Ezekiɛli 37:1-28
37 Zoova i tinmin’n wluli min nun,* Zoova fɛli i wawɛ’n fali min ko sieli i lika kpɛtɛkplɛɛ’n i afiɛn lɔ,+ yɛ lɔ’n ti sran owie ngunmin.
2 Ɔ yoli maan n bo sin yiali be, kpɛkun n wunnin kɛ sran owie kpanngban kpa gua lika kpɛtɛkplɛɛ’n nun lɛ, yɛ b’a wu kee kpa.+
3 Ɔ seli min kɛ: “?Sran wa, owie nga’m be kwla ɲan nguan ekun?” Yɛ n tɛli su kɛ: “Min Min Zoova, wɔ mɔ a Sie Like Kwlakwla’n, ɔ kunngba cɛ yɛ a si nun-ɔn.”+
4 Kpɛkun ɔ seli min kɛ: “Kan sa ng’ɔ́ wá jú owie nga’m be su’n i ndɛ, se be kɛ: ‘Owie kee mun, amun tie ndɛ nga Zoova kan’n:
5 “‘Ndɛ nga Miɛn Zoova m’ɔ Sie Like Kwlakwla’n kan kle owie nga mun’n yɛ: “Ń má yó maan wunmiɛn wlú amun nun yɛ amún ɲán nguan ekun.+
6 Ń má yó maan amún ɲán ndin nin nnɛn ba, kpɛkun ń fá wunnɛn kplo ń káta amun wun, ń wlá amun nun wunmiɛn, kpɛkun amún ɲán nguan ekun, yɛ amún wá sí jrɛiin kɛ n ti Zoova.”’”
7 N kannin ndɛ nga be seli min kɛ n kan’n. Kɛ n wieli ndɛ’n i kan cɛ’n, n tili like kun i tɛlɛ, ɔ tɛ klɔklɔklɔ klɔklɔklɔ, kpɛkun owie’m be boli be su sasalɛ bo, owie kun sali owie uflɛ su.
8 Kpɛkun n wunnin kɛ be ɲannin ndin nin nnɛn ba, yɛ wunnɛn kplo katali be wun. Sanngɛ wunmiɛn nin-a baman be nun.
9 I sin’n ɔ seli min kɛ: “Kan min nuan ndɛ’n kle aunmuan’n. Sran wa, kan min nuan ndɛ’n, se aunmuan’n kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ee aunmuan,* fin asiɛ’n i bue nnan’m be su* bla, yɛ fita sran nga be kunnin be yɛ’n be su naan be ɲan nguan ekun.”’”
10 N kannin ndɛ ng’ɔ seli min kɛ n kan’n, yɛ wunmiɛn wluli be nun, be ɲannin nguan ekun, kpɛkun be jrannin be ja’n su.+ Be ti sonja kpanngban kpa.
11 Ɔ seli min kɛ: “Sran wa, owie nga mun’n, be yɛle Izraɛli nvle wunmuan’n.+ Ndɛ nga be kan’n yɛ: ‘E owie’m b’a wu kee, e leman like mɔ é fá e wla é gúa su-ɔ,+ e liɛ w’a wie mlɔnmlɔn.’
12 Kan sa ng’ɔ́ wá jú’n i ndɛ, se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Min sran mun, ń má tíke amun asieliɛ’m be su,+ yɛ ń yí amun amun asieliɛ’m be nun ń fíte, kpɛkun ń fá amun ń kɔ́ Izraɛli mɛn’n nun lɔ.+
13 Ee, min sran mun, kɛ ń má tíke amun asieliɛ’m be su, mɔ ń yí amun amun asieliɛ’m be nun ń fíte’n, amún wá sí jrɛiin kɛ n ti Zoova.”’+
14 ‘Ń má fá min wawɛ’n ń wlá amun nun yɛ amún ɲán nguan ekun,+ ń má fá amun trán amun mɛn’n nun lɔ, kpɛkun amún wá sí jrɛiin kɛ n bɔbɔ min Zoova, n kannin ndɛ yɛ n yoli i su sa.’ Ndɛ nga Zoova kan’n yɛ ɔ o lɛ-ɔ.”
