Matie 21:1-46
-
Zezi wluli Zerizalɛmun klɔ’n nun (1-11)
-
Zezi yoli Ɲanmiɛn i sua’n i sanwun (12-17)
-
Zezi boli figie waka kun i sannzan (18-22)
-
Atin nga Zezi le i yo abonuan sa mun’n i su kosan usalɛ (23-27)
-
Ba yasua nɲɔn’m be wun ɲanndra (28-32)
-
Junman difuɛ mɔ be ti sran kunfuɛ’n be wun ɲanndra (33-46)
-
Be yili sua’n i cɔnjɔ su yɔbuɛ cinnjin kpafuɛ’n i blo (42)
-
21 Kɛ Zezi nin i sɔnnzɔnfuɛ’m be mantannin Zerizalɛmun mɔ be juli Bɛtfaze m’ɔ o Olivie oka’n su’n, ɔ sunmɛnnin i sɔnnzɔnfuɛ’m be nun nɲɔn.
2 Ɔ seli be kɛ: “Amun wɔ klɔ nga amun ɲin tɛ i lɛ’n su. Sɛ amun ju lɔ’n, amún wún kɛ aflunmun kun minnda lɛ, i wa’n wo i wun lɛ. Amun ɲannji be naan amun fa be blɛ min.
3 Sɛ sran kun usa amun sa’n, amun se kɛ: ‘E Min’n i sa mian be wun.’ Kɛ ɔ ko yo sɔ’n, ɔ́ ká lɛ mán amun atin naan amun fa be blɛ min.”
4 Sa sɔ’n juli naan ndɛ nga Ɲanmiɛn nuan ijɔfuɛ’n kannin’n ɔ kpɛn su. Ɔ seli kɛ:
5 “Se Siɔn i wa bla’n kɛ: ‘Nian! Ɔ famiɛn’n su ba ɔ wun lɔ. Ɔ ti wɛtɛɛfuɛ yɛ ɔ ti aflunmun kun su, aflunmun m’ɔ ti nnɛn m’ɔ sua trɔ’n, i wa’n i su yɛ ɔ ti-ɔ.’”
6 Ɔ maan, Zezi i sɔnnzɔnfuɛ’m be ɔli, kpɛkun be yoli i kɛ ng’ɔ kan kleli be’n sa cɛ.
7 Be fali aflunmun’n nin i wa’n be bali. Be fali be tralɛ mun be sɛsɛli be su naan w’a tran su.
8 Sran’m be dan lika be sɛsɛli be tralɛ mun akpɔ’n su, yɛ wie’m be bubuli waka nɲa be siesieli be akpɔ’n su.
9 Asa ekun’n, sran kpanngban kpa nga be dun mmua i ɲrun’n, ɔ nin be nga be su i su’n, be kpan se kɛ: “É srɛ́ wɔ, de* Davidi i Wa’n!* Maan Zoova yra sran ng’ɔ bɛ i dunman nun’n i su! Wɔ mɔ a o nglo mmuammua kpa lɔ’n, é srɛ́ wɔ, de i!”
10 Kɛ ɔ wluli Zerizalɛmun klɔ’n nun’n, klɔ wunmuan’n kejeli yekee. Sran’m be usali kɛ: “?Wan-ɔn?”
11 Be nga be nin i be ba’n, be tɛ su kɛ: “Ɲanmiɛn nuan ijɔfuɛ Zezi m’ɔ fin Nazarɛti m’ɔ o Galile mɛn’n nun lɔ’n niɔn!”
12 Zezi wluli Ɲanmiɛn i sua’n nun lɔ, kpɛkun ɔ fuannin be kwlaa nga be yo like atɛ lɔ’n, ɔ nin be nga be su to like’n. Yɛ ɔ suli sika kacifuɛ’m be tabli mun nin auble atɛ yofuɛ’m be bia’m be bo guali.
13 Yɛ ɔ seli be kɛ: “Be klɛli i kɛ, ‘Bé wá flɛ́ min sua’n kɛ Ɲanmiɛn srɛlɛ sua,’ sanngɛ amun su fa yo awiefuɛ’m be lika.”
14 Asa ekun’n, aɲinsifuɛ mun nin be nga be ja timan kpa’n be bɛli i wun lɛ Ɲanmiɛn i sua’n nun lɛ, kpɛkun ɔ yoli be juejue.
15 Kɛ Ɲanmiɛn ɲrun jranfuɛ’m be su kpɛn mun nin mmla klɛfuɛ* mun be wunnin abonuan sa ng’ɔ yoli be’n, ɔ nin ba kanngan’m be kpanlɛ mɔ be kpan Ɲanmiɛn i sua’n nun se kɛ: “É srɛ́ wɔ, de Davidi i Wa’n!”* w’a yoman be fɛ.
