1 Be Ɲoliɛ 11:1-47
11 Kɛ ɔ yoli sɔ’n, Izraɛlifuɛ’m be kwlaa be ko toli Davidi Ebrɔn+ lɔ, yɛ be seli i kɛ: “Nian! E nin wɔ e ti kun, e kpaciman.*+
2 I nun mɔ Saili ti famiɛn’n, wɔ yɛ a dun mmua Izraɛlifuɛ’m be ɲrun alɛ kunlɛ’n nun-ɔn.*+ Asa ekun’n, Zoova m’ɔ ti ɔ Ɲanmiɛn’n seli ɔ kɛ: ‘Á wá nían Izraɛlifuɛ mɔ be ti min nvle nunfuɛ’n be lika, yɛ á yó be su kpɛn.’”+
3 Ɔ maan Izraɛli kpɛnngbɛn’m be kwlaa be toli famiɛn’n Ebrɔn lɛ. Kpɛkun Davidi nin be trali aenguɛ Zoova ɲrun, Ebrɔn lɛ. Kɛ ɔ yoli sɔ’n, be sieli Davidi i famiɛn Izraɛli nvle’n su,+ kɛ nga Zoova kan kleli Samiɛli’n sa.+
4 I sin’n, Davidi nin Izraɛlifuɛ’m be kwlaa be fali atin’n be ɔli Zerizalɛmun, yɛle kɛ Zebisi+ lɔ. Lɔ yɛ Zebisifuɛ’m+ be tran-ɔn.
5 Sanngɛ Zebisi lɔfuɛ’m be yoli Davidi i finfin. Be seli kɛ: “A su kwlá wluman wa le!”+ Sanngɛ Davidi fali be fiawlɛ lika ng’ɔ o Siɔn’n.+ Lika sɔ’n yɛ andɛ’n be flɛ i kɛ Davidi Klɔ’n+ niɔn.
6 Davidi seli kɛ: “Sran ng’ɔ dun mmua fa alɛ wla Zebisifuɛ’m be sin’n, ɔ́ káci sonja’m be su kpɛn.” Yɛ Zeruya i wa Zoabu+ dun mmua fali alɛ wlali be sin-ɔn. Kpɛkun ɔ kacili sonja’m be su kpɛn.
7 Kɛ ɔ yoli sɔ’n, Davidi ko trannin fiawlɛ lika sɔ’n nun. I sɔ’n ti’n, be wa flɛli lika sɔ’n kɛ Davidi Klɔ.
8 Ɔ kplannin talɛ nin sua wie mun lele bo sin yiali nun. Ɔ fɛli i Milo Cenjeʼn* su lɛ lele ɔ juli lika nga be mɛntɛn i lɛ’n. Kpɛkun Zoabu siesieli klɔ’n i onga’n i ye.
9 Kɛ aliɛ cɛ́n m’ɔ́ sán’n, nn Davidi i kwlalɛ’n yó dan trá laa’n.+ Yɛ Zoova m’ɔ ti sonja’m be su kpɛn’n jin i sin.
10 Davidi i sonja’m be su kpɛn mun yɛ. Be ti safuɲrɛn yɛ be nin Izraɛlifuɛ’m be kwlaa be suɛnnin i famiɛn dilɛ’n i bo naan ɔ taka kpa, kpɛkun be sieli i famiɛn.+ Ɔ maan Izraɛli nvle’n i su ndɛ nga Zoova kannin’n, ɔ kpɛnnin su.
11 Davidi i safuɲrɛn mun yɛ: Be flɛ kun kɛ Zasobeamun.+ Akɛmɔnfuɛ kun i wa-ɔ. Ɔ ti be nsan’n be su kpɛn.+ Cɛn kun’n, ɔ fɛli i cua’n kunnin sran ya nsan (300).+
12 Be flɛ kun ekun kɛ Eleazaa.+ Dodo m’ɔ ti Aoifuɛ’n+ i wa-ɔ. Ɔ o Davidi i safuɲrɛn nsan’m be nun wie.
13 Ɔ nin Davidi be o Pasi-Damimun+ lɔ wie, kan Filistifuɛ’m be ko yiali lɛ naan bé kún alɛ’n. Ɔɔzu fie kun o lɛ. Sanngɛ sran’m be wanndili Filistifuɛ’m be bo.
