Matie 26:1-75
-
Ɲanmiɛn ɲrun jranfuɛ’m be cicili kɛ bé kún Zezi (1-5)
-
Be fali ngo fanninfannin be guɛli i Zezi su (6-13)
-
Delɛ cɛn dilɛ kasiɛn’n, be fɛli i be mannin sran mun (14-25)
-
E Min’n i nnɔsua nun aliɛ’n i ba kpɛlɛ (26-30)
-
Piɛli wá sé kɛ ɔ siman Zezi (31-35)
-
Zezi srɛli Ɲanmiɛn Zɛtsemane lɔ (36-46)
-
Zezi i tralɛ (47-56)
-
Zuifu’m be Jɔlɛ difuɛ dandan’m be dili i jɔlɛ (57-68)
-
Piɛli waan ɔ siman Zezi (69-75)
26 Kɛ Zezi wieli ndɛ kwlaa sɔ’m be kan’n, ɔ seli i sɔnnzɔnfuɛ’m be kɛ:
2 “Amun si kɛ ɔ ka cɛn ba nɲɔn Delɛ cɛn’n jú. Bé wá fá Sran wa’n bé wlɛ́ i sran’m be sa nun, naan be kun i waka’n su.”
3 Blɛ sɔ nun’n, Ɲanmiɛn ɲrun jranfuɛ’m be su kpɛn mun nin nvle su kpɛn’m be yiali Ɲanmiɛn ɲrun jranfuɛ dan mɔ be flɛ i Kaifu’n, i awlo lɔ.
4 Be nuan sɛli be wun kɛ bé fá gblɛ bé trá Zezi naan bé kún i.
5 Asa kusu’n, be seli kɛ: “Nán maan ɔ yo cɛn dilɛ’n nun. Sɛ ɔ yo sɔ’n, sran’m bé trí.”
6 Blɛ mɔ Zezi o Betanin, Simɔn m’ɔ ti kokowefuɛ’n i awlo lɔ
7 m’ɔ́ dí like’n,* bla kun bɛli i wun lɛ. Kɛ ɔ́ bá’n, ngo fanninfannin m’ɔ le gua kpa’n, i buteli kun o i sa nun. Bla’n fali ngo’n guɛli i ti’n su.
8 Kɛ i sɔnnzɔnfuɛ’m be wunnin i sɔ’n, ɔ yoli be ya dan, naan b’a se kɛ: “?Like yɛ be saci i sɔ-ɔ?
9 Be kwla yo ngo nga i atɛ be ɲan nun sika kpanngban. Yɛ be kwla fa sika sɔ’n be man yalɛfuɛ mun.”
10 Kɛ Zezi wunnin kɛ be su kɛn i sɔ ndɛ’n, ɔ seli be kɛ: “?Ngue ti yɛ amun kunndɛ kɛ amún klé bla’n i yalɛ-ɔ? Like kpa yɛ ɔ yo mannin min-ɔn.
11 Afin amun nin yalɛfuɛ’m be o wa titi, sanngɛ min liɛ’n, amun nin min su tranman titi.
12 Kɛ ɔ fali ngo fannin’n guali min wun’n, min sielɛ’n i su like yɛ ɔ yoli i lɛ-ɔ.
13 Nanwlɛ, ń kán klé amun kɛ mɛn wunmuan’n nun’n, lika kwlaa nga bé wá bó jasin fɛ nga’n, sran’m bé kán like nga bla nga yoli’n i ndɛ wie naan be wla kpɛn i su.”
14 I sin’n, akoto blu-nin-nɲɔn (12) mun be nun kun mɔ be flɛ i Zida Iskariɔti’n, ɔ ɔli Ɲanmiɛn ɲrun jranfuɛ’m be su kpɛn’m be wun lɔ
15 naan w’a se be kɛ: “?Sɛ n fɛ i n man amun’n, ngue yɛ amún mán min-ɔn?” Be seli i kɛ bé mɛ́n i jɛtɛ ufue ablasan (30).
