I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Amun awlobo’n kwla di aklunjuɛ

 AKPASUA 2

Nán amun kunndɛ bla annzɛ bian amun wiengu bo

Nán amun kunndɛ bla annzɛ bian amun wiengu bo

“Like nga Nyanmiɛn kan be bo nun’n, nán maan sran fi ti be nun.”Mark 10:9.

Zoova kunndɛ kɛ e yo nanwlɛfuɛ. (Jue Mun 31:24) I sɔ’n ti cinnjin aja’n nun, afin sɛ amun diman amun wun nanwlɛ’n, amun su lafiman amun wiengu su, yɛ amun su kloman amun wiengu.

Andɛ’n, nanwlɛ su nantilɛ’n timan pɔpɔ aja’n nun. Kɛ ɔ ko yo naan amun a sasa amun aja’n, ɔ fata kɛ amun fa ajalɛ cinnjin nɲɔn.

 1 MAAN AMUN AJA’N YO AMUN NINNGE’M BE NUN CINNJINFUƐ’N

NDƐ NGA BIBLU’N KAN’N: “Nán an yo kɛ sran b’ɔ wun-man sa wlɛ’n sa, sanngɛ an yo ngwlɛlɛfuɛ.” (Efɛzfuɛ Mun 5:15, 16) Sɛ amun bu i kɛ amun aja’n ti ninnge nga be ti cinnjin kpa’n be nun kun’n, i sɔ’n ti ngwlɛlɛ ayeliɛ.

Zoova kunndɛ kɛ amun “tran fɛfɛ.” (Akunndanfuɛ’n 9:9) Ɔ kloman kɛ amun ɲin kpa amun wiengu su. Ɔ klo kɛ amun yo like kwlaa ng’ɔ kwla jɔ amun wiengu kun’n i klun’n. (1 Korɛntfuɛ Mun 10:24) Maan amun yo naan amun yi annzɛ amun wun ɔ wun i wlɛ kɛ i ndɛ lo amun naan amun klo i.

LIKE NGA AMUN KWLA YO’N:

  • Amun fa blɛ be yo ninnge mun likawlɛ titi, kpɛkun amun fa amun ɲin sie i amun wiengu su kpa.

  • Nán amun bu amun “ngunmin” amun wun akunndan, sanngɛ an yo ninnge mun “likawlɛ.”

 2 SIE Ɔ KLUN AKUNNDAN’N I KPA

NDƐ NGA BIBLU’N KAN’N: “Sran kwlaa ng’ɔ wun bla kun b’ɔ bu i kunndɛlɛ akunndan i anwlɛn nun’n, nn w’a kunndɛ bla sɔ’n.” (Matie 5:28) Sɛ sran kun bu sa sukusuku yolɛ akunndan titi’n, ɔ ti kɛ nn ɔ su fɔn i wiengu kun’n i wun sa.

Zoova waan ‘amun sie amun klun akunndan’n i kpa.’ (Nyanndra Mun 4:23, NW; Zeremi 17:9) Sɛ amun waan amún yó sɔ’n, nán amun nian like ng’ɔ nin i fataman’n. (Matie 5:29, 30) Amun nian Zɔbu i ajalɛ’n su. Ɔ tali nda kɛ ɔ su fɛmɛn i ɲinma kpɛman bla wie kannglɛ naan w’a bu i kunndɛlɛ akunndan. (Zɔb 31:1) Amun fua kɛ amun su nianman bian nin bla nna nga be fa fite nzra nun’n, naan kusu amun nin bla annzɛ bian uflɛ su traman ndalie.

LIKE NGA AMUN KWLA YO’N:

  • Maan amun ayeliɛ’n kle amun mantanfuɛ’m be kɛ amun le bla annzɛ bian.

  • Wafa nga amun yi annzɛ amun wun i wun fa yo i’n, maan ɔ yo amun cinnjin. Yɛ sɛ amun nin sran uflɛ be tra janvuɛ naan i ti’n amun wiengu kun’n wunmɛn i wun fɛ’n, amun nin amun janvuɛ sɔ’n be ti nun.