LIKE SUANLƐ 01
?Wafa sɛ yɛ Biblu’n kwla uka wɔ-ɔ?
E kwlakwla e usa e wun kosan wie mun. Wie liɛ’n e usa e wun kɛ: ?Ngue ti yɛ e wun ɲrɛnnɛn-ɔn? ?Ngue ti yɛ e wu-ɔ? ?E ɲrun lɔ’n yó sɛ? Asa’n, e bu sa nga be ju e su aliɛ ba kwlaa nun’n be akunndan. Ɔ maan e usa e wun kɛ: ?Ń yó sɛ naan m’an kwla nian min awlobofuɛ’m be lika? ?Annzɛ ń yó sɛ naan e nin e awlobofuɛ mun y’a kwla di aklunjɔɛ? Sran kpanngban be wunnin kɛ Biblu’n kwla tɛ kosan cinnjin nga be fa usa be wun’n be su. Asa ekun’n, ɔ man be afɔtuɛ kpakpa wie mun naan be liɛ w’a yo ye. ?A bu i kɛ Biblu’n kwla uka be nga a si be’n wie?
1. ?Kosan benin wie mun yɛ Biblu’n tɛ be su-ɔ?
Biblu’n tɛ kosan cinnjin nga’m be su: ?Wafa sɛ yɛ mɛn’n boli i bo-ɔ? ?Ngue ti yɛ e o asiɛ’n su-ɔ? ?Ngue ti yɛ sran’m be wun ɲrɛnnɛn-ɔn? ?Kɛ sran kun wu’n ninfan yɛ ɔ kɔ-ɔ? Sran’m be kwlaa be kunndɛ kɛ bé dí fɔundi. ?Yɛ nn ngue ti yɛ be kun alɛ-ɔ? ?Asiɛ’n ɔ́ ká lɛ tititi? Biblu’n wla e fanngan kɛ e kunndɛ kosan sɔ’m be su tɛlɛ’n. Sran miliɔn kpanngban be wunnin be su tɛlɛ’n Biblu’n nun, yɛ be klun jɔli su.
2. ?Wafa sɛ yɛ Biblu’n kwla uka e naan y’a di aklunjɔɛ-ɔ?
Biblu’n man e afɔtuɛ kpakpa wie mun. I wie yɛle kɛ ɔ kle awlobo mun like nga be kwla yo naan b’a kwla di aklunjɔɛ’n. Ɔ kle e like nga e kwla yo naan e wla w’a gua ase’n, ɔ nin like nga e kwla yo naan y’a klo junman nga e di’n. Kɛ é súan like é kɔ́’n, á wá wún sa sɔ’m be su ndɛ nga Biblu’n kan’n, ɔ nin sa uflɛ wie mun ekun. Á wá wún kɛ ‘ndɛ kwlaa ng’ɔ o Ɲanmiɛn Ndɛ’n nun’n [ndɛ kwlaa ng’ɔ o Biblu’n nun’n] ɔ ti kpa.’—2 Timote 3:16.
Fluwa nga kaciman Biblu’n, sanngɛ ɔ́ úka ɔ naan ɔ bɔbɔ w’a kwla fa ɔ ɲin w’a sie i Biblu’n nun ndɛ’n su. I sɔ’n ti’n, é wlá ɔ fanngan kɛ a kanngan Biblu’n nun ndɛ mma nga be o nun’n be nun, naan a nian sɛ be nin like nga a suan’n be kɔ likawlɛ-o.
SI NDƐ’N NUN KPA EKUN
Maan e nian wafa nga Biblu’n ukali sran wie mun’n, ɔ nin like nga a kwla yo naan w’a klo Biblu’n nun kannganlɛ’n, ɔ nin like nga ti yɛ ɔ ti cinnjin kɛ be uka ɔ naan w’a wun Biblu’n nun ndɛ’n i wlɛ’n.
3. Biblu’n kwla kle e atin
Ɔ ti kɛ kannin kun m’ɔ kpaja kpa’n sa. Ɔ kwla kle e wafa nga e kwla fa ajalɛ kpa’n. Yɛ ɔ kwla uka e naan y’a si sa nga bé jú e ɲrun lɔ’n.
An kanngan Jue Mun 119:105 nun, i sin’n an koko kosan yɛ’m be su yalɛ:
-
?Wafa sɛ yɛ sran ng’ɔ klɛli ndɛ sɔ’n bu Biblu’n niɔn?
-
?Wafa sɛ yɛ a bu Biblu’n niɔn?
4. Biblu’n tɛ kosan nga e fa usa e wun’n be su
Bla kun wunnin kɛ Biblu’n tɛ kosan wie m’ɔ fa usɛ i wun’n be su. Ɔ buli kosan sɔ’m be akunndan afuɛ kpanngban. An bo VIDEO’N, i sin’n, an koko kosan yɛ’m be su yalɛ.
