɛ Adam nin Ɛvu be aklunjuɛ’n w’a cɛman. Amun maan e nian like ti’n.

Jue Mun 83:18, NW; Bo Bolɛ 1:26-31; 2:7-25.



Kosan mun

  • ?Ndɛ 3 i nun desɛn’n, ɔ nin ndɛ 2 i nun desɛn’n be ngbaciɛ’n yɛle benin?
  • ?Wan yɛ ɔ yili sran klikli’n niɔn? ?Yɛ be flɛ sran klikli sɔ’n sɛ?
  • ?Ngue junman yɛ Ɲanmiɛn fa mannin Adam kɛ ɔ di ɔ?
  • ?Ngue ti yɛ Ɲanmiɛn yoli maan Adam lafili kpa sa pɔɔ’n niɔn?
  • ?Adam nin Ɛvu be kwla ka nguan nun lele afuɛ nɲɛ, yɛ ngue junman yɛ Zoova fa mannin be kɛ be di ɔ?

Kosan nga be klɛ uka su’n

  • Biblu’n se kɛ: “Maan be si kɛ wɔ mɔ ɔ dunman’n yɛle Zoova’n, ɔ kunngba cɛ yɛ like fi nunman ɔ sin asiɛ wunmuan’n su ɔ.” (Jue Mun 83:18, NW)

    ?Be flɛ Ɲanmiɛn sɛ? ?Yɛ i kunngba cɛ ɔ ti i liɛ sɛ asiɛ’n su? (Zer. 16:21; Dan. 4:19)

  • Kanngan Bo Bolɛ 1:26-31 nun.

    ?Like nanndoliɛ benin yɛ Ɲanmiɛn yili i cɛn ba nsiɛn’n su ɔ? ?Yɛ wafa sɛ yɛ like sɔ’n, ɔ nin nnɛn’m be timan kun ɔn? (Bob. 1:26)

    ?Ngue yɛ Zoova fa mannin sran nin nnɛn mun ɔn? (Bob. 1:30)

  • Kanngan Bo Bolɛ 2:7-25 nun.

    ?Wafa sɛ yɛ Adam kwla tɔnnin nnɛn’m be dunman ɔn? (Bob. 2:19)

    ?Wafa sɛ yɛ Bo Bolɛ 2:24 uka e naan y’a wun wafa nga Ɲanmiɛn bu aja’n, ɔ nin be wun nun titilɛ’n, ɔ nin be wun yralɛ’n niɔn? (Mat. 19:4-6, 9)