14 Sanngɛ i liɛ’n, ɔ ko jrannin fie sɔ’n i afiɛn lɔ naan b’a faman. Ɔ nin Filistifuɛ’m be kunnin lele be nun kpanngban kpa be wuli. Ɔ maan Zoova kwlali dan kpa.+
15 Kpɛnngbɛn ablasan (30) mun be nun nsan be ɔli Davidi sin yɔbuɛ buɛ ng’ɔ o Adulamun+ lɔ’n nun. Kɛ ɔ́ yó sɔ’n, nn Filistifuɛ’m be sonja akpasua kun o Refafuɛ’m be Kongo’n+ nun lɛ.
16 Davidi kusu o i fiawlɛ’n nun lɔ, yɛ Filistifuɛ’m be sonja akpasua kun ekun o Bɛtleɛmun.
17 Kpɛkun Davidi i akunndan’n ɔli Bɛtleɛmun lɔ nzue’n su naan w’a se kɛ: “Nanwlɛ, sɛ ɔ ti kɛ n kwla ɲan gbo ng’ɔ o Bɛtleɛmun+ klɔ’n i anuan’n i wun lɛ’n, i nun nzue kan n nɔn’n, ɔ́ yó min fɛ-o!”
18 Kɛ ɔ kɛnnin i sɔ’n, be nsan’n be fali be wue kekle be wluli Filistifuɛ’m be nanmue’n nun lɔ. Be ko sali gbo ng’ɔ o Bɛtleɛmun klɔ’n i anuan’n i wun lɛ’n, i nun nzue’n wie blɛli Davidi. Sanngɛ i waan ɔ nɔnman, ɔ guɛli i ase mannin Zoova.
19 Ɔ seli kɛ: “N kwlá nɔnman nzue sɔ’n mlɔnmlɔn min Ɲanmiɛn’n i ɲrun. ?Ń nɔ́n be nga be fali be nguan’n sieli i wie nuan’n be mmoja’n?+ Afin be fali be nguan’n sieli i wie nuan yɛ be ko sali nzue sɔ’n niɔn.” Ɔ maan w’a nɔnman. Like nga Davidi i safuɲrɛn nsan’m be yoli’n yɛ ɔ o lɛ-ɔ.
20 Zoabu+ i niaan bian Abisai+ ti sonja akpasua kun ekun su kpɛn. Be akpasua liɛ’n nun’n, be ti sran nsan wie. Cɛn kun’n, ɔ fɛli i cua’n kunnin sran ya nsan (300). I dunman’n fuli kɛ safuɲrɛn nsan’m be liɛ’n sa.+
21 Be nsan’m be nun’n, i yɛ ɔ ɲannin sasu dan-ɔn. Yɛ ɔ yoli be su kpɛn, sanngɛ w’a ɲanman sasu kɛ safuɲrɛn nsan klikli mun sa.
22 Zoyada i wa Benaya+ ti yakpafuɛ kpa.* Ɔ yoli sa kekleekle wie mun Kabizeɛli+ lɔ. Ɔ kunnin Ariɛli m’ɔ ti Moabufuɛ’n i wa yasua nɲɔn mun. Cɛn kun mɔ laglasi ng’ɔ fin nglo lɔ gua munkɛnmunkɛn’n ɔ́ gúa kpa liɛ su’n, ɔ jrali kunman kun nun naan w’a kun asɔmɔli kun.+
23 Asa ekun’n, ɔ kunnin Ezipti bian kun m’ɔ ti kpandangblanwun kpa’n. I tɛnndɛn’n ti kude nnun.*+ Kɛ ɔ́ kɔ́ Eziptifuɛ sɔ’n su’n, waka yɛ ɔ o i sa nun-ɔn. Yɛ cua ng’ɔ o Eziptifuɛ’n i sa nun’n i waka’n i dan’n ti kɛ tannin wufuɛ’m be kondo’n sa.+ Sanngɛ ɔ ko deli Eziptifuɛ’n i bɔbɔ i cua’n+ fa kunnin i.
