Matie 4:1-25

  • Suɛn tɔnfuɛ’n sali Zezi niannin (1-11)

  • Zezi boli jasin bolɛ’n i bo Galile lɔ (12-17)

  • Ɔ flɛli i sɔnnzɔnfuɛ klikli mun (18-22)

  • Zezi boli jasin, ɔ kleli sran’m be like, ɔ yoli sran’m be juejue (23-25)

4  I sin’n, Ɲanmiɛn wawɛ’n fali Zezi ɔli aawlɛ flɛnnɛn’n nun lɔ naan Suɛn tɔnfuɛ’n ko sɛ i nian.  W’a diman like lele cɛn ba ablanan (40) kɔnguɛ nin wia nun. I sin’n, awe kunnin i.  Yɛ Lakafuɛ’n bɛli i wun lɛ, kpɛkun ɔ seli i kɛ: “Sɛ a ti Ɲanmiɛn wa’n, se yɔbuɛ nga’m be kɛ be kaci kpanwun.”  Sanngɛ ɔ tɛli su kɛ: “Be klɛli i kɛ: ‘Nán kpanwun ngunmin yɛ ɔ kwla yo maan sran tran nguan nun-ɔn, sanngɛ ndɛ kwlaa ng’ɔ fin Zoova nuan fite’n niɔn.’”  Suɛn tɔnfuɛ’n fɛ i ɔli klɔ m’ɔ ti Ɲanmiɛn liɛ klonglo’n su lɔ. Kpɛkun ɔ fɛ i sieli Ɲanmiɛn i sua’n i ti su lɔ,*  yɛ ɔ seli i kɛ: “Sɛ a ti Ɲanmiɛn wa’n, yaci ɔ wun nun naan tɔ asiɛ wun lɔ, afin be klɛli i kɛ: ‘Ɔ́ súnmɛn i anzi mun ɔ sin,’ yɛ ‘Bé fá ɔ be sa su. Ɔ maan ɔ ja su kplaman yɔbuɛ.’”  Zezi seli i kɛ: “Be klɛli i ekun kɛ: ‘Nán sa Zoova m’ɔ ti ɔ Ɲanmiɛn’n nian.’”  I sin’n, Suɛn tɔnfuɛ’n fɛ i ɔli anannganman su oka fleiin kpa kun su, yɛ ɔ fali mɛn wunmuan’n nun famiɛn diwlɛ’m be kwlaa ɔ nin be aɲrunɲan’n kleli i.  Kpɛkun ɔ seli i kɛ: “Sɛ a koto min bo naan a yo like kunngba cɛ fa su min’n, ń fá ninnge kwlaa nga mun ń mán wɔ.” 10  Yɛ Zezi seli i kɛ: “Satan, jaso lɛ! Afin be klɛli i kɛ: ‘Zoova m’ɔ ti ɔ Ɲanmiɛn’n yɛ ɔ fata kɛ a koto i bo-ɔ, yɛ i kunngba cɛ yɛ ɔ fata kɛ a su i-ɔ.’” 11  Yɛ Suɛn tɔnfuɛ’n yacili i nun-ɔn. Kpɛkun anzi’m be bali be wa niɛnnin i lika. 12  Kɛ ɔ tili i kɛ be trali Zan’n, ɔ cuɛnnin i wun ɔli Galile. 13  Kpɛkun kɛ ɔ jasoli Nazarɛti’n, ɔ bali wa trannin Kapɛɛnaɔmun, jenvie’n* i nuan lɛ, Zabilɔn mɛn’n nin Nɛftali mɛn’n nun. 14  Ɔ yoli sɔ naan ndɛ nga Ɲanmiɛn nuan ijɔfuɛ Ezai kannin’n, ɔ kpɛn su. Ɔ seli kɛ: 15  “Zabilɔn mɛn’n nin Nɛftali mɛn’n mɔ be o akpɔ nga be fa kɔ jenvie’n* su lɔ’n i nuan’n, Zurdɛn i bue kun lɔ’n, Galile mɔ be nga be timan Zuifu’n be sɔnnin lɔ’n! 16  Be nga be tran aosin’n nun’n, be wunnin kɛ lika’n kpajali dan kpa. Yɛ be nga be tran mɛn kun mɔ wie’n i kondro’n kata su’n i nun’n be liɛ’n, kannin kpajali be su.” 17  Kɛ ɔ fin lɛ’n, Zezi boli jasin bolɛ bo. Ɔ se kɛ: “An kaci amun akunndan’n, afin ɲanmiɛn su lɔ Famiɛn dilɛ’n w’a mantan koko.” 18  Kɛ ɔ́ nánti Galile Jenvie’n i nuan lɛ’n, ɔ wunnin sran nɲɔn mɔ be ti niaan’n. Be yɛle Simɔn mɔ be flɛ i Piɛli’n, ɔ nin i niaan bian Andre. Be su gua lala jenvie’n nun, afin be ti jue trafuɛ. 19  Yɛ ɔ seli be kɛ: “An su min su, yɛ ń yó maan amún trá sran mun kɛ be fa tra jue’n sa.” 20  Be ja nun lɛ’n, be yacili be lala’m be lɛ naan b’a su i su. 21  Kɛ ɔ tuli i bo lɛ ɔli i ɲrun’n, ɔ wunnin sran nɲɔn ekun mɔ be ti niaan’n. Be yɛle Zebede i mma mun, Zaki nin i niaan bian Zan. Be nin be si Zebede be o alie’n nun, be su tanndan be lala’m be nun, yɛ ɔ flɛli be-ɔ. 22  Be ja nun lɛ’n, be yacili alie’n ɔ nin be si lɛ, kpɛkun be suli i su. 23  I sin’n, ɔ wlan sinnin Galile mɛn wunmuan’n nun, ɔ kleli like be Ɲanmiɛn sulɛ sua’m be nun, ɔ boli Ɲanmiɛn i Famiɛn dilɛ’n i jasin fɛ’n, kpɛkun ɔ yoli maan sran’m be tukpacɛ wafawafa kwlaa, ɔ nin lɛ wafawafa kwlaa ng’ɔ o be wun’n be wieli. 24  I ndɛ nga be kan’n, ɔ truli Siri mɛn wunmuan’n nun. Yɛ be fali be kwlaa nga tukpacɛ nin be wunnɛn nun yaya fanunfanun ti be o ɲrɛnnɛn nun’n, ɔ nin be nga mmusu’m be kle be yalɛ’n, ɔ nin ngbitiɛfuɛ mun, ɔ nin bubuwafuɛ mun be blɛli i, kpɛkun ɔ yoli be juejue. 25  I sɔ’n ti’n, sran kpanngban kpa be fin Galile nin Dekapɔlu* nin Zerizalɛmun nin Zide ɔ nin Zurdɛn’n i sin lɔ lika’m be nun, be suli i su.

Ja ngua lɛ nzɔliɛ mun

Be kwla se ekun kɛ “i ti su nglo lɔ talɛ tɛɛn’n su.”
Galile Jenvie’n niɔn.
Ɔ́ yó Mediterane Jenvie’n. Sanngɛ sran wie’m be waan Galile Jenvie’n niɔn.
Be kwla se ekun kɛ “klɔ dandan blu mun.”