-
?Video’n nun’n, kosan benin mun yɛ bla’n fa usɛli i wun-ɔn?
-
?Wafa sɛ yɛ Biblu’n nun like suanlɛ’n ukɛli i-ɔ?
Biblu’n wla e fanngan kɛ e usa kosan. An kanngan Matie 7:7 nun, i sin’n, an koko kosan yɛ’n i su yalɛ:
-
?Kosan benin mun yɛ a fa usa ɔ wun mɔ a kunndɛ kɛ á wún i su tɛlɛ’n Biblu’n nun-ɔn?
5. Biblu’n nun kannganlɛ’n kwla yo ɔ fɛ
Sran kpanngban be klo Biblu’n nun kannganlɛ’n yɛ be ɲan su ye. An bo VIDEO’N, i sin’n an koko kosan yɛ’m be su yalɛ.
-
?Video’n nun’n, wafa sɛ yɛ gbanflɛn nin talua’m be bu fluwa nun kannganlɛ’n niɔn?
-
?Kannzɛ bɔbɔ be kloman kannganlɛ’n, ngue ti yɛ Biblu’n nun kannganlɛ’n yo be fɛ-ɔ?
Biblu’n nun ndɛ’n kwla yo maan e wla gua ase, yɛ e ɲan like e fa e wla gua su. An kanngan Rɔmunfuɛ Mun 15:4 nun, i sin’n an koko kosan yɛ’n i su yalɛ:
-
Biblu’n fɔnvɔ e, yɛ ɔ yo maan e ɲan like e fa e wla e gua su. ?A kunndɛ kɛ á sí ndɛ sɔ’n nun kpa ekun?
6. Sran uflɛ kwla uka e naan y’a wun Biblu’n nun ndɛ’n i wlɛ
Sran wie’m be ngunmin be kanngan Biblu’n nun, sanngɛ be wunnin kɛ, kɛ be nin sran uflɛ be koko i nun ndɛ’n i su yalɛ’n i sɔ’n uka be kpa. An kanngan Sa Nga Be Yoli’n 8:26-31 nun, i sin’n an koko kosan yɛ’n i su yalɛ:
-
?Ngue yɛ e kwla yo naan y’a wun Biblu’n nun ndɛ’n i wlɛ-ɔ?—Nian ndɛ mma 30 nin 31 nun.
Etiopi bian’n kunndɛli kɛ be ukɛ i naan ɔ wun Ɲanmiɛn Ndɛ’n i wlɛ. Andɛ’n, sran kpanngban be wun kɛ, kɛ be nin sran uflɛ be koko Ɲanmiɛn Ndɛ’n i su yalɛ’n i sɔ’n uka be kpa wie.
SRAN WIE’M BE WAAN: “Biblu’n nun like suanlɛ’n ti blɛ sacilɛ.”
-
?Wafa sɛ yɛ a bu ndɛ sɔ’n niɔn? ?Ngue ti-ɔ?
NDƐ’N I KPƆLƐ BOLƐ
Biblu’n man e afɔtuɛ wie mɔ be kwla uka e-ɔ. Ɔ tɛ kosan cinnjin’m be su, ɔ fɔnvɔ sran, yɛ ɔ yo maan sran ɲan like fɛ i wla gua su.
Ndɛ’n i nun flanlɛ
-
?Afɔtuɛ benin mun yɛ Biblu’n man e naan y’a kwla di aklunjɔɛ-ɔ?
-
?Kosan benin wie mun yɛ Biblu’n tɛ be su-ɔ?
-
?Biblu’n nun ndɛ benin yɛ a kunndɛ kɛ á sí i-ɔ?
NDƐ WIE MUN EKUN
Wafa nga Biblu’n nun afɔtuɛ’m be kwla yo e ye andɛ’n.
“E kwla di Biblu’n nun afɔtuɛ’m be su tititi” (Sasafuɛ Tranwlɛ’n, afuɛ 2018 No. 1)
Wafa nga Biblu’n ukali bian kun mɔ kɛ ɔ fɛ i i kaan nun lele’n sa kun kleli i yalɛ’n.
Afɔtuɛ wie mɔ be kwla uka awlobo mun’n.
“Afɔtuɛ 12 mɔ be kwla yo awlobo’m be ye’n” (An Tinnge!, afuɛ 2018 No. 2)
Biblu’n kle sran ng’ɔ sie mɛn’n.
?Ngue ti yɛ Biblu’n nun like suanlɛ’n ti cinnjin-ɔn?—Tɛnndɛnfuɛ’n (3:14)