Matie 3:1-17

  • Zan Batɛmun yofuɛ’n boli jasin (1-12)

  • Zezi i batɛmun yolɛ (13-17)

3  Kɛ ɔ́ kɔ́ i ɲrun’n, Zan Batɛmun yofuɛ’n bali. Ɔ boli jasin Zide mɛn’n i aawlɛ flɛnnɛn’n nun.  Ɔ se kɛ: “An kaci amun akunndan’n, afin ɲanmiɛn su lɔ Famiɛn dilɛ’n w’a mantan koko.”  Ɲanmiɛn nuan ijɔfuɛ Ezai kannin Zan sɔ’n i ndɛ seli kɛ: “Sran kun kpan aawlɛ flɛnnɛn’n nun lɔ. Ɔ se kɛ: ‘Amun siesie atin’n be man Zoova! Amun yo akpɔ’m be seiin be mɛn i.’”  Zan wla ɲɔnngɔnmɛn ndrɛ tralɛ, kpɛkun kplo kun ci i bo. I aliɛ yɛle lalo nin blo awɛma nzue.  Zerizalɛmun lɔfuɛ mun nin be kwlaa nga be o Zide mɛn wunmuan’n nun’n, ɔ nin lika nga be mantanmantan Zurdɛn’n be kwlaa be su sran’m be kɔ i wun lɔ.  Kpɛkun ɔ yo be batɛmun* Zurdɛn nzue ba’n nun. Kɛ ɔ́ yó sɔ’n, nn bé dí be sa tɛ’m be nanwlɛ weiin sran’m be ɲrun.  Kɛ ɔ wunnin Farizifuɛ nin Sadisefuɛ kpanngban mɔ be su ba lika ng’ɔ yo sran’m be batɛmun lɛ’n, ɔ seli be kɛ: “?Ɔnda mma mun, wan yɛ ɔ seli amun kɛ amun kwla wanndi Ɲanmiɛn i ya m’ɔ su ba’n i ɲrun-ɔn?  Ɔ maan an yo sa* ng’ɔ kle kɛ amun a kaci amun akunndan’n.  Nán an se amun wun kɛ: ‘E si yɛle Abraamun.’ Afin ń kán klé amun kɛ Ɲanmiɛn kwla fa yɔbuɛ nga mun kaci ba man Abraamun. 10  Kɛ é sé yɛ’n, kpɛliɛ’n la waka’m be bo wun lɛ. Ɔ maan waka kwlaa ng’ɔ suman mma kpa’n, ɔ fata kɛ be kpɛ i bo, kpɛkun be to yi i sin nun. 11  Min liɛ’n, nzue yɛ n fa yo amun batɛmun-ɔn, afin amun a kaci amun akunndan’n. Sanngɛ sran kun o siɛn, ɔ su ba. Ɔ le kwlalɛ tra min, min nin i ngbabua’n i yilɛ fataman bɔbɔ. Sran sɔ’n fá Ɲanmiɛn wawɛ’n nin sin yɛ ɔ́ fá yó amun batɛmun-ɔn.* 12  I peli m’ɔ fa kpaja like’n, ɔ o i sa nun. Ɔ́ wá yó i ble bowlɛ’n i weinwein kpa, kpɛkun ɔ́ ísaísa i ble’n gúa i tanngannin’n nun. Sanngɛ ble’n i wla’n i liɛ’n, ɔ́ fá sin mɔ be kwlá nuɛnmɛn i’n, ɔ́ fá wɔ́ nun.” 13  Zezi fin Galile mɛn’n nun bali Zan wun lɛ, Zurdɛn’n i nuan lɛ naan ɔ yo i batɛmun. 14  Sanngɛ Zan waan ɔ kplinman su. Ɔ seli i kɛ: “?Nán min li yɛ ɔ fata kɛ a yo min batɛmun-ɔn, kpɛkun wɔ yɛ a su ba min sin-ɔn?” 15  Zezi tɛli i su kɛ: “Ɔ li yo, afin i sɔ yɛ ɔ nin i fata kɛ e yo naan y’a yo like kwlaa ng’ɔ ti i nuan su’n niɔn.” Ɔ maan ɔ kplinnin su. 16  Kɛ ɔ yoli Zezi i batɛmun’n, Zezi ka lɛ fin nzue’n nun fiteli. Kpɛkun ɲanmiɛn su lɔ tikeli. Ɔ wunnin Ɲanmiɛn i wawɛ’n, ɔ jra kɛ auble wie sa, ɔ bɛ i su. 17  Kpɛkun nɛn kun tɛli ɲanmiɛn su lɔ seli kɛ: “Min Wa’n yɛ, min awlɛn su ba mɔ min klun jɔ i wun’n niɔn.”

Ja ngua lɛ nzɔliɛ mun

Be kwla se ekun kɛ “ɔ mlɔn be nzue’n nun.”
Glɛki nun’n, be se kɛ “an su mma.”
Yɛle kɛ, ɔ́ fá Ɲanmiɛn wawɛ’n kpá amun naan amun di junman ngunmin kun, kpɛkun ɔ́ fá sin núnnún amun.