16 Kɛ ɔ fɛ i lɛ’n, ɔ kunndɛli blɛ kpa kun naan ɔ́ fɛ́ i mán sran mun.
17 Cɛn nga bé bó Kpanwun mɔ be guaman nun kpanwun ayre’n i cɛn dilɛ’n i bo’n, Zezi i sɔnnzɔnfuɛ’m be ko wunnin i wun. Yɛ be usɛli i kɛ: “?Lika onin yɛ a kunndɛ kɛ e siesie e man wɔ naan w’a di Delɛ cɛn’n niɔn?”
18 Ɔ seli be kɛ: “An wɔ klɔ’n nun lɔ ko wun sran nga sa wun. Yɛ amun se i kɛ, ‘Like klefuɛ’n waan: “Min blɛ’n w’a mantan. Ɔ sua’n nun yɛ min nin min sɔnnzɔnfuɛ mun é wá dí Delɛ cɛn’n niɔn.”’”
19 Zezi i sɔnnzɔnfuɛ’m be yoli like ng’ɔ seli be kɛ be yo’n sɛsɛsɛ, naan b’a siesie Delɛ cɛn’n.
20 Kɛ nnɔsua flɔlɔ juli’n, ɔ nin i sɔnnzɔnfuɛ blu-nin-nɲɔn (12) mun be ko trannin* tabli kun sin.
21 Kɛ bé dí like’n, ɔ seli be kɛ: “Nanwlɛ, ń kán klé amun kɛ amun nun kun wá fá min mán sran mun.”
22 Kɛ be tili ndɛ sɔ’n, be wla boli be wun dan. Nga waan: “?Nannan, min-ɔn?” Nga waan: “?Nannan, min-ɔn?”
23 Ɔ tɛli su kɛ: “Sran nga e nin i e su wla e sa kpongbo ba’n nun’n, yɛ ɔ́ fá min mán sran mun-ɔn.
24 Be klɛli Sran wa’n i su ndɛ kɛ ɔ su kɔ. I yo, ɔ́ wá yó sɔ sakpa. Sanngɛ sran ng’ɔ́ wá fá Sran wa’n mán’n, i yako! Sɛ b’a wumɛn i bɔbɔ’n, ɔ flunman.”
25 Zida m’ɔ su wa fɛ i man sran mun’n, ɔ seli i kɛ: “?Rabi,* min-ɔn?” Zezi seli i kɛ: “Yɛ ɔ bɔbɔ ɔ nuan o su lɛ-ɔ.”
26 Kɛ bé dí like’n, Zezi fali kpanwun kun, ɔ srɛli Ɲanmiɛn kɛ ɔ yra su. I sin’n, ɔ bubuli nun mannin be. Kpɛkun ɔ seli be kɛ: “Amun de be di. Nga ti min wunnɛn’n i nzɔliɛ.”
27 Kpɛkun ɔ fali klowa kun, ɔ lali Ɲanmiɛn ase. I sin’n, ɔ fa mannin be. Kpɛkun ɔ seli be kɛ: “Amun kwlaa amun nɔn.
28 Nga ti min ‘mmoja mɔ maan Ɲanmiɛn nin sran’m be tra aenguɛ’n,’ i nzɔliɛ. Bé gúɛ i ase naan be yaci sran kpanngban be sa tɛ’n cɛ be.
29 Sanngɛ ń kán klé amun kɛ: N su nɔnman viɲin nzue nga wie kun, saan cɛn nga e nin amun é nɔ́n i lɔflɛ’n min Si i Famiɛn diwlɛ’n nun lɔ’n.”
30 Kɛ be toli jue be manmannin Ɲanmiɛn wieli’n, be fite ɔli Olivie oka’n su lɔ.
31 Kɛ ɔ yoli sɔ’n, Zezi seli be kɛ: “Kɔnguɛ nga’n, amun kwlaa amún wá yáci min wánndi.* Afin be klɛli i klɛ: ‘Ń bó bua tafuɛ’n, kpɛkun bua’m bé bó sánndi.’
32 Sanngɛ kɛ be ko cɛn min’n, ń dún mmua amun ɲrun Galile lɔ.”
33 Piɛli tɛli i su kɛ: “Kannzɛ bɔbɔ be kwlaa be yaci wɔ’n,* sanngɛ min liɛ’n, n su yaciman wɔ le!”
34 Zezi seli i kɛ: “Nanwlɛ, ń kán klé wɔ kɛ kɔnguɛ nga’n, ka naan akɔɲinman kun w’a bo’n, á sé kpɛ nsan kɛ a siman min.”
35 Piɛli seli i kɛ: “Kannzɛ bɔbɔ ɔ fata kɛ e nin wɔ e wu’n, n su seman le kɛ n siman wɔ.” I sɔnnzɔnfuɛ onga’m be kwlaa be kannin sɔ wie.