16 Yɛ be seli Zezi kɛ: “?A ti ndɛ nga ba kanngan nga’m be kan’n?” Ɔ tɛli be su kɛ: “Ɛɛn, n ti. ?Ndɛ nga be klɛli i kɛ, ‘A yoli maan ba kanngan nin ba nɔnman mun be manmannin wɔ’n,’ amun nin-a kɛnngɛnmɛn i le?”
17 Kɛ ɔ jasoli be wun lɛ’n, ɔ fin klɔ’n nun fiteli, kpɛkun ɔ ɔli Betanin naan w’a la lɔ.
18 Nglɛmun ndɛ kpa’n, kɛ ɔ́ sɛ́ i sin klɔ’n su lɔ’n, awe kunnin i.
19 Ɔ wunnin figie waka kun akpɔ’n nuan lɛ naan w’a wunnge i wun lɔ. Sanngɛ w’a wunman like fi su, saan i nɲa ngunmin. Yɛ ɔ seli waka’n kɛ: “Nán su kun le.” Kpɛkun figie waka’n ka lɛ wuli kee.
20 Kɛ i sɔnnzɔnfuɛ’m be wunnin i sɔ’n, ɔ boli be nuan naan b’a usa kɛ: “?Ai, ngue ti yɛ figie waka’n ka lɛ wuli kee-ɔ?”
21 Zezi tɛli be su kɛ: “Nanwlɛ, ń kán klé amun kɛ sɛ amun lafi Ɲanmiɛn su naan amun akunndan’n timan nɲɔnnɲɔn’n, like nga n fa yoli figie waka’n, amún yó wie. I kpa bɔbɔ’n, sɛ amun se oka ng’ɔ o yɛ’n kɛ, ‘Man ɔ wun su naan ko tɔ jenvie’n nun’n,’ ɔ́ kɔ́.
22 Yɛ like kwlaa nga amun srɛ i Ɲanmiɛn sa nun’n, sɛ amun lafi su’n, amún ɲɛ́n i.”
23 Kɛ ɔ wluli Ɲanmiɛn i sua’n nun lɔ m’ɔ́ klé like’n, Ɲanmiɛn ɲrun jranfuɛ’m be su kpɛn mun nin nvle su kpɛn’m be bɛli i wun lɛ. Be usɛli i kɛ: “?A le atin yo ninnge nga mun? ?Yɛ wan yɛ ɔ mannin wɔ atin sɔ’n niɔn?”
24 Zezi tɛli be su kɛ: “Maan n kusu n usa amun sa kun. Sɛ amun tɛ min su’n, ń klé amun sran ng’ɔ mannin min atin kɛ n yo ninnge sɔ mun’n:
25 ?Batɛmun nga Zan yoli sran mun’n, ɔ fin wan? ?Ɔ fin Ɲanmiɛn* annzɛ ɔ fin klɔ sran?” Be kɛnnin i be afiɛn lɔ kɛ: “Sɛ e se kɛ ‘Ɔ fin Ɲanmiɛn’n,’ ɔ́ sé e kɛ, ‘?Sɛ ɔ ti sɔ’n niɔn, ngue ti yɛ amun a lafimɛn i su-ɔ?’
26 Sɛ kusu e se kɛ, ‘Ɔ fin klɔ sran’n,’ sran kpanngban nga be o yɛ’n, bé fá e wun ya, afin be kwlaa be waan Zan ti Ɲanmiɛn nuan ijɔfuɛ.”
27 Ɔ maan be tɛli Zezi su kɛ: “E siman sran ng’ɔ fin i’n.” Yɛ ɔ seli be kɛ: “N kusu, n su kleman amun sran ng’ɔ mannin min atin kɛ n yo ninnge sɔ mun’n.
28 “?Amun bu ndɛ nga sɛ? Bian kun le ba nɲɔn. Ɔ ko toli kpɛnngbɛnfuɛ’n, yɛ ɔ seli i kɛ, ‘Min wa, kɔ viɲin fie’n nun lɔ ko di junman andɛ.’
29 Ba’n tɛli i su kɛ, ‘N kɔman.’ Sanngɛ i sin’n, ɔ wa yoli i nsisɔ naan w’a wɔ.
30 Ɔ wunngeli ba kasiɛnfuɛ’n i wun lɔ wie, ɔ kannin ndɛ kunngba’n kleli i. Ba’n tɛli i su kɛ, ‘Baba, n tili. Ń má kɔ́.’ Sanngɛ w’a ɔman.
31 ?Ba nɲɔn sɔ mun’n, oninfuɛ’n yɛ ɔ yoli i si i klun sa-ɔ?” Be tɛli i su kɛ: “Kpɛnngbɛnfuɛ’n niɔn.” Zezi seli be kɛ: “Nanwlɛ, ń kán klé amun kɛ lapo defuɛ nin tekle bla mun bé dún amun ɲrun mmua Ɲanmiɛn i Famiɛn diwlɛ’n nun lɔ.
