1 Famiɛn Mun 10:1-29
10 Saba famiɛn bla’n tili Salomɔn i su ndɛ mɔ i ti’n Zoova i dunman’n fu’n.+ Ɔ bali naan ɔ́ úsɛ i kosan* kekleekle wie mun ɔ́ fá kpɛ́ i ngwlɛlɛ’n i bo.+
2 Ɔ juli Zerizalɛmun lɔ, ɔ nin sran kpanngban kpa yɛ be bali-ɔ.+ Ɲɔnngɔnmin ng’ɔ fa be bali’n be suali bomie ngo,+ ɔ nin sika ɔkwlɛ kpanngban kpa, nin yɔbuɛ kpakpa wie mun. Ɔ wa wunnin Salomɔn wun, kpɛkun sa kwlaa nga be ti i cinnjin’n, ɔ koko kleli i.
3 Salomɔn tɛli i kosan’m be kwlaa be su, ɔ leman ndɛ kun sa mɔ i kekle’n* ti’n, famiɛn’n w’a kwlá yiyiman nun w’a klemɛn i-ɔ.
4 Kɛ Saba famiɛn bla’n wunnin Salomɔn i ngwlɛlɛ dan’n,+ m’ɔ wunnin sua ng’ɔ kplannin’n,+
5 ɔ nin aliɛ nga be fa sie i tabli’n su’n,+ ɔ nin wafa nga i sufuɛ’m be trantran’n, ɔ nin wafa nga i junman difuɛ’m be fa ninnge mun siesie i tabli’n su’n, ɔ nin be wun wlawlalɛ’n, ɔ nin i nzan sufuɛ mun, ɔ nin tɛ nga kɛ bé yí’n be yra nnɛn’n i kɔlikɔli’n m’ɔ yi i titi Zoova i sua’n nun’n, i nuan boli i wun dan tratrali su.*
6 Ɔ maan ɔ seli famiɛn’n kɛ: “Ninnge nga a yoli be’n* nin ɔ ngwlɛlɛ’n be su ndɛ nga n tili i min mɛn’n nun lɔ’n, ɔ ti nanwlɛ.
7 Sanngɛ m’an lafiman ndɛ nga be kan kleli min’n su lele naan m’an ba, naan min bɔbɔ min ɲinma’n w’a wun i. Nanwlɛ, sɛ be bu ngwlɛlɛ dan nga a si i’n i nun nɲɔn’n, nga be kɛnnin i ndɛ kleli min’n ɔ junman bue kun bɔbɔ. Ɔ ngwlɛlɛ’n nin ɔ aɲanbeun’n be tra nga n tili’n fatifati.
8 Ɔ sran mun, nin ɔ sufuɛ nga be jran ɔ ɲrun titi mɔ be ti ɔ ngwlɛlɛ ndɛ mun’n, be liɛ su ti ye-o!+
9 Maan be manman ɔ Ɲanmiɛn Zoova+ mɔ i klun jɔli ɔ wun m’ɔ fali wɔ sieli i Izraɛli famiɛn bia’n su’n. Kɛ mɔ Zoova klo Izraɛli tititi’n ti’n, ɔ sieli wɔ famiɛn naan a di jɔlɛ mun klanman yɛ a yo sa i nuan su sɛsɛ.”
10 I sin’n, ɔ mannin famiɛn’n i sika ɔkwlɛ talan* ya kun ablaɔn (120), nin bomie ngo+ kpanngban kpa, ɔ nin yɔbuɛ kpakpa wie mun.+ Kɛ ɔ fin lɛ’n, b’a faman bomie ngo kpanngban kɛ nga Saba famiɛn bla’n fa blɛli Famiɛn Salomɔn’n sa b’a baman kun.
11 Iramun i mmeli nga be fali sika ɔkwlɛ Ofii+ lɔ bali’n, be fali waka nga be flɛ i algumimun’n,*+ ɔ nin yɔbuɛ kpakpa wie mun+ Ofii lɔ bali wie.
12 Famiɛn’n fali algumimun waka’n yoli ninnge wie mɔ be kwla kisa su’n Zoova i sua’n nin famiɛn’n i sua’n* be nun lɔ. Asa ekun’n, ɔ fa wie yoli jru nin miziki bolɛ ninnge nga be le ɲanman’n fa mannin jue tofuɛ mun.+ Lele nin andɛ’n, be nin-a faman algumimun waka kɛ ngalɛ’n sa be nin-a baman kun, yɛ be nin-a wunman wie kun le.
13 Ninnge kwlaa nga Saba famiɛn bla’n klo i’n, ɔ nin ng’ɔ srɛli’n, famiɛn Salomɔn fa mɛnnin i. Yɛ klun ufue su’n* ɔ fali ninnge wie mun ekun ukali su mɛnnin i. I sin’n, ɔ nin i sufuɛ’m be sali be sin i mɛn’n nun lɔ.+
14 Sika ɔkwlɛ nga be fa blɛ Salomɔn afuɛ kwlakwla’n ti talan ya nsiɛn ablesiɛn-nin-nsiɛn (666).+
15 Asa ekun’n, ninnge atɛ yofuɛ mun, nin aata difuɛ mun, nin Arabu famiɛn’m be kwlaa nin mɛn siefuɛ’m be blɛ i like.
16 Famiɛn Salomɔn fali sika ɔkwlɛ m’ɔ sɛnngɛnnin i nin like uflɛ’n fa yoli ɲrɛn dandan ya nɲɔn (200)+ (Kɛ bé yó ɲrɛn dan kun’n, be fa sika ɔkwlɛ sikli* ya nsiɛn (600)).+
17 Ɔ fali sika ɔkwlɛ m’ɔ sɛnngɛnnin i nin like uflɛ’n fa yoli ɲrɛn kanngan ya nsan (300) (Kɛ bé yó ɲrɛn kaan kun’n, be fa sika ɔkwlɛ minin* nsan). I sin’n, ɔ fa be sieli i Liban Bo Sua’n+ nun lɔ.
