1 Be Ɲoliɛ 16:1-43
16 Kɛ be fali Ɲanmiɛn Kpli i Alaka’n be bali’n, be ko sieli i tannin sua nga Davidi kplannin naan be fa sie nun’n i nun.+ Kpɛkun be yili tɛ nga kɛ bé yí’n be yra nnɛn’n i kɔlikɔli’n, nin bo kun yolɛ tɛ mun Ɲanmiɛn Kpli i ɲrun lɛ.+
2 Kɛ Davidi yili tɛ nga kɛ bé yí’n be yra nnɛn’n i kɔlikɔli’n+ nin bo kun yolɛ tɛ mun’n,+ ɔ boli muae mannin sran mun Zoova i dunman nun.
3 Asa ekun’n, ɔ fali kpanwun kukluuklu mun, nin nglesia mma kee gato kun, nin viɲin mma kee gato kun fa cɛcɛli Izraɛlifuɛ’m be kwlaa. I yasua-o, i bla-o, be ɲannin kunngunngun.
4 Yɛ ɔ kpali Levifuɛ wie mun naan be di junman Zoova i Alaka’n i ɲrun lɛ,+ naan be yi Zoova m’ɔ ti Izraɛli i Ɲanmiɛn’n i ayɛ,* be lɛ i ase, yɛ be mɛnmɛn i.
5 Azafu+ ti be su kpɛn, sran ng’ɔ mɛntɛn i’n yɛle Zakari. Yɛ Zeiɛli, nin Semiramɔtu, nin Zeyiɛli, nin Matitia, nin Eliabu, nin Benaya, nin Obɛdi-Edɔmun, ɔ nin Zeiɛli+ be bo miziki bolɛ ninnge nga be le ɲanman’n mun nin jru mun.+ Kpɛkun Azafu bo sɛnbali’n.+
6 Benaya nin Zaaziɛli mɔ be ti Ɲanmiɛn ɲrun jranfuɛ’n, be fita awɛ’n nun Ɲanmiɛn Kpli i aenguɛ’n i alaka’n i ɲrun lɛ tititi.
7 Cɛn sɔ’n nun’n, Davidi kpɛli jue kun. Kpɛ klikli ng’ɔ́ kpɛ́ jue fá mán Azafu+ nin i niaan mun naan be to fa la Zoova i ase’n yɛ ɔ o lɛ-ɔ. Jue sɔ’n yɛ:
8 “Amun la Zoova i ase,+ amun bo i dunman’n.Amun kan sa ng’ɔ yoli be’n be ndɛ kle sran mun!+
9 Amun to jue be bo flɛ i, amun to jue* be mɛnmɛn i,+amun bu sa dandanng’ɔ yoli be’n be su akunndan.*+
10 Amun fɛ i dunman m’ɔ ti sanwun’n be di be nuan.+
Maan be nga be kunndɛ Zoova’n be klun jɔ.+
11 Amun kunndɛ Zoova,+ amun kunndɛ i tinmin’n.
Maan amun ɲin tɛ i ɲrun titi.+
12 Nán amun wla fi sa dandan ng’ɔ yoli be’n be su.+Nán amun wla fi abonuan sa nin jɔlɛ ng’ɔ dili be’n be su.
13 Amun mɔ amun ti i sufuɛ Izraɛli i osu’n nunfuɛ’n,+amun mɔ amun ti Zakɔbu i mma mun’n, m’ɔ kpali amun’n.+
14 I yɛ ɔ ti e Ɲanmiɛn Zoova’n niɔn.+
Ɔ di asiɛ’n sufuɛ’m be kwlaa be jɔlɛ.+
15 Maan amun wla kpɛn i aenguɛ’n su tititi.Maan amun wla kpɛn nda ng’ɔ tali’n* su lele fa ju amun osu’n nunfuɛ’m be akpasua akpi (1.000)su’n su.+
16 Maan amun wla kpɛn aenguɛ ng’ɔ nin Abraamun be trali’n,+ɔ nin nda ng’ɔ taliIzaaki’n su,+
17 ɔ fa yoli mmla kpɛkun ɔ fa mannin Zakɔbu.+Yɛ ɔ ti aenguɛ kun m’ɔ o i bɔbɔ nin Izraɛli be afiɛn tititi-ɔ.
18 Ɔ seli kɛ: ‘Ń fá Kanaan mɛn’n ń mán wɔ,+ɔ́ yó wɔ aja like.’+
19 Kɛ ɔ́ yó sɔ’n, nn amun ti kaan sa,nanwlɛ, amun juman lika fi, yɛ amun kacili aofuɛ mɛn’n nun.+
20 Be fɛ i nvle kun nun be nanti kɔ nvle uflɛ nun,be fɛ i famiɛn diwlɛ kun nun be nanti kɔ nvleuflɛ nun.+
21 W’a kplinman sran fi su kɛ ɔ kle be yalɛ,+sanngɛ be dunman nun ti’n, ɔ ijɔli famiɛn mun.+
22 Ɔ seli kɛ: ‘Nán amun sa kan min sran mɔ n kpali be’n,nán amun yo min nuan ijɔfuɛ’m be tɛ.’+
