I su junman dilɛ'n i siesielɛ

Kle aniɛn'n

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Kɔ i nun ndɛ'n su trele

Zoova i Lalofuɛ mun

Wawle

Amun kle amun mma’m be like

 LIKE SUANLƐ 8

Zoziasi trali sran nga be ti kpa’n be janvuɛ.

Zoziasi trali sran nga be ti kpa’n be janvuɛ.

?A bu i kɛ sa nga ɔ ti kpa’n i yolɛ’n ti kekle?— Sran kpanngban be bu i kɛ ɔ ti kekle. Biblu’n se e kɛ sa nga ɔ ti kpa’n i yolɛ yoli kekle mannin bakan kun. I dunman’n yɛle Zoziasi. Sanngɛ ɔ trali sran nga be ti kpa’n be janvuɛ. I janvuɛ sɔ mun yɛ be ukɛli i ɔ. Maan e kan Zoziasi nin i janvuɛ sɔ mun be ndɛ.

Zoziasi i baba’n yɛle Amɔn. Amɔn dili Zida nvle’n su famiɛn. I klun yo wi yɛ ɔ sɔ amuɛn. Kɛ ɔ wuli’n, Zoziasi yoli Zida nvle’n su famiɛn. Kɛ ɔ́ yó sɔ nn ɔ le afuɛ mɔcuɛ cɛ! ?A bu i kɛ ɔ yoli klunwifuɛ kɛ i baba sa?— Cɛcɛ, w’a yoman sɔ!

Sofoni seli sran’m be kɛ nán be sɔ amuɛn

I nun nga Zoziasi te yo kaan kpa bɔbɔ’n ɔ kunndɛli kɛ ɔ́ yó Zoova klun sa. Ɔ maan sran nga be klo Zoova’n, be yɛ ɔ trali be janvuɛ ɔ. Sran sɔ’m be ukɛli i naan w’a yo sa nga ɔ ti kpa’n. ?Wan mun yɛ be yoli Zoziasi i janvuɛ wie ɔ?

I janvuɛ mun be nun kun yɛle Sofoni. Sofoni ti Ɲanmiɛn nuan ijɔfuɛ. Ɔ seli Zidafuɛ’m be kɛ sɛ b’a yaciman amuɛn sɔlɛ’n,  sa tɛtɛ ɲán be. Zoziasi fali Sofoni i ndɛ’n su, ɔ suli Zoova. W’a sɔman amuɛn.

Zoziasi i janvuɛ kun ekun yɛle Zeremi. Zeremi nin Zoziasi be ti wiengu yɛ be ɲinnin lika kunngba’n nun. Be janvuɛ m’ɔ trali kpa’n ti’n, kɛ Zoziasi wuli’n, Zeremi toli jue kun fa kleli kɛ i wla lo i. Zeremi nin Zoziasi be ukali be wun naan b’a kwla yo sa nga ɔ ti kpa’n, naan kusu b’a kwla yo Zoova klun sa.

Zoziasi nin Zeremi be ukali be wun naan b’a kwla yo sa nga ɔ ti kpa’n

?Ngue yɛ Zoziasi i su ndɛ’n kle wɔ ɔ?— I nun nga Zoziasi te yo kaan kpa bɔbɔ’n ɔ kunndɛli kɛ ɔ́ yó sa nga ɔ ti kpa’n. Ɔ sili kɛ sran nga be klo Zoova’n yɛ ɔ fata kɛ ɔ tra be janvuɛ ɔ. Ɔ kusu, be nga be klo Zoova mɔ be kwla uka ɔ naan w’a yo sa nga ɔ ti kpa’n, be yɛ ɔ fata kɛ a tra be janvuɛ ɔ.

KANNGAN BE Ɔ BIBLU’N NUN

  • 2 Be Nyoliɛ 33:21-25; 34:1, 2; 35:25