36 I sin’n, Zezi nin be ɔli lika ng’ɔ suan Zɛtsemane’n nun lɔ. Kpɛkun ɔ seli i sɔnnzɔnfuɛ’m be kɛ: “Amun tran ase wa. Ń kɔ́ le sa, ń kó srɛ́ Ɲanmiɛn.”
37 Ɔ fali Piɛli nin Zebede i wa yasua nɲɔn mun naan b’a ɔ. I akunndan’n sanngannin kpa, kpɛkun i wla boli i wun.
38 Yɛ ɔ seli be kɛ: “Awlabɔɛ’n w’a kun min kpo. Amun ka wa, yɛ amun ɲin tran su kɛ min sa.”
39 Ɔ ɔli i ɲrun lɔ kan. Ɔ utuli i ɲin ase, kpɛkun ɔ srɛli Ɲanmiɛn. Ɔ seli i kɛ: “Min Si, sɛ ɔ kwla yo ye’n, maan klowa* nga sin min wun mmua. Sanngɛ nán maan ɔ yo kɛ nga n klo’n sa. Maan ɔ yo kɛ nga ɔ bɔbɔ a klo’n sa.”
40 Ɔ sɛli i sin i sɔnnzɔnfuɛ’m be wun lɔ. Ɔ́ tó be-ɔ, be su lafi. Yɛ ɔ seli Piɛli kɛ: “?Amun ɲin w’a kwlá tranman su kɛ min sa dɔ kun sa bɔbɔ?
41 Maan amun ɲin tran su, yɛ amun srɛ Ɲanmiɛn titi. I liɛ’n, amun su tɔman sa tɛ yolɛ’n nun. Nanwlɛ, amun awlɛn o su kpa* kɛ amún yó, sanngɛ amun lemɛn i wun fanngan.”
42 Ɔ ɔli ekun. I kpɛ nɲɔn su m’ɔ ɔli sɔ’n, ɔ srɛli Ɲanmiɛn seli kɛ: “Min Si, sɛ like nga kwlá sinman min wun mmua naan i nɔnlɛ yɛ ɔ fata kɛ n nɔn’n, maan ɔ yo kɛ nga a klo’n sa.”
43 Ɔ bali ekun. Ɔ́ tó be-ɔ, be su lafi. Afin lafilɛ o be ɲin su dan.
44 Ɔ maan ɔ yacili be lɛ ko srɛli Ɲanmiɛn ekun. Ɔ kannin ndɛ kunngba’n. I kpɛ nsan su m’ɔ́ kó srɛ́ Ɲanmiɛn’n, yɛ ɔ o lɛ-ɔ.
45 Ɔ sɛli i sin i sɔnnzɔnfuɛ’m be wun lɔ ekun, naan w’a se be kɛ: “Blɛ kɛ nga sa nun’n, amun su lafi yɛ amun su lo wunmiɛn! An nian! Blɛ nga bé fá Sran wa’n bé wlɛ́ i sa tɛ yofuɛ’m be sa nun’n, w’a mantan koko kpa.
46 Amun jaso maan e wɔ. An nian! Sran ng’ɔ́ fá min mán sran mun’n, ɔ nunman mmua kun.”
47 I nuan nin-a tɔman, kpɛkun Zida m’ɔ ti akoto blu-nin-nɲɔn (12) mun be nun kun’n, w’a bo nun. Sran kpanngban kpa be su i su. Tokofi nin waka o be sa nun. Ɲanmiɛn ɲrun jranfuɛ’m be su kpɛn mun nin nvle su kpɛn mun yɛ be sunmannin be-ɔ.
48 Sran ng’ɔ́ fɛ́ i mán sran mun’n, ɔ kleli be nzɔliɛ kun. Ɔ seli be kɛ: “Sran nga amún wún kɛ n su fa min nuan n wɔ i fuka’n su’n, nn i-ɔ. Amun trɛ i be wɔ.”