32 Afin kɛ Zan bali’n, ɔ kleli amun sa kpa yolɛ’n. Ɔ nin i sɔ ngba’n, amun a lafimɛn i su. Sanngɛ lapo defuɛ nin tekle bla mun, be lafili i su. Kannzɛ bɔbɔ amun wunnin sa sɔ’n, w’a yoman amun nsisɔ naan amun a lafi i su.
33 “Amun tie ɲanndra nun ndɛ kun ekun: Bian kun o lɛ’n, ɔ le asiɛ yɛ ɔ dili viɲin fie kun. Ɔ sisili i wun yɛ ɔ kpɛli viɲin nzue yiwlɛ kun fie’n nun. Asa ekun’n, ɔ kplannin nun sua nglonglo kpa* kun. Kpɛkun ɔ yacili i junman difuɛ wie’m be sa nun. I sin’n, ɔ ɔli nvle uflɛ nun.
34 Kɛ fie’n su ninnge’m be tilɛ blɛ’n mantannin’n, ɔ sunmɛnnin i kanga mun junman difuɛ’m be sin naan be ko fɛ i viɲin liɛ.
35 Sanngɛ, junman difuɛ’m be trɛli i kanga mun. Be boli kun, be kunnin kun, yɛ be finfinnin kun yɔbuɛ.
36 Ɔ sunmɛnnin i kanga wie mun ekun. Be sɔnnin tra klikli liɛ mun. Sanngɛ be fali sa kunngba’n yoli be.
37 Kasiɛn su’n, ɔ sunmɛnnin i wa’n be sin lɔ. Afin ɔ seli i wun kɛ, ‘Min wa’n i liɛ’n, be ɲin yí i.’
38 Kɛ junman difuɛ’m be wunnin ba’n, be seli be wiengu kɛ, ‘Aja difuɛ’n yɛ. An bla maan e kun i naan e fɛ i aja’n!’
39 Ɔ maan be trɛli i. Be to i yili i viɲin fie’n i sin lɔ naan b’a kun i.
40 ?Kɛ viɲin fie’n i fuɛ’n ɔ́ wá bá’n, ɔ́ yó junman difuɛ sɔ’m be sɛ?”
41 Be tɛli i su kɛ: “Kɛ mɔ be klun yo wi’n ti’n, viɲin fie’n i fuɛ’n, ɔ́ wá kún be tɛtɛ kpa. Kpɛkun ɔ́ fá viɲin fie’n mán junman difuɛ uflɛ mɔ kɛ viɲin mma’n i tilɛ blɛ’n ko ju’n, bé fɛ́ i liɛ’n mɛ́n i’n.”
42 Zezi seli be kɛ: “Be klɛli i Ɲanmiɛn Ndɛ’n nun kɛ: ‘Yɔbuɛ nga sua kplanfuɛ’m be yili i blo’n, w’a kaci sua’n i cɔnjɔ su yɔbuɛ cinnjin kpafuɛ’n. I sɔ’n fin Zoova, yɛ ɔ ti abonuan sa e ɲrun.’ ?Amun nin-a kannganman ndɛ sɔ’n le?
43 I sɔ’n ti’n, ń kán klé amun kɛ, Ɲanmiɛn dé i Famiɛn diwlɛ’n amun sa nun, yɛ ɔ́ fá mán nvle kun m’ɔ yo i klun sa’n.*
44 Asa ekun’n, sran kwlaa ng’ɔ tɔ yɔbuɛ sɔ’n su’n, sran sɔ’n i nun búbú. Sran nga kusu mɔ yɔbuɛ sɔ’n tɔ i su’n, yɔbuɛ’n kpɔ́tɔ i.”
45 Kɛ Ɲanmiɛn ɲrun jranfuɛ’m be su kpɛn mun nin Farizifuɛ’m be tili ɲanndra nun ndɛ sɔ mun’n, be wunnin i wlɛ kɛ be ndɛ yɛ ɔ su kan-ɔn.
46 Be waan bé trɛ́ i, sanngɛ sran kpanngban nga be o lɛ’n be ti’n, srɛ kunnin be. Afin be bu i Ɲanmiɛn nuan ijɔfuɛ.
Ja ngua lɛ nzɔliɛ mun
^ Glɛki nun’n, be se kɛ “Ozana.”
^ Nian Mt 1:1 i su ndɛ ng’ɔ o ja ngua lɔ’n nun.
^ Nian Ndɛ’m be bo tulɛ lika’n nun lɔ.
^ Nian Mt 1:1 i su ndɛ ng’ɔ o ja ngua lɔ’n nun.
^ Glɛki nun’n, be se kɛ “ɲanmiɛn su.”
^ Be jran lɔ be nian fie’n su naan awiefuɛ nin nnɛn’m b’a wluman nun.
^ Be kwla se ekun kɛ “su mma.”
