Matie 28:1-20

  • Zezi cɛnnin nguan (1-10)

  • Be mannin sonja’m be sika naan be bua ato (11-15)

  • Zezi sunmannin be kɛ be yo naan sran’m be kaci i sɔnnzɔnfuɛ (16-20)

28  Kɛ Wunmiɛn-lolɛ-cɛn’n sinnin’n, i aliɛ m’ɔ́ cɛ́n, m’ɔ ti lemɔcuɛ’n i cɛn klikli’n, Mari m’ɔ fin Magdala’n, ɔ nin Mari kunfuɛ’n, be bali ndia’n i nianlɛ. Kɛ ɔ́ yó sɔ’n, nn lika’n su titi.  Zoova i anzi’n fin ɲanmiɛn su lɔ jrali. I sɔ’n ti’n, asiɛ’n kejeli dan kpa. Anzi’n kondoli ndia’n i nuan su yɔbuɛ’n, kpɛkun ɔ trannin su.  Ɔ kpaja kɛ ɲanmiɛn m’ɔ kpa sin’n sa. I tralɛ’n fɛn fuai kpa.  I sɔ’n ti’n, srɛ kunnin be nga be nian ndia’n su’n. Ɔ maan be wun usuli be, naan b’a kaci kɛ sran mɔ b’a wu’n sa.  Anzi’n seli bla’m be kɛ: “Nán srɛ kun amun. N si kɛ amun su kunndɛ Zezi mɔ be kunnin i waka’n su’n.  Ɔ nunman wa. Afin be cɛnnin i kɛ ng’ɔ fa kannin’n sa. An bla be wa nian lika nga be lɛli i saka’n,  naan amun wɔ ndɛndɛ, amun ko se i sɔnnzɔnfuɛ’m be kɛ be cɛnnin i. Ɔ su dun mmua amun ɲrun Galile klɔ’n su lɔ. Lɔ yɛ amún wún i-ɔ. Ndɛ ng’ɔ fata kɛ n kan kle amun’n, yɛ ɔ o lɛ-ɔ.”  Yɛ be jasoli ndia’n su lɛ ndɛndɛ be ɔli-ɔ. Be wanndi ɔli kɛ bé kó kán ndɛ sɔ’m bé klé i sɔnnzɔnfuɛ mun. Srɛ kunnin be, kusu be klun jɔli dan.  Kɛ bé kɔ́’n, Zezi fiteli be ɲrun, kpɛkun ɔ seli be kɛ: “Amun aɲin-o!” Be wunngeli i wun lɔ naan b’a koto i bo b’a trɛ i ja’n. 10  Yɛ Zezi seli be kɛ: “Nán srɛ kun amun! Amun wɔ naan amun ko kan kle min niaan mun naan be wɔ Galile. Lɔ yɛ bé wún min-ɔn.” 11  Kɛ bé kɔ́’n, sonja nga be nian ndia’n su’n, be nun wie’m be wluli klɔ’n nun. Be ko kannin sa kwlaa ng’ɔ juli’n i ndɛ kleli Ɲanmiɛn ɲrun jranfuɛ’m be su kpɛn mun. 12  Be kusu be nin kpɛnngbɛn mun be yiali, be kokoli be wun naan b’a man sonja’m be sika kpanngban kpa. 13  Kpɛkun be seli be kɛ: “Amun se kɛ: ‘Kɛ é láfi kɔnguɛ’n, i sɔnnzɔnfuɛ’m be bali, be wa wuɛli i fuɛn’n.’ 14  Yɛ sɛ Pilati ti ndɛ sɔ’n, é yíyí nun é klé i. Ɔ maan be su yoman amun like fi.” 15  Be sɔli sika nga be mannin be’n nun. Kpɛkun like nga be seli be kɛ be yo’n, be yoli. Ndɛ sɔ’n truli dan Zuifu’m be kwlaa be afiɛn lele andɛ. 16  Zezi i sɔnnzɔnfuɛ blu-nin-kun (11) mun be liɛ’n, be ɔli Galile oka’n su lɔ, kan ɔ seli be kɛ be yia lɔ’n. 17  Kɛ be wunnin i’n, be kotoli i bo. Sanngɛ be nun wie’m b’a lafiman su kɛ i-ɔ. 18  Zezi wunngeli be wun lɔ, kpɛkun ɔ seli be kɛ: “Ɲanmiɛn fali kwlalɛ’n kwlaa mannin min naan n sie ninnge nga be o ɲanmiɛn su lɔ nin asiɛ’n su wa’n be kwlaa. 19  I sɔ’n ti’n, amun wɔ, amun yo maan nvlenvle’m be kwlaa be nunfuɛ’m be kaci min sɔnnzɔnfuɛ. Amun yo be batɛmun, Siɛ’n nin Ba’n nin Ɲanmiɛn i wawɛ’n be dunman nun. 20  Like kwlaa nga n seli amun kɛ amun yo’n, amun kle be naan be kusu be nian su be yo wie. E nin amun e o nun cɛn kwlaa lele mɛn’n* fá wíe!”

Ja ngua lɛ nzɔliɛ mun

Glɛki nun: aiɔn. Nian Ndɛ’m be bo tulɛ lika’n nun lɔ