15 Zoova kannin ndɛ kleli min ekun. Ɔ seli kɛ:
16 “Wɔ, sran wa, fa waka sin kun naan klɛ su kɛ: ‘Zida nin Izraɛlifuɛ nga be nin i be o’n be liɛ.’+ I sin’n, fa waka sin uflɛ naan klɛ su kɛ: ‘Zozɛfu liɛ, yɛle kɛ Efraimun i waka sin’n ɔ nin Izraɛli nvle’n nunfuɛ’m be kwlaa nga be nin i o’n be liɛ.’+
17 Fa be mantan be wiengu su naan be yo waka kunngba ɔ sa nun.+
18 Sɛ ɔ nvle’n nunfuɛ mun* be se wɔ kɛ: ‘Tu ninnge sɔ’m be bo kle e’n,’
19 se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má fá Zozɛfu i waka m’ɔ o Efraimun i sa nun’n, ɔ nin Izraɛli akpasua nga be nin i o’n, kpɛkun ń fá be ń fá sá Zida i waka liɛ’n su. Ń yó maan bé yó waka kunngba,+ yɛ bé yó wunmuan kun min sa nun.”’
20 Maan waka nga a klɛli be su’n be tran ɔ sa nun naan b’a kwla wun be.
21 “Se be kɛ: ‘Ndɛ nga Miɛn Zoova m’ɔ Sie Like Kwlakwla’n kan’n yɛ: “Ń má kó fá Izraɛlifuɛ mun nvlenvle nga be ɔli be nun’n be nun lɔ ń bá, kpɛkun ń fá be lika kwlaa nun ń má tían be nuan, kpɛkun ń fá be ń kɔ́ be mɛn’n nun lɔ.+
22 Ń yó maan bé yó nvle wunmuan kun mɛn’n nun,+ Izraɛli oka’m be su. Famiɛn kun yɛ ɔ́ síe be kwlaa-ɔ,+ be su yoman nvle nɲɔn kun, yɛ be su yoman famiɛn diwlɛ nɲɔn kun.+
23 Be su faman be amuin mɔ be ti like kain’n,* nin be tete sa mun, nin be fɔnlɛ mun yoman be wun fiɛn kun.+ Ń má dé be sa tɛ nga be yoli mɔ i ti yɛ be nin min b’a nantiman klanman’n i nun, kpɛkun ń yó be sanwun. Bé káci min sran, yɛ n kusu ń yó be Ɲanmiɛn.+
24 “‘“Min sufuɛ Davidi yó be famiɛn,+ yɛ be sunianfuɛ’n yó kunngba.+ Bé nánti ndɛ nga n kan’n su, yɛ bé nían nun bé nánti min mmla’m be su.+
25 Bé trán mɛn nga n fa mannin min sufuɛ Zakɔbu mɔ amun nannan’m be trannin nun’n i nun,+ bé trán nun tititi,+ be bɔbɔ nin be mma mun,* ɔ nin be mma’m be mma liɛ mun.+ Yɛ min sufuɛ Davidi yó be su kpɛn* tititi.+
26 “‘“E nin be é wá trá fɔundi aenguɛ.+ Ɔ́ yó e nin be e afiɛn aenguɛ kun m’ɔ́ ká lɛ tititi-ɔ. Ń fá be ń trán be mɛn’n nun, ń yó maan bé sɔ́n kaka kpa,+ ń fá min sua’n ń síe i be afiɛn, yɛ ɔ́ ká lɛ tititi.
27 Min tannin sua’n* trán be afiɛn, yɛ ń yó be Ɲanmiɛn, be kusu bé yó min sran.+
28 Kɛ min tannin sua’n wá trán be afiɛn tititi’n, nvlenvle’m bé wá sí jrɛiin kɛ n bɔbɔ min Zoova yɛ n su yo Izraɛli i sanwun-ɔn.”’”+
Ja ngua lɔ ndɛ mun
^ Ebr., “i sa’n tranmin min su.”
^ Annzɛ “wunmiɛn”, “wawɛ.”
^ Annzɛ “aunmuan nnan’m be nun.”
^ Ebr., “ɔ nvle’n nunfuɛ’m be mma yasua mun.”
^ Ebre nun ndɛ sɔ’n ɔ nin ndɛ kun mɔ be fa kan “sewie’n” i ndɛ’n be kɔ likawlɛ. Be fa kan like m’ɔ yo kain’n i ndɛ.
^ Annzɛ “sran dan.”
^ Ebr., “be mma yasua mun.”
^ Annzɛ “tranwlɛ’n”, “awlo’n.”
