I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Biblu’n nun ndɛ’m be kpɔlɛ bolɛ fluwa’n

Ndɛ 1: Ɲanmiɛn bo ninnge’m be yilɛ’n i bo

Ndɛ 1: Ɲanmiɛn bo ninnge’m be yilɛ’n i bo

NINNGE kpakpa kwlaa nga e le be’n, be fin Ɲanmiɛn. Ɔ yili wia’n naan ɔ kpaja e su wia nun. Kpɛkun ɔ yili anglo ba’n nin nzraama mun naan be kpaja e su kɔnguɛ. Kpɛkun Ɲanmiɛn yili asiɛ’n mannin e naan e tran su.

Sanngɛ nán ninnge nga Ɲanmiɛn dun mmua yili’n yɛle wia’n nin anglo ba’n nin nzraama mun. ?Amun si like nga ɔ dun mmua yili be’n? Ɲanmiɛn dun mmua yili sran nga be ti kɛ i bɔbɔ sa’n. Wafa kunngba nga e kwlá wunman Ɲanmiɛn bɔbɔ i wun’n, e kwlá wunman sran sɔ’m be wun wie. Biblu’n nun’n, be flɛ sran sɔ mun kɛ anzi. Ɲanmiɛn yili anzi mun kɛ be nin i bɔbɔ be tran nglo lɔ.

Anzi klikli nga Ɲanmiɛn yili’n, ɔ ti i liɛ ngunmin. Ɔ ti Ɲanmiɛn i Wa kpɛn, yɛ ɔ nin i Si’n be dili junman. Ɔ ukali Ɲanmiɛn yɛ be yili ninnge’n i onga mun ɔn. Ɔ ukali Ɲanmiɛn yɛ be yili wia’n nin anglo ba’n nin nzraama mun, ɔ nin asiɛ’n niɔn.

?Blɛ sɔ nun’n, asiɛ’n fa ngue like? I bo bolɛ nun’n, sran fi kwlá tranman asiɛ’n su. Like fi nunman asiɛ’n su, saan nzue dan kpa kɛ jenvie sa, yɛ ɔ di asiɛ wunmuan’n niɔn. Sanngɛ Ɲanmiɛn klo kɛ sran tran asiɛ’n su. Ɔ maan ɔ siesieli i ye mannin e. ?Ngue yɛ ɔ yoli ɔ?

I klikli nun’n, ɔ fata kɛ asiɛ’n su kpaja. I sɔ’n ti’n, Ɲanmiɛn yoli maan wia’n i kpajalɛ’n guali asiɛ’n su. Kɛ ɔ yoli sɔ’n, yɛ aliɛ sanlɛ’n nin i cɛnlɛ’n boli i bo ɔ. I sin’n, Ɲanmiɛn yoli maan asiɛ kee fin nzue’n nun fiteli.

I bo bolɛ nun’n, like fi nunman asiɛ’n su. Ɔ ti kɛ desɛn nga amun wun i yɛ’n sa. Nɲanɲa mun nin be ɲrɛ mun, annzɛ waka mun, annzɛ nnɛn mun, be wie fi sa nunman lɛ. Jue wie fi nunman jenvie’m be nun. Ɔ fata kɛ Ɲanmiɛn di junman dan naan asiɛ’n w’a kaci lika ɲɛnmɛn nga nnɛn nin sran’m be kwla tran nun’n.

Zeremi 10:12; Kolɔsfuɛ Mun 1:15-17; Bo Bolɛ 1:1-10.

Barɛni nvle’n


Kosan mun

  • ?Ninnge kpakpa kwlaa fin wan? ?Yɛ amun kwla man sunnzun ase kun?
  • ?Ngue yɛ Ɲanmiɛn dun mmua yili ɔ?
  • ?Ngue ti yɛ anzi klikli’n, ɔ ti i liɛ ngunmin’n niɔn?
  • ?I bo bolɛ nun’n, ngue like yɛ asiɛ’n fɛ i ɔ? Yiyi nun. (Nian desɛn’n su.)
  • ?Wafa sɛ yɛ Ɲanmiɛn siesieli asiɛ’n fa mannin nnɛn nin sran mun ɔn?

Kosan nga be klɛ uka su’n

  • Kanngan Zeremi 10:12 nun.

    ?Ɲanmiɛn i wafa benin mun yɛ ninnge nga ɔ yili be’n, be yi i nglo ɔ? (Eza. 40:26; Rɔm. 11:33)

  • Kanngan Kolɔsfuɛ Mun 1:15-17 nun.

    ?Ninnge’m be yilɛ nun’n, ngue junman yɛ Zezi dili ɔ? ?Yɛ wafa sɛ yɛ i sɔ’n ɲan ta wafa nga amun bu Zezi siɛn’n, i su ɔ? (Kol. 1:15-17)

  • Kanngan Bo Bolɛ 1:1-10 nun.

    ?Asiɛ’n fin nin? (Bob. 1:1)

    ?Ninnge’m be yilɛ i cɛn ba klikli su’n, ngue sa yɛ ɔ yoli ɔ? (Bob. 1:3-5)

    Kan sa nga ɔ juli ninnge’m be yilɛ i cɛn ba nɲɔn su’n i ndɛ. (Bob. 1:7, 8)