Ezekiɛli 5:1-17
5 “Sanngɛ sran wa, ɔ liɛ’n fa tokofi kun m’ɔ la kpa’n naan ɔ kaci ɔ sa nun kɛ akanza yifuɛ’m be razuaa’n sa. Yi ɔ ti’n nin ɔ akanza’n, kpɛkun fa toe kun fa sunnzun be naan bubu nun nsan.
2 Kɛ cɛn nga ɔ fata kɛ be fa alɛ wla klɔ’n i sin’n be ko sin’n, yrɛ i bue kun sin nun.+ I sin’n, fɛ i bue kun ekun naan fa tokofi fa finfin su naan bo sin yia klɔ’n,+ kpɛkun sanndi i bue kasiɛn’n nun naan aunmuan’n fɛ i wɔ, ń má yí min tokofi’n ń fá sú i su.+
3 “Ɔ fata kɛ a fɛ i bue kan fa wlɛ i ɔ tralɛ’n i nuan buwa’n* nun.
4 Kpɛkun fa wie ekun naan fa guɛ i sin nun naan ɔ yra. Sin sɔ’n ɔ́ trú Izraɛli nvle’n nunfuɛ’m be kwlaa be su.+
5 “Ndɛ nga Miɛn Zoova m’ɔ Sie Like Kwlakwla’n kan’n yɛ: ‘Zerizalɛmun yɛ ɔ o yɛ. M’an fɛ i m’an sie nvlenvle’m be afiɛn, yɛ mɛnmɛn’m be sin yiɛ i.
6 Sanngɛ w’a faman ndɛ nga n kannin’n, ɔ nin min mmla’m be su. Ɔ yoli klunwi dan trali nvlenvle mun nin mɛnmɛn nga be sin yiɛ i’n.+ Afin be nga be tran lɔ’n be kpaloli ndɛ nga n kan’n, b’a nantiman min mmla’m be su.’
7 “I sɔ’n ti’n, ndɛ nga Miɛn Zoova m’ɔ Sie Like Kwlakwla’n kan’n yɛ: ‘Amun yoli sa tɛ dan trali nvlenvle nga be sin yia amun’n, amun a nianman min mmla’m be su b’a nantiman, yɛ amun a faman ndɛ nga n kan’n su. Nvlenvle nga be sin yia amun’n be ndɛ liɛ nga be kannin’n i su yɛ amun fali-ɔ.+
8 I sɔ’n ti’n, ndɛ nga Miɛn Zoova m’ɔ Sie Like Kwlakwla’n ɔ kan’n yɛ: “Ee klɔ, e nin wɔ e le i,+ n bɔbɔ ń má tú ɔ fɔ nvlenvle’m be ɲin bo lɛ.+
9 Tete sa nga a yo be’n be ti’n, sa nga ń má fá yí ɔ su’n, n nin-a yomɛn i le, yɛ n su yomɛn i wunsu kun le.+
10 “‘“Ɔ maan siɛ nga be o ɔ lɔ’n, bé wá dí be mma mun,+ yɛ ba mun bé dí be si mun. Ń má tú ɔ fɔ, kpɛkun be kwlaa nga bé ká lɛ’n, ń sánndi be lika’n i bue kwlaa su.”’*+
11 “‘Ndɛ nga Miɛn Zoova m’ɔ Sie Like Kwlakwla’n ɔ kan’n yɛ: ‘N wo lɛ sakpa, kɛ mɔ a fali ɔ amuin mɔ be ti like kain’n, ɔ nin ɔ tete sa’m be kwlaa yoli min sua’n i fiɛn’n ti’n,+ n kusu ń má yí ɔ blo. N su siman ɔ aunnvɔɛ,* yɛ a su yoman min annvɔ.+
12 Sɛ be bubu ɔ nun sran’m be nun nsan’n, tukpacɛ m’ɔ sa ndɛndɛ’n ɔ́ kún be bue kun, annzɛ awe’n ɔ́ núnnún be. Kpɛkun bé fá tokofi bé kún be bue kun ekun ɔ wun lɛ.+ Kpɛkun ń fá be bue kasiɛn’n ń sánndi lika’n i bue kwlaa su,* yɛ ń yí min tokofi’n ń fá sú be su.+
13 I sin’n, min ya’n ɔ́ wíe, ya dan nga n fɛli i be wun’n ɔ́ kán ase, kpɛkun min klun jɔ́.+ Kɛ n ko yi min ya dan’n i nglo be su ko wie’n, bé wá wún i wlɛ jrɛiin kɛ n bɔbɔ min Zoova n kan n tinnin su kpa kɛ min kunngba cɛ yɛ ɔ fata kɛ be su min-ɔn.+
14 “‘Ń má yó maan á sáci mlɔnmlɔn, yɛ nvlenvle nga be bo sin yia wɔ’n, ɔ nin be kwlaa nga bé sín ɔ wun lɛ mɔ bé wún wɔ’n bé yó ɔ finfin.+
15 Kɛ ń má fá ya dan’n, ń tú ɔ fɔ kekle kpa, yɛ nvlenvle nga be bo sin yia wɔ’n bé yó ɔ finfin,+ be su buman ɔ like fi. Bé wá fá sa ng’ɔ juli ɔ su’n bé tú be wun fɔ, yɛ á yó be kain. Min bɔbɔ Zoova yɛ n kan sɔ-ɔ.
16 “‘Ń má súnman awe’n i ta mma mɔ be kun’n naan be ko nunnun amun. Ta mma nga ń má súnman be’n bé wá kún amun.+ Ń má yó maan awe’n wá yó tɛ kpa amun su, afin ń má yó maan amun aliɛ mun bé wíe.*+
17 Ń má súnman awe’n, ɔ nin blo nnɛn wlɛfuɛ mun+ be nga be tran ɔ su lɔ’n be sin, bé wá yó maan ɔ mma’m bé fí ɔ sa. Ń má fá tukpacɛ m’ɔ sa ndɛndɛ’n, ɔ nin sran mmoja ase gualɛ’n ń yí ɔ piɛ, kpɛkun ń súnman tokofi kun ɔ sin.+ Min bɔbɔ Zoova yɛ n kan sɔ-ɔ.’”
Ja ngua lɔ ndɛ mun
^ Annzɛ “i nuan su’n.”
^ Ebr., “aunmuan kwlaa nun.”
^ Ebr., “Min ɲinma’n su siman ɔ aunnvɔɛ.”
^ Ebr., “aunmuan kwlaa nun.”
^ Ebr., “ń má búbú amun kpanwun waka mun.” Atrɛkpa’n, waka mɔ be fa kpanwun be fa wlawla su be sie’n i ndɛ yɛ be kan-ɔn.
