Kɔ i nun ndɛ'n su trele

Kɔ i nun yiyilɛ nɲɔn su'n su trele

Kɔ like ng'ɔ o fluwa'n nun'n su trele

Zoova i Lalofuɛ mun

Wawle

Amun kle amun mma’m be like

 LIKE SUANLƐ 2

Rebeka yoli like nga ɔ jɔ Zoova klun’n

Rebeka yoli like nga ɔ jɔ Zoova klun’n

Be flɛ bla kun kɛ Rebeka. Bla sɔ’n klo Zoova. Be flɛ i wun kɛ Izaaki. Izaaki kusu klo Zoova wie. ?Ɔ yoli sɛ yɛ Rebeka nin Izaaki be sili be wun ɔn? ?Ngue yɛ Rebeka yoli mɔ ɔ jɔli Zoova klun ɔn? Maan e dun mmua e kan Rebeka i wun Izaaki i ndɛ kan ka.

Izaaki i baba’n yɛle Abraamu. I manmin’n yɛle Sara. Be tran Kanaan mɛn’n nun lɔ. Kanaan lɔ sran’m be suman Zoova. Sanngɛ bla nga ɔ su Zoova’n, yɛ Abraamu kunndɛ kɛ i wa’n jɛ i ɔ. I sɔ’n ti’n, ɔ sunmannin i sufuɛ kun kɛ ɔ wɔ Aran naan ɔ ko ja bla man Izaaki. Afin i osufuɛ wie mun be tran Aran lɔ. Atrɛkpa Eliezɛli yɛ Abraamu sunmɛnnin i ɔ.

Rebeka kplinnin su kɛ ɔ́ mían i ɲin sá nzue mán ɲɔnngɔnmɛn mun

Eliezɛli nin Abraamu i juman difuɛ wie mun yɛ be ɔli ɔ. Atin’n wali kpa. Be fali aliɛ ɔ nin ninnge kpakpa wie mun sieli ɲɔnngɔnmɛn blu su yɛ be fa ɔli ɔ. ?Sanngɛ Eliezɛli yó sɛ naan w’a wun bla nga ɔ ko jɛ i ko man Izaaki’n? Kɛ ɔ nin i wiengu mun be juli Aran lɛ’n, be jrannin gbo kun wun lɛ. Ɔ si kɛ bla’m be nzue salɛ dɔ’n w’a ju. Yɛ ɔ srɛli Zoova kɛ: ‘Talua nga ń sé i kɛ ɔ man min nzue naan ɔ sa wie man min ɲɔnngɔnmɛn mun’n, nn talua sɔ’n yɛ a kpɛli i kɛ ɔ yo Izaaki liɛ ɔ.’

I nuan w’a tɔman yɛ Rebeka bali nzue salɛ ɔ. Biblu’n se kɛ ɔ ti talua klanman kpa. Eliezɛli seli i kɛ ɔ mɛn i nzue naan ɔ  nɔn. Yɛ Rebeka tɛli i su kɛ: ‘Nannan, ń sá nzue ḿ mán ɔ. Kpɛkun ń sá wie ḿ mán ɔ ɲɔnngɔnmɛn mun.’ Ɲɔnngɔnmɛn’m be nɔn nzue kpa. I ti’n bu i akunndan nian. Rebeka wanndi ko sa nzue, ɔ wanndi ba, sɔ leleele. ?Kɛ a nian desɛn’n, a wunman kɛ Rebeka su di junman kekle’n?— Kɛ Eliezɛli srɛli Zoova’n, wafa nga Zoova tɛli i su’n, ɔ boli i nuan.

Eliezɛli mannin Rebeka ninnge nglanmannglanman kpa. Rebeka fali Eliezɛli nin i wiengu mun ɔli i baba i awlo lɔ. Eliezɛli kannin ndɛ nga ti yɛ Abraamu sunmɛnnin i’n kleli Rebeka i osufuɛ mun. Kpɛkun kɛ ɔ srɛli Zoova’n, wafa nga ɔ tɛli i su’n, ɔ kan kleli be wie. Ɔ yoli Rebeka i osufuɛ’m be fɛ. I ti’n be kplinnin su kɛ ɔ ko ja Izaaki.

Rebeka suli Eliezɛli su Kanaan lɔ ɔ ko jali Izaaki

?Sanngɛ a bu i kɛ Rebeka klo kɛ ɔ́ já Izaaki?— Rebeka si kɛ Zoova yɛ ɔ sunmannin Eliezɛli ɔ. I sɔ’n ti’n, kɛ i osufuɛ’m be usɛli i sɛ ɔ klo kɛ ɔ́ kɔ́ Kanaan naan ɔ́ kó já Izaaki’n, ɔ tɛli be su kɛ: ‘Ɛɛn, ń kɔ́.’ Yɛ ndɛndɛ kpa, ɔ nin Eliezɛli be ɔli ɔ. Kɛ be juli Kanaan lɔ’n, ɔ jali Izaaki.

Kɛ mɔ Rebeka yoli like nga Zoova kunndɛ kɛ ɔ yo’n ti’n, Zoova yoli i mo. Zezi yoli Rebeka i anunman’m be nun kun. Sɛ ɔ kusu a yo like nga ɔ jɔ Zoova klun kɛ Rebeka fa yoli’n sa’n, ɔ́ yó ɔ mo wie.

KANNGAN BE Ɔ BIBLU’N NUN