18 Asa ekun’n, famiɛn’n fali sui je yoli famiɛn bia+ dan kun, kpɛkun ɔ fali sika ɔkwlɛ jrɛiin kɛtɛli i wun.+
19 Be ja takatakawlɛ nga be fa fu asikalie’n su naan b’a to famiɛn bia’n, be ti nsiɛn. Yɛ like gbagblagba kun o bia sɔ’n i ti su. Be sa siewlɛ o bia’n i bue nɲɔn’m be su. Yɛ asɔmɔli+ nɲɔn be o be sa siewlɛ sɔ’m be wun lɛ.
20 Ɔ yoli asɔmɔli blu-nin-nɲɔn (12) be ja takatakawlɛ nsiɛn nga be fa fu asikalie’n su’n, be su. Be ja takawlɛ kun su’n, asɔmɔli kun o i tiwa kun su, yɛ kun ekun o i tiwa kun su. Be nin-a yomɛn i sɔ like’n le nvle uflɛ nun.
21 Sika ɔkwlɛ yɛ be fa yoli Famiɛn Salomɔn i klowa ng’ɔ nɔn be nun’n be kwlaa-ɔ. Liban Bo Sua’n+ i nun ninnge’m be kwlaa be ti sika ɔkwlɛ jrɛiin, b’a faman sika b’a yiman like wie fi. Afin Salomɔn blɛ su’n be buman sika’n i like.+
22 Afin famiɛn’n le Taasisi+ mmeli wie mun, be nin Iramun i mmeli’m be kɔ jenvie’n su lɔ. Afuɛ nsan kwlaa’n, kɛ mmeli nga be fin Taasisi’n bé bá’n, sika ɔkwlɛ nin sika, nin sui je,+ nin ndo, ɔ nin anunman nga be flɛ i kɛ pan’n be yi be piɛ.
23 Famiɛn Salomɔn i aɲanbeun’n+ nin i ngwlɛlɛ’n+ trali asiɛ’n su famiɛn’m be kwlaa be liɛ’n.
24 Asiɛ wunmuan’n su’n, sran’m be kunndɛli kɛ bé wún Salomɔn i wun* naan bé tíe i ngwlɛlɛ ndɛ nga Ɲanmiɛn Kpli fa wlɛli i ti nun’n.+
25 Be tinuntinun be blɛ i like: Sika nin sika ɔkwlɛ ninnge, ɔ nin tralɛ, nin alɛ kunlɛ ninnge, nin bomie ngo, nin nnɛn kpanngɔ, ɔ nin milɛ. Afuɛ kwlaa’n, kɛ be yo sɔ-ɔ.
26 Salomɔn kunndɛli kakaklolo nin nnɛn kpanngɔ* kpanngban kpa. Ɔ ɲannin kakaklolo akpi kun ya nnan (1.400), nin nnɛn kpanngɔ*+ akpiakpi blu-nin-nɲɔn (12.000). Ɔ sieli wie mun kakaklolo klɔ’m be su. Yɛ ɔ sieli wie mun i bɔbɔ i wun lɛ, Zerizalɛmun lɛ.+
27 Famiɛn’n yoli maan sika’n wa truli Zerizalɛmun lɔ kɛ yɔbuɛ sa. Kpɛkun sɛdri waka’m be wa truli lika’n nun kɛ Sefela’n nun lɔ sikomɔɔ waka mun sa.+
28 Ezipti lɔ yɛ be ko to nnɛn kpanngɔ mun be blɛ Salomɔn-ɔn. Nnɛn kpanngɔ nga famiɛn’n i aata difuɛ’m be to’n,* i gua’n kaciman.+
29 Kakaklolo nga be ko to be Ezipti lɔ’n, kun ti sika mma ya nsiɛn (600), yɛ nnɛn kpanngɔ kun ti sika mma ya kun ablenun (150). Famiɛn’n i aata difuɛ’m be ko yo be atɛ Ɛti+ famiɛn’m be kwlaa, nin Siri famiɛn’m be sa nun.
Ja ngua lɔ ndɛ mun
^ Annzɛ “ɲanndra.”
^ Ebr., “ndɛ kun m’ɔ ti fiawa.”
^ Ebr., “w’a kwlá loman wunmiɛn kun.”
^ Annzɛ “ɔ ndɛ mun.”
^ Atrɛkpa’n, yɛle waka nga be flɛ i santali’n.
^ Annzɛ “famiɛn sua’n.”
^ Ebr., “kɛ nga famiɛn Salomɔn i sa fa ti’n sa’n.”
^ Ɲanmiɛn Ndɛ’n i bue nga be klɛli i Ebre nun’n i nun’n, minin nga be kɛn i ndɛ’n ti gramun 570. Nian Nd. B14 nun.
^ Ebr., “be kunndɛ kɛ bé wún Salomɔn i ɲrun’n.”
^ Annzɛ “nnɛn kpanngɔ su fufuɛ.”
^ Annzɛ “nnɛn kpanngɔ su fufuɛ.”
^ Be kwla se ekun kɛ “be fin Ezipti nin Kue. Famiɛn’n i aata difuɛ’m be ko to be Kue lɔ.” Atrɛkpa’n, Silisi yɛ be flɛ i kɛ Kue’n niɔn.