49 Ɔ ɔli Zezi wun lɔ trele naan w’a se kɛ: “Rabi,* anun-o!” Kpɛkun ɔ fɛli i nuan’n wɔli i fuka’n su.
50 Sanngɛ Zezi seli i kɛ: “?Janvuɛ, ngue ti yɛ a ba-ɔ?” Yɛ sran’m be trali Zezi-ɔ.
51 Be nga be nin Zezi be o lɛ’n, be nun kun cuɛnnin i tokofi’n, kpɛkun ɔ fa finnin Ɲanmiɛn ɲrun jranfuɛ dan’n i junman difuɛ’n naan w’a kpɛ i su’n.
52 Yɛ Zezi seli i kɛ: “Fa ɔ tokofi’n sie i osu’n nun. Afin be kwlaa nga be tra tokofi nun’n, tokofi yɛ bé fá kún be-ɔ.
53 ?Annzɛ a bu i kɛ n kwlá seman min Si naan ɔ blɛ min anzi akpasuaakpasua blu-nin-nɲɔn (12) icra’n?
54 ?Sɛ ɔ yo sɔ kusu’n, ɔ́ yó sɛ naan Ɲanmiɛn i ndɛ ng’ɔ kɛnnin i kɛ i sɔ yɛ ɔ fata kɛ ɔ yo’n, w’a kpɛn su?”
55 Kpɛkun Zezi seli sran kpanngban nga be o lɛ’n be kɛ: “?Tokofi nin waka yɛ amun fa ba min tralɛ kɛ awiefuɛ yɛle min sa-ɔ? Cɛn kwlaa n kleli like Ɲanmiɛn i sua’n nun lɔ, sanngɛ amun a traman min.
56 I kwlaa sɔ’n yoli naan ndɛ nga Ɲanmiɛn nuan ijɔfuɛ’m be kannin’n, ɔ kpɛn su.” Kpɛkun i sɔnnzɔnfuɛ’m be yacili i lɛ be wanndili.
57 Be nga be trali Zezi’n, be fɛ i ɔli Kaifu m’ɔ ti Ɲanmiɛn ɲrun jranfuɛ dan’n i awlo lɔ. Lɔ yɛ mmla klɛfuɛ* mun nin nvle su kpɛnngbɛn’m be ti yiali-ɔ.
58 Kɛ ɔ́ yó sɔ’n, nn Piɛli o i sin mmua lɔ, ɔ su i su. Ɔ suli i su lele juli Ɲanmiɛn ɲrun jranfuɛ dan’n i awlo lɔ. Kɛ ɔ wluli lɔ’n, ɔ ko trannin ase awlo’n nun junman difuɛ’m be wun lɛ naan ɔ́ nían wafa nga ndɛ’n i bo’n gúa’n.
59 Ɲanmiɛn ɲrun jranfuɛ’m be su kpɛn mun nin Zuifu’m be Jɔlɛ difuɛ dandan’m be kwlaa be kunndɛli Zezi i wun ato ndɛ kun mɔ be kwla jran su be kun i’n.
60 Kannzɛ bɔbɔ suɛn tɔnfuɛ kpanngban be bali’n, sanngɛ b’a wunman ndɛ kun nga be ko jran su-ɔ. I sin’n, sran nɲɔn be bali
61 naan b’a se kɛ: “Bian nga seli kɛ, ‘N kwla bubu Ɲanmiɛn i sua’n, kpɛkun ń fá cɛn ba nsan ń kplɛ́n i uflɛ.’”
62 Kɛ Ɲanmiɛn ɲrun jranfuɛ dan’n tili i sɔ’n, ɔ jasoli naan w’a se i kɛ: “?Ndɛ nga bé kɛ́n i lɛ’n, a buaman nun? ?Ɔ wun ndɛ nga bé kɛ́n i lɛ’n, a timan?”
63 Sanngɛ Zezi w’a ukemɛn i nuan. Ɔ maan Ɲanmiɛn ɲrun jranfuɛ dan’n seli i kɛ: “Sɛ wɔ yɛ a ti Klisi m’ɔ ti Ɲanmiɛn i Wa’n, ta nda Ɲanmiɛn m’ɔ lafiman’n i ɲrun, di i nanwlɛ kle e.”