23 Asiɛ’n sufuɛ mun, amun kwlaa amun to jue be manman Zoova!
Amun kan delɛ m’ɔ de sran’n i ndɛ cɛn kwlakwla!+
24 Amun kɛn i aɲrunɲan’n i ndɛ nvlenvle’m be nun.Amun kɛn i abonuan sa’m be ndɛ kle sran kwlakwla.
25 Afin Zoova ti dan, ɔ nin manmanlɛ’n fata lelele.
Ɔ yo sro tra ɲanmiɛnonga’m be kwlaa.+
26 Nvlenvle’m be ɲanmiɛn’m be kwlaa be timan like fi,+sanngɛ Zoova liɛ’n, i yɛ ɔ yili ɲanmiɛn m’ɔ la nglo lɔ plaii’n niɔn.+
27 Kan ɔ o lɛ’n, aɲrunɲan o lɛ, yɛ lɛ’n ti klanman kpa.+Wunmiɛn nin aklunjɔɛ be o kan ɔ tran lɛ’n.+
28 Asiɛ’n su awlobo mun, amun fa like ng’ɔ ti Zoova liɛ’n be mɛn i,amun fa like ng’ɔ ti Zoova liɛ’n be mɛn i, afin ɔ le ɲrun yɛ ɔ le tinmin.+
29 Amun manman Zoova kɛ ɔ nin i fata’n sa, i dunman dan’n ti.+Amun fa like be cɛ i, yɛ amun blɛ i ɲrun.+
Amun koto Zoova bo,* ɔ nin amun wun Ɲanmiɛn sulɛ tralɛ mun.*+
30 Asiɛ’n sufuɛ’m be kwlaa, amun usu i ɲrun.
Asiɛ’n* i bo’n wlali ase kpa, be kwlá kejemɛn i.*+
31 Maan ɲanmiɛn su lɔfuɛ’m be di aklunjɔɛ, yɛ maan asiɛ’n sufuɛ’m be klun jɔ.+Amun bo i jɔ nvlenvle’m be nun kɛ: ‘Zoova w’a kaci Famiɛn!’+
32 Maan jenvie’n nin i nun ninnge’n kwlaa be tɛ kekle kpa.Maan blo lɔ’n nin ninnge kwlaa nga be o lɔ’n be klun jɔ.
33 Yɛ maan bo’n nun waka’m be kpan aklunjɔɛ kpanlɛ Zoova ɲrun,afin ɔ su ba* asiɛ’n i jɔlɛ dilɛ.
34 Amun la Zoova i ase, afin ɔ ti kpa.+I sran klolɛ dan’nwieman le.+
35 Amun se kɛ: ‘Ɲanmiɛn wɔ mɔ a ti e defuɛ’n, de e.+Kan e bo nun, kpɛkun de e nvle’m be sa nun,
I liɛ’n, é kwlá mánmán ɔ dunman m’ɔ ti sanwun’n.+
Yɛ é mánmán wɔaklunjɔɛ su.+
36 Maan be manman Zoova m’ɔ ti Izraɛli Ɲanmiɛn’n,maan be mɛnmɛn i tititi.’”
Kɛ ɔ yoli sɔ’n, sran’m be kwlaa be seli kɛ: “Maan ɔ yo sɔ!” Kpɛkun be manmannin Zoova.
37 Kpɛkun Davidi yacili Azafu+ nin i niaan mun Zoova i aenguɛ’n i alaka’n i ɲrun lɛ, naan be di junman Alaka’n i ɲrun lɛ tititi,+ kɛ nga be fa siesieli i kɛ be yo i cɛn kwlakwla’n sa.+
38 Obɛdi-Edɔmun nin i niaan’m be ti sran ablesiɛn-nin-mɔcuɛ (68). Be nin Zeditɛn i wa Obɛdi-Edɔmun nin Osa be ti anuan sunianfuɛ.
39 Yɛ ɔ sieli Zadɔku+ m’ɔ ti Ɲanmiɛn ɲrun jranfuɛ’n, nin i wiengu Ɲanmiɛn ɲrun jranfuɛ mun Zoova i tannin sua’n i ɲrun lɛ, lika nglonglo ng’ɔ o Gabaɔn+ lɔ’n su lɔ
40 naan nglɛmun nin nnɔsua kwlaa’n, be yi tɛ nga kɛ bé yí’n be yra nnɛn’n i kɔlikɔli’n tɛ yiwlɛ’n su be man Zoova. Asa ekun’n, ɔ fata kɛ be yo like kwlaa ng’ɔ o Zoova i Mmla fluwa m’ɔ fa mannin Izraɛlifuɛ mun’n nun’n.+
41 Be nga be o be nun wie’n be yɛle Eman, nin Zeditɛn,+ ɔ nin be nga be kpali be’n mɔ be boli be dunman’n naan be la Zoova i ase’n,+ afin “i sran klolɛ dan’n wieman le.”+
42 Eman+ nin Zeditɛn yɛ ɔ fata kɛ be bo awɛ, nin sɛnbali, nin miziki bolɛ ninnge nga be fa manman Ɲanmiɛn Kpli’n niɔn. Zeditɛn+ i mma mun yɛ be nian anuan’n su-ɔ.
43 I sin’n, sran’m be kwlaa be ɔli be awlo’m be nun. Davidi kusu ɔli awlo naan ɔ́ kó bó muae mɛ́n i awlofuɛ mun.
Ja ngua lɔ ndɛ mun
^ Ebr., “be wla kpɛn i su.”
^ Annzɛ “amun bo miziki.”
^ Be kwla se ekun kɛ “amun kan be ndɛ.”
^ Ebr., “ndɛ ng’ɔ kannin’n.”
^ Annzɛ “amun su i.”
^ Be kwla se ekun kɛ “afin i sanwun m’ɔ ti’n, ɔ yo ɲɛnmɛn.”
^ Annzɛ “Asiɛ m’ɔ yo like ye’n.”
^ Annzɛ “be kwlá sumɛn i bo”, “be kwlá totomɛn i.”
^ Annzɛ “w’a ba.”