24 Like nga Zoyada i wa Benaya yoli’n yɛ ɔ o lɛ-ɔ. I dunman’n fuli kɛ safuɲrɛn nsan’m be liɛ’n sa.
25 Kannzɛ bɔbɔ ɔ ɲannin ɲrun trali kpɛnngbɛn ablasan (30) mun’n, sanngɛ w’a ɲanman sasu kɛ safuɲrɛn nsan’m be sa.+ Sanngɛ Davidi fɛ i sieli i i gladi difuɛ’m be su kpɛn.
26 Safuɲrɛn mun yɛ: Zoabu i niaan bian Azaɛli,+ Dodo m’ɔ fin Bɛtleɛmun’n+ i wa Ɛlanan,
27 Sama m’ɔ fin Arɔɔ’n, nin Elɛzi m’ɔ ti Pelɔnfuɛ’n,
28 Ikɛsi m’ɔ fin Tekoa’n i wa Ira,+ Abiezɛɛ+ m’ɔ fin Anatɔtu’n,
29 Sibekai+ m’ɔ ti Isa i osu’n nunfuɛ’n, Ilai m’ɔ fin Aoi i osu’n nun’n,
30 Maarai+ m’ɔ fin Netofa’n, Baana m’ɔ fin Netofa’n i wa Elɛdu,+
31 Ribai m’ɔ fin Bɛnzamɛnfuɛ’m+ be klɔ nga be flɛ i kɛ Gibea’n i wa Itai, Benaya m’ɔ fin Piratɔn’n,
32 Irai m’ɔ fin Gaasi+ lɔ kan nzue ba’m be o lɔ’n, Abiɛli m’ɔ fin Bɛti-Araba’n,
33 Azmavɛti m’ɔ fin Baurimun’n, Eliaba m’ɔ fin Saalibɔn’n,
34 Asɛmun m’ɔ fin Gizɔn’n i mma mun, Sage m’ɔ fin Arari’n i wa Zonatan,
35 Sakaa m’ɔ fin Arari’n i wa Aiamun, Iri i wa Elifali,
36 Efɛɛ m’ɔ fin Mekera’n, Aia m’ɔ ti Pelɔnfuɛ’n,
37 Ɛzro m’ɔ fin Kaamɛli’n, Ezbai i wa Naarai,
38 Zoɛli i niaan bian Natan, Agri i wa Mibaa,
39 Zelɛki m’ɔ ti Amɔnfuɛ’n, Naarai m’ɔ fin Beerɔti’n, m’ɔ tra Zeruya i wa Zoabu i alɛ ninnge’n be nun’n,
40 Ira m’ɔ ti Itirifuɛ’n, Garɛbu m’ɔ ti Itirifuɛ’n,
41 Iri+ m’ɔ ti Ɛtifuɛ’n, Alai i wa Zabadi,
42 Siza m’ɔ ti Ribɛninfuɛ’n i wa Adina. Ɔ ti Ribɛnin akpasua’n nunfuɛ’m be su kpɛn’n kun, ɔ nin sran ablasan (30) nga be o i sin’n,
43 Maaka i wa Anan, Zosafati m’ɔ ti Mitininfuɛ’n,
44 Ozia m’ɔ fin Astarɔti’n, Ɔtamun m’ɔ fin Aroɛɛ i wa Sama nin Zeiɛli,
45 Simiri i wa Zediaɛli, nin i niaan bian Zoa m’ɔ fin Tizi’n,
46 Eliɛli m’ɔ fin Maavi’n, Elnaamun i wa Zeribai nin Zosavia, Itma m’ɔ ti Moabufuɛ’n,
47 Eliɛli, Obɛdi, Zaasiɛli m’ɔ ti Mezobafuɛ’n.