64 Zezi seli i kɛ: “Yɛ ɔ bɔbɔ ɔ nuan o su lɛ-ɔ. Sanngɛ ń kán klé amun kɛ: Kɛ ɔ fɛ i andɛ’n, amún wá wún Sran wa’n. Ɔ ti Kwlafuɛ’n i sa fama su, yɛ ɔ o ɲanmiɛn ble’n su, ɔ su ba.”
65 Yɛ Ɲanmiɛn ɲrun jranfuɛ dan’n titili i wun tralɛ’m be nun-ɔn. Kpɛkun ɔ seli kɛ: “W’a saci Ɲanmiɛn dunman! ?É bó wɛ é kúnndɛ lalofuɛ ekun? Kɛ ɔ́ sáci Ɲanmiɛn dunman’n, amun tili.
66 ?Amun bu i sɛ?” Be tɛli su kɛ: “Ɔ nin kunlɛ fata.”
67 Be tili be nuan nzue’n be tɛli i ɲrun’n nun, kpɛkun be boli i acɔliɛ. Wie’m be kpacili i ɲrun,
68 kpɛkun be seli kɛ: “Klisi, sɛ a ti Ɲanmiɛn nuan ijɔfuɛ’n, kle e sran ng’ɔ finnin ɔ like’n.”
69 Kɛ ɔ́ yó sɔ’n, nn Piɛli ti awlo’n i klun lɛ. Yɛ junman difuɛ talua kun bɛli i wun lɛ naan w’a se kɛ: “Wɔ, a suli Zezi m’ɔ ti Galilefuɛ’n, i su wie!”
70 Sanngɛ sran’m be kwlaa be ɲrun lɛ’n, ɔ sɛli i nuan seli kɛ: “Ndɛ nga á kɛ́n i lɛ’n, n wunmɛn i wlɛ.”
71 Kɛ ɔ fiteli m’ɔ juli anuan’n i ɲrun lɛ’n, talua kun ekun wunnin i wlɛ naan w’a se be nga be o lɛ’n, be kɛ: “Bian nga suli Zezi m’ɔ fin Nazarɛti’n i su wie.”
72 Ɔ sɛli i nuan ekun. Ɔ tali su nda seli kɛ: “N siman bian nga amún kɛ́n i ndɛ lɛ’n!”
73 Kɛ ɔ cɛli kan’n, be nga be jinjin lɛ’n, be bali be wa seli Piɛli kɛ: “Nanwlɛ, a o be nun wie. Afin ɔ ijɔlɛ wafa’n kle sɔ weiin.”
74 Kɛ ɔ yoli sɔ’n, i waan sɛ ato yɛ ɔ su bua’n, maan sa ɲɛn i. Kpɛkun ɔ tali nda seli kɛ: “N siman bian sɔ’n!” Kɛ ɔ yoli sɔ cɛ’n, yɛ akɔɲinman kun boli-ɔ.
75 Yɛ Piɛli i wla kpɛnnin ndɛ nga Zezi kan kleli i’n su-ɔ. Ɔ seli i kɛ: “Ka naan akɔɲinman kun w’a bo’n, á sé kpɛ nsan kɛ a siman min.” Kpɛkun ɔ fite ɔli gua su lɔ, naan w’a sun fiaan kpa.
Ja ngua lɛ nzɔliɛ mun
^ Glɛki nun’n, be se kɛ “lali.”
^ Be kwla se ekun kɛ “Like klefuɛ.”
^ Glɛki nun’n, be se kɛ “Min ti’n, amun kwlaa amun ja kplá kɔnguɛ nga.”
^ Glɛki nun’n, be se kɛ “be ja kpla’n.”
^ Ɲanmiɛn mannin atin kɛ be tɔn Zezi i suɛn kɛ w’a saci Ɲanmiɛn dunman naan be kun i. Klowa’n ti i sɔ liɛ’n i nzɔliɛ.
^ Be kwla se ekun kɛ “amun klo kpa kɛ.”
^ Be kwla se ekun kɛ “Like klefuɛ.”
^ Nian Ndɛ’m be bo tulɛ lika’n nun lɔ.
