Wie’n i asabesin’n yɛle nguan’n. Wie’n ti kɛ lafilɛ pɔɔ sa. (Zan 11:11-14) Be nga be wuli’n be kwlá timan sa, be kwlá wunman ase, be kwlá ijɔman, annzɛ be kwlá buman akunndan. (Akunndanfuɛ 9:5, 10) Be nga be suman Ɲanmiɛn kɛ ng’ɔ nin i fata’n sa’n, be se sran’m be kɛ kɛ sran wu’n ɔ nin i nannan’m be ko tran lika kun nun. Sanngɛ Biblu’n kanman sɔ.

Be nga be wuli’n be kwlá ukaman e, kpɛkun be kwlá yoman e abɔlɛ. Sran sunman be bu i kɛ sɛ be yo be nga be wuli’n be sɛ dandan’n, naan be yi tɛ mun’n, ɔ́ yó be fɛ. I sɔ’n jɔman Ɲanmiɛn i klun. Afin ɔ ti gblɛ nga Satan kpɛ be’n, be nun kun. Ɔ kwlá yoman be nga be wuli’n be fɛ wie kusu, afin be nunman nguan nun kun. Ɔ fataman kɛ e sro be nga be wuli’n naan e sɔ be wunmiɛn. Ɲanmiɛn kunngba cɛ yɛ ɔ fata kɛ e su i-ɔ.—Matie 4:10.

Be nga be wuli’n bé ɲán nguan ekun. Zoova wá tínnge be nga be wuli’n naan be tran mɛn klanman’n nun asiɛ’n su. Blɛ sɔ’n te o e ɲrun lɔ. (Zan 5:28, 29; Sa Nga Be Yoli’n 24:15) Ɲanmiɛn kwla tinnge sran nga be wuli’n kɛ nga amun kwla tinnge sran ng’ɔ su lafi’n sa cɛ.—Mark 5:22, 23, 41, 42.

Satan i ato ndɛ kun m’ɔ fa truli i lika’n nun yɛle kɛ e wuman. Satan nin i mmusu’m be yo maan sran’m be bu i kɛ be nga be wuli’n be o lɔ, naan be kwla man e tukpacɛ yɛ be kwla kle e yalɛ. Wie liɛ’n, Satan fa laliɛ cɛnlɛ nin aolia nun ninnge’m be wunlɛ’n yɛ ɔ fa laka sran mun-ɔn. Be nga be kunndɛ kɛ be nin sran nga be wuli’n bé ijɔ́’n, Zoova bu be fɔ.—Mmla’n 